قىس قىر استىندا. سوندىقتان ءقازىر قىسقا دايىندىق قارقىندى جۇرگىزىلۋدە. اسىرەسە جىلىتۋ ماۋسىمىنا اۋىلداعى اعايىن مىقتاپ كىرىسكەن. الايدا ادامدار كەز-كەلگەن ادىسپەن ۇيلەرىن جىلىتۋعا اسىعاتىنى سونشالىق، ءورت قاۋىپسىزدىگى ەرەجەلەرىن ساقتاماۋ سالدارىنان ءورت شىعىپ جاتادى دەپ جازادى Qamshy.kz اقپارات اگەنتتىگى .
جىلىتۋ پەشتەرىنە بايلانىستى ورتتەردىڭ سەبەپتەرى نەگىزىنەن تۇتىندىكتە جينالاتىن كۇيەنىڭ جانۋىنان، قابىرعالارىنىڭ قاتتى قىزۋى ناتيجەسىندە ءتۇتىن قۇبىرلارىنداعى كىرپىشتەردىڭ جارىلۋى بولىپ جاتادى. ال بولمەلەردى جىلىتۋ ءۇشىن ەلەكترلى، ونىڭ ىشىندە قولدان جاسالعان قۇرالداردى قولدانۋ ەلەكتر جەلىلەرىنىڭ شامادان تىس جۇكتەلۋىنە، تۇيىسپە باتتەردىڭ قاتتى قىزۋىنا، ارتىنان سىمداردىڭ تۇتانۋىنا اكەلىپ سوعادى.
جامبىل وبلىسى بايزاق اۋداندىق توتەنشە جاعدايلار ءبولىمى اعىمداعى جىلدىڭ 25 تامىز- 25 قىركۇيەك ارالىعىندا تۇرعىن ءۇي سەكتورىندا ايلىق وتكىزۋدى جوسپارلاعان بولاتىن. ەندى وسى ايلىق بارىسىندا تۇرعىن ءۇي سەكتورىنداعى ورتتەر مەن ۋلى گازدان ۋلانۋ وقيعالارىنىڭ الدىن الۋ جانە جول بەرمەۋدى بۇقارالىق اقپارات قۇرالدارى ارقىلى ءتۇسىندىرۋ جانە پروفيلاكتيكالىق جۇمىستار جۇرگىزۋگە باعىتتالعان شارالار جۇرگىزىلدى. ءورت قاۋىپسىزدىگى ايلىعىن وتكىزۋ بارىسىندا 3 مىڭنان استام تۇرعىن ءۇيدى ارالاپ، ەڭ ءبىرىنشى كاركاس-قامىستى جانە ت.ب. ۇيلەرگە باستى نازار اۋدارىلدى. بارلىعى 9 مىڭنان استام تۇرعىنمەن اڭگىمەلەسۋ جۇرگىزىلىپ، جادنامالار تاراتىلدى. جىلۋ بەرۋ ماۋسىمى كەزىندە ءورت سالدارىنان ادامداردىڭ قازا بولۋىنىڭ الدىن الۋ ءۇشىن 10 مىڭنان استام ازاماتقا نۇسقاۋلىق تاراتىلدى. جىلىتۋ پەشتەرىن، ەلەكتر قوندىرعىلارىن پايدالانۋ كەزىندە ءورت قاۋىپسىزدىگى ەرەجەلەرىن ساقتاۋ بويىنشا 1687 ادامنىڭ قاتىسۋىمەن 16 جيىن ۇيىمداستىرىلدى. بۇدان بولەك، وبلىستىق «جامبىل» تەلەارناسىندا، سارىكەمەر اۋىلىنىڭ LED ديسپلەيلەرىندە جانە حقكو فيليالدارىندا بەينەروليكتەر كورسەتىلۋدە. جۇرگىزىلىپ جاتقان ءتۇسىندىرۋ جانە پروفيلاكتيكالىق جۇمىستار ءورت قاۋىپسىزدىگىن الدىن الۋعا، سونداي-اق، ءوڭىردىڭ تۇرعىن ءۇي قورىنىڭ ورتكە قارسى قورعالۋىن كۇشەيتۋگە ىقپال ەتەدى دەپ سەنەمىز.
«ساقتىقتا قورلىق جوق» دەيدى دانا قازاق. سوندىقتان جىلىتۋ ماۋسىمىندا ساقتىق شارالارىن دا ۇمىتپاعان ءجون. اسىرەسە قاتتى وتىنمەن ۇيلەرىن جىلىتاتىن تۇرعىندار بالالارىنا قىراعىلىق تانىتقاندارى ابزال. سەبەبى كوپتەگەن ورتتەر ءدال وسى بالالاردىڭ قاراۋسىز قالدىرعاننان ورىن الىپ جاتادى. دەسە دە بەتى اۋلاق، بيىلعى جىلىتۋ ماۋسىمى ءساتتى وتەدى دەپ سەنەمىز.
پىكىر قالدىرۋ