«تارتىپكە باس يگەن قۇل بولمايدى» دەپ ەر باۋكەڭ ايتقانداي، ءتارتىپسىز مەملەكەتتىڭ ىرگەتاسىن نىعايتۋ مۇمكىن ەمەس. مۇنى مەملەكەت باسشىسى قاسىم-جومارت توقايەۆ ءوز جولداۋىنادا دا باسا ايتتى. وسىعان وراي جامبىل وبلىسى، بايزاق اۋداندىق پوليسيا ءبولىمىنىڭ باستىعى، پوليسيا پولكوۆنيگى اسىلحان زاۋربەكوۆ بايتەرەك اۋىلدىق وكرۋگى تۇرعىندارىنا ەسەپ بەردى دەپ جازادى Qamshy.kz اقپارات اگەنتتىگى .

ن.كيىكبايەۆ اتىنداعى مەكتەپ – گيمنازياسىندا وتكەن جيىندى پوليسيا ءبولىمى باستىعىنىڭ ورىنباسارى عالىمجان ورازبەكوۆ اشىپ، كۇن تارتىبىندەگى ماسەلەمەن تانىستىردى. ارمەن قاراي ءسوز العان اسىلحان ءازىمحان ۇلى ىشكى ىستەر ورگاندارىنىڭ مىندەتى – ءتارتىپ ساقشىلارى مەن حالىق اراسىنداعى ءوزارا ءىس-قيمىلدى جانداندىرۋ، پوليسيا قىزمەتىنىڭ اشىقتىعى مەن تيىمدىلىگىن ارتتىرۋ، ازاماتتاردىڭ قۇقىقتارى مەن بوستاندىقتارىن قورعاۋ بولىپ تابىلاتىندىعىن جەتكىزدى. سونىمەن قاتار، بايانداماشى اۋدانداعى قىلمىستىق احۋال جانە قىلمىستىق قۇقىق بۇزۋشىلىقتاردىڭ الدىن-الۋ باعىتىندا اتقارىلعان جۇمىستارعا توقتالدى.

پوليسيا ءبولىمىنىڭ ماتەريالدىق-تەحنيكالىق بازاسى جىلدان-جىلعا نىعايىپ كەلە جاتقاندىعىن، بيىلعى جىلى پوليسيا ينسپەكتورلارى جاڭا كولىكپەن قامتىلعاندىعىن جەتكىزدى. اعىمداعى جىلدىڭ سەگىز ايىندا ورىن العان قىلمىستىق دەرەكتەرگە، اتاپ ايتقاندا پاتەر، مال ۇرلىعىنىڭ اشىلۋ دەڭگەيىنە، ورىن العان جول-كولىك وقيعالارىن تارقاتىپ ايتىپ بەردى. ەسەپتى كەزەڭدە جالپى قىلمىستىق قۇقىقبۇزۋشىلىق دەڭگەيى 12 پايىزعا تومەندەگەن. اۋداندا 4 قىلمىستىق توپ قۇرىقتالىپ، مال ۇرلىعى بويىنشا 8 ادامنان تۇراتىن 3 قىلمىستىق توپتىڭ جولى كەسىلگەن. قوعامدىق ورىنداردا ورىن العان كەلەڭسىزدىكتەر بويىنشا ۇستىمىزدەگى جىلدىڭ سەگىز ايىندا 25 قۇقىق بۇزۋشىلىق انىقتالىپ، اكىمشىلىك جاۋاپكەرشىلىككە تارتىلعان.

اسىلحان ءازىمحان ۇلى قوعامدىق ءتارتىپتى ساقتاۋ جانە قاۋىپسىزدىكتى قامتاماسىز ەتۋ ماقساتىندا كوشەلەردە جانە ادام كوپ جينالاتىن قوعامدىق ورىنداردا ورناتىلعان بەينەباقىلاۋ كامەرالارىنىڭ ماڭىزىنا ايرىقشا توقتالدى. اسىرەسە، ۇساق بۇزاقىلىق، ۇرلىق فاكتىلەرىن اشكەرەلەۋدە جانە كوشە ءتارتىبىن نىعايتۋدا باقىلاۋ بەينەكامەرالارىنىڭ كومەگى زور ەكەندىگىن، اۋدان ورتالىعى مەن اۋىلدىق وكرۋگتەردە ورناتىلعان بەينەباقىلاۋ كامەرالاردىڭ ارقاسىندا ءبىراز قىلمىستار اشكەرلەنگەن. اتالعان كامەرالاردى ءبىرىڭعاي ورتالىقتاندىرىلعان جۇيەگە قوسىپ، پوليسيا بولىمىنە كوشىرۋ جوسپارلانعاندىعىن جەتكىزدى.

سونداي-اق، جول-كولىك وقيعالارىنىڭ الدىن الۋ باعىتىندا اتقارىلىپ جاتقان شارالار مەن پوليسيا جۇمىسىن سەرۆيستىك مودەلگە كوشىرۋگە باعىتتالعان تىرلىكتەردەن اقپارات بەردى. ەسەپ-بەرۋ جيىنىنا قاتىسقان تۇرعىندار سۇراقتارىن قويىپ، ۇسىنىستارىن ءبىلدىردى. اتاپ ايتقاندا، قۇقىق بۇزۋشىلىق پەن تارتىپسىزدىكتىڭ الدىن الۋ ءۇشىن تۇرعىنداردىڭ ءتارتىپ ساقشىلارىمەن بىرلەسىپ جۇمىس جاساۋدىڭ ماڭىزى كوتەرىلىپ، ازاماتتار بويىندا زاڭ بۇزىلۋىنا توزبەۋشىلىك مادەنيەتىن قالىپتاستىرۋ جولدارى ءسوز بولدى.

تۇرعىنداردىڭ ءاربىر ساۋالىنا اسىلحان ءازىمحان ۇلى تىڭعىلىقتى جاۋاپ بەرە كەلە، قۇقىق بۇزۋشىلىققا توزبەۋ – بۇل قىلمىس پەن قۇقىق بۇزۋشىلىقتاردىڭ الدىن الۋداعى جانە قوعامدىق ءتارتىپتى ساقتاۋداعى ماڭىزدى قادامداردىڭ ءبىرى ەكەندىگىن، ازاماتتاردىڭ قاۋىپسىزدىگى مەن تىنىش-تىعىنىڭ قورعانى بولۋ – ءتارتىپ ساقشىلارى ءۇشىن ءبىر جاعىنان ابىروي بولسا، ەكىنشى جاعىنان جاۋاپتى ءىس بولىپ تابىلاتىندىعىن ايتتى.