1- قازان. بۇگىن  بولات ءمۇرسالىم قىرىققا تولدى.

بىرەۋلەر بار، ىستەگەنىن جاريا قىلادى. سونى جانى سۇيەدى. بۇكىل بىلگەنىن الەۋمەتتىك جەلىگە جاريالايدى. قايدا بارعانىن سالادى. حالىق  ءۇشىن جۇمىس ىستەپ جۇرگەندەي ءوزىن ءجيى كورسەتەدى.

ال ءبىراق ۇلت ءۇشىن ۇتىمدى جۇمىس ىستەۋدىڭ ءجونى بولەك. بولات ءمۇرسالىم وسىنداي ازامات. ول وتىزىندا وردا بۇزىپ، قىرىق جاسىنا قايراتتانىپ كەلدى. قازاققا قىزمەت قىلدى. كوركەم مىنەزبەن كەلدى. اقتاڭداقتى اقتاردى. «الاشوردانىڭ» ابىرويىن اسىردى. اقيقاتتى ايتتى. الاش يدەياسىمەن قارۋلانعان ادام ءوزىنىڭ شىن قازاق  ەكەنىن وزگەگە ءۇنسىز عانا مويىنداتادى. تاريحتى قۇنىعا زەرتتەگەن ادام، ونى باعالاعان ادام عانا ۇلتىن سۇيەدى.

بولات ءمۇرسالىم قىرىق جاسىنا دەيىن قارقىندى جۇمىس ىستەدى. حالىقتىڭ كوكىرەك كوزىن اشىپ، كۇنى ء-تۇنى «كۇلتوبەدە» ءجۇردى. كورەرمەنگە «مەزگىلدىڭ» ءمانىن ۇقتىردى. بۇگىن دە  «ءسوزدىڭ شىنى كەرەك» دەپ جۇگىرىپ ءجۇر.

ول – جۋرناليست، ول – ادەبيەتتانۋشى. ول – الاش زەرتتەۋشىسى. بولات ءمۇرسالىم – ادەبيەتتە جاقسى ەسىم كورسە، قۋانىپ تىلەكتەستىگىن ءبىلدىرىپ وتىراتىن  قامقورشى اعا. ول ءسوز ونەرىنە سەرگەك قارايتىن اتپال ازامات.  

ول ينتەرنەتتى اقتاردى، كونە جازبالاردى قوپاردى. الاش قايراتكەرلەرىنىڭ فوتولارىن ىزدەدى. جيناقتادى. رەسەي مۇراعاتتارىن كەزدى. ءاليحان بوكەيحاننىڭ دۋماعا دەپۋتات بولعان كەزدەگى ەسكى فوتوسىن تاپتى. الاش تۇلعالارىنىڭ اتىلار الدىنداعى جۇرەك اۋىرتار سۋرەتتەرىن كوردى. ونى جۇرتشىلىققا جاريا قىلدى. مۇنى تاريحىن، ۇلتىن ءسۇيىپ جانى اۋىرعان، جاناشىر ادام  عانا ىستەي الادى.

بولات ءمۇرسالىمدى تانىعىڭ كەلسە، ونىمەن تەك اڭگىمەلەسۋ كەرەك. «قازاعىم»  دەپ، قىرىققا كەلگەن ازامات ءالى دە ۇلت ءۇشىن ۇتىمدى جۇمىس جاساي بەرەدى. سەنەمىز...