بۇقارالىق سپورتتى دامىتۋ مەملەكەتىمىزدىڭ ۇستانعان باستى باعىتتارىنڭ ءبىرى. اسىرەسە جاستار اراسىندا سالاماتتى ءومىر سالتىن قالىپتاستىرۋدىڭ ماڭىزدىلىعى زور. جانە جاستاردى دەنە شىنىقتىرۋعا تاربيەلەۋدە پرەزيدەنتتىك سىنامالاردىڭ الار ورنى ەرەك. وسىعان وراي جاستار جامبىل وبلىسى، بايزاق اۋدانى، سارىكەمەر اۋىلىنىڭ ورتالىق ستاديونىنا جينالىپ، بەس سپورت تۇرلەرىنەن پرەزيدەنتتىك سىناما تاپسىردى دەپ جازادى Qamshy.kz اقپارات اگەنتتىگى.

ايتا كەتۋ كەرەك، ەلىمىزدەگى «حالىقتاردىڭ دەنە شىنىقتىرۋ دايارلىعىنىڭ پرەزيدەنتتىك سىنامالارى تۋرالى» ەرەجە قازاقستان رەسپۋبليكاسى ۇكىمەتىنىڭ 1996 جىلعى 24 ماۋسىمداعى №774 قاۋلىسىمەن قابىلدانعان بولاتىن. جالپى، پرەزيدەنتتىك سىنامالار – حالىقتىڭ وقۋعا، ەڭبەككە، اسكەري قىزمەتكە دايىندىعىنىڭ جالپى جاتتىعۋلار جيىنتىعى بولىپ تابىلادى.

قازاقستان رەسپۋبليكاسىنىڭ تۇڭعىش پرەزيدەنتى، ەلباسىنىڭ پرەزيدەنتتىك تەستى بويىنشا سپورت تۇرلەرىنەن ۇيىمداستىرىلعان اۋداندىق جارىس قازاقستان رەسپۋبليكاسىنىڭ V چەمپيوناتىنا جامبىل وبلىسىنىڭ قۇراما كومانداسىن جاساقتاۋ ءۇشىن وبلىستىق كەزەڭگە اۋدان قۇراماسىن ىرىكتەۋدى كوزدەدى. اتالمىش شارانىڭ تۇساۋى قازاقستان رەسپۋبليكاسىنىڭ گيمنىمەن اشىلدى. – جاستار اراسىندا سالاۋاتتى ءومىر سالتىن ناسيحاتتاۋ ءۇشىن اۋداندىق اكىمدىكتىڭ باستاماسىمەن ءبىز پرەزيدەنتتىك سىناما تاپسىرۋ جارىسىن وتكىزىپ جاتىرمىز. سوندىقتان، بۇل باستامانى اۋداننىڭ بۇكىل جاستارى مەن تۇرعىندارى قولداپ، سالاۋاتتى ءومىر سالتىن، سپورتپەن شۇعىلدانۋدى ءار ۋاقىتتا الدىمىزعا ماقسات ەتىپ قويۋىمىز كەرەك. ياعني، ەلباسى نۇرسۇلتان نازاربايەۆتىڭ «ماڭگىلىك ەل» يدەياسىن جۇزەگە اسىرۋ ءۇشىن دەنساۋلىعى مىقتى، جوعارى ءبىلىمدى جاستار قاجەت.

بۇگىنگى ىرىكتەۋ جارىسىندا توپ جارعان جەڭىمپازدار اراسىنان وبلىستىق كەزەڭگە باراتىن اۋدان قۇراماسىن جاساقتايتىن بولامىز – دەيدى اۋدان اكىمدىگى دەنە شىنىقتىرۋ جانە سپورت ءبولىمىنىڭ باس مامانى ساعىنبەك جۇنىسبەكوۆ. پرەزيدەنتتىك سىنامادا 18 اۋىلدىق وكرۋگتەن كەلگەن ەكى جۇزدەن استام اۋدان تۇرعىندارى مەن جاستارى بەس ءتۇرلى سىناق تاپسىردى. ءبىرىنشىسى ءبىر ورىنعا سەكىرۋ، قىسقا قاشىقتىققا (30، 60، 100 مەترگە) جانە توزىمدىلىككە (500، 1000 مەترگە) جۇگىرۋ، كۇش گيمناستيكاسى (شالقالاپ جاتىپ دەنەنى كوتەرۋ، بيىك كەرمەگە تارتىلۋ)، گراناتا (300، 500، 700 گرامم) مەن دوپ لاقتىرۋدان (150 گرامم) ءوز ونەرلەرىن كورسەتتى. 9 جاس پەن 70 جاس ارالىعىندا، ون ءبىر جاس ەرەكشەلىگى بويىنشا وتكەن اۋداندىق چەمپيوناتتا ايەلدەر (قىزدار) مەن ەرلەر (ۇلدار) بولەك-بولەك سىنامالاردان ءوتتى. جارىس قورىتىندىسىندا 9-10 جاس ارالىعىندا ج.تاكىموۆا، بەكنۇر ءسالىمجان، 11-13 جاس بويىنشا ۆەنەرا قۇدايبەرگەنوۆا مەن اسقار بەكارىس، 14-15 جاس ەرەكشەلىگى بويىنشا ايشا مۇحامەدجان، الىشەر تاشقاربايەۆ، 16-17 جاس ارالىعىندا نۇراي قايىرجان قىزى، تورە نۇربەك توپ جاردى. ال، 18-23 جاستا ب.ريەۆشەنوۆا، ا.الپىسبايەۆ، 24-31 جاستا ي.بايماحانوۆا، ا.سەپتەسىن، 32-39 جاستا ا.احاتوۆ پەن س.تۋرسىنبەكوۆا، 40-49 جاستا

ق.قۇلماحانبەتوۆ، د.بەكبوسىن، 50-59 جاس اراسىندا ا.تۇراپبايەۆ، ل.سادىقوۆا جەڭىمپاز اتاندى. جوعارىداعى سپورت تۇرلەرىنەن جەڭىمپاز اتانعان سپورتشىلاردان وبلىستىق ىرىكتەۋ جارىستارىنا اۋدان قۇراماسى جاساقتالدى.