جامبىل وبلىسى، بايزاق اۋداندىق ەمحانادا پرەزيدەنت جولداۋى جاڭا فورماتتا تالقىلاندى. 635 پارتيا مۇشەسى بار «دانا» باستاۋىش پارتيا ۇيىمى پارتيالاستارمەن پىكىر الماسىپ، ەركىن فورماتتا جيىن ۇيىمداستىردى دەپ جازادى Qamshy.kz اقپارات اگەنتتىگى.

جيىنعا “Nur Otan” پارتياسى اۋداندىق فيليالى ءتوراعاسىنىڭ ءبىرىنشى ورىنباسارى شولپان بايتاقوۆا، “Nur Otan” پارتياسى اۋداندىق فيليالى ساياسي كەڭەسىنىڭ جانە اۋداندىق ءماسليحاتتاعى دەپۋتاتتىق فراكسياسىنىڭ مۇشەسى رىسكەلدى ساپاربەكوۆ پەن باستاۋىش ۇيىم مۇشەلەرى قاتىستى. كۇن ءتارتىبى مەن جۇمىس رەگلامەنتى بەكىتىلگەن سوڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى پرەزيدەنت جولداۋىنا بايلانىستى “دانا” باستاۋىش پارتيا ۇيىمىنىڭ ءتورايىمى گۇلنار مامىربايەۆا بايانداما جاسادى. بايانداماشى ءوز سوزىندە مەملەكەت باسشىسىنىڭ جولداۋىندا كورسەتىلگەن “كوشباسشىمىز جانە پارتيا ءتوراعاسى نۇرسۇلتان ءابىش ۇلى نازاربايەۆتىڭ ارقاسىندا «Nur Otan» پارتياسى ەلىمىزدىڭ جەتەكشى ساياسي ۇيىمىنا جۇكتەلەتىن كۇردەلى ءارى جاۋاپتى مىندەتتەردى دايەكتى تۇردە ىسكە اسىرىپ كەلەدى. قوعامدى تولعاندىرىپ وتىرعان نەگىزگى ماسەلەلەر كوشەدە ەمەس، پارلامەنتتە جانە ازاماتتىق ديالوگ اياسىندا تالقىلانىپ، شەشىمىن تابۋى ءتيىس” – دەگەن مىندەتتەرىنە توقتالا كەلە، مەديسينالىق قىزمەت كورسەتۋدىڭ ساپاسى مەن قولجەتىمدىلىگىن قامتاماسىز ەتۋ باعىتىنا نازار اۋداردى. جولداۋدا پرەزيدەنت حالىقتىڭ دەنساۋلىعىنا بايلانىستى، اسىرەسە، انا مەن ءسابي ولىمىنە قاتىستى كورسەتكىشتەردىڭ وڭىرلىك تەڭگەرىمسىزدىگى ايقىن كورىنەتىنىن، دەگەنمەن، بۇل كورسەتكىش دامىعان ەلدەردىڭ دەڭگەيىنەن ايتارلىقتاي كوپتىگىن ايتتى.

گۇلنار سەرىك قىزى جولداۋداعى مەملەكەت باسشىسىنىڭ: “ۇكىمەت ءار ءوڭىر بويىنشا مەديسيناداعى ناقتى دەرتتەر توپتاماسى جونىندە باسىمدىقتار ءتىزىمىن جاساپ، سونىڭ نەگىزىندە بيۋدجەتتەن قارجى ءبولۋى قاجەت. 2020 جىلعى 1 قاڭتاردان باستاپ قازاقستاندا مىندەتتى الەۋمەتتىك مەديسينالىق ساقتاندىرۋ جۇيەسى ىسكە قوسىلادى. ءارقايسىسىڭىزعا مىنا نارسەنى ايتقىم كەلەدى: مەملەكەت تەگىن مەديسينالىق كومەكتىڭ كەپىلدەندىرىلگەن كولەمىن ساقتايدى. ونى قارجىلاندىرۋعا الداعى ءۇش جىل ىشىندە 2،8 تريلليوننان استام تەڭگە بولىنەدى. مىندەتتى الەۋمەتتىك مەديسينالىق ساقتاندىرۋدىڭ جۇزەگە اسىرىلۋى مەديسينالىق قىزمەت كورسەتۋدىڭ ساپاسى مەن قولجەتىمدىلىگىن جاقسارتۋعا باعىتتالعان. ءۇشجىلدىق بيۋدجەت اياسىندا دەنساۋلىق ساقتاۋ جۇيەسىن دامىتۋعا قوسىمشا 2،3 تريلليوننان استام تەڭگە بولىنەدى. ۇكىمەت الەۋمەتتىك مەديسينالىق ساقتاندىرۋ جۇيەسىنىڭ بەدەلىنە تاعى دا نۇقسان كەلتىرمەۋ ءۇشىن ونى جۇزەگە اسىرۋ ماسەلەسىنە زور جاۋاپكەرشىلىكپەن قاراۋى قاجەت” – دەگەن تاپسىرماسى بويىنشا اتقارىلار مىندەتتەرگە توقتالدى. اتاپ ايتار بولساق، اعىمداعى جىلدىڭ جەتى ايى قورىتىندىسىندا اۋدان تۇرعىندارىنىڭ دەنساۋلىق كورسەتكىشتەرى بويىنشا جالپى ءولىم دەڭگەيى 2،1-دەن 1،9-عا تومەندەسە، سوڭعى بەس جىلدا انا ءولىمى تىركەلمەگەن. ال، سابيلەر ءولىمىنىڭ كورسەتكىشى 8،6-دان 6،7-گە تومەندەپتى. سونىمەن بىرگە، سوڭعى ءۇش جىلدا مىندەتتى الەۋمەتتىك مەديسينالىق ساقتاندىرۋ جۇيەسىن اۋدان تۇرعىندارىنا ءتۇسىندىرۋ جۇمىستارى بەلسەندى تۇردە جۇرگىزىلگەن. وسى

جىلدىڭ وزىندە تۇرعىندارمەن 14 كەزدەسۋ ۇيىمداستىرىلىپ، اتالمىش كەزدەسۋلەرگە 36 275 ادام قامتىلعان. اۋدان اۋماعىنا 3 دانا بيلبورد، 24 باننەر، 2 ستەند جانە اۋداندىق اۋرۋحانا سايتىنا 130 ماتەريال ورنالاستىرىلعان. بۇدان بولەك، اۋدان تۇرعىندارىنا 35 مىڭنان استام بۋكلەتتەر مەن پاراقشا، جادنامالار تاراتىلىپ، جەرگىلىكتى باسىلىمعا 17 ماقالا جاريالانعان. باياندامادان سوڭ “دانا” باستاۋىش پارتيا ۇيىمى ءتورايىمىنىڭ ورىنباسارى، بيۋرو مۇشەسى ساۋلە بولتىرىكوۆا جارىسسوزگە شىعىپ، جولداۋدان تۋىندايتىن مىندەتتەر تۇرعىسىندا ءسوز قوزعادى. ءداستۇرلى جينالىس تۇرىندە ەمەس، پىكىر الماسىپ، ەركىن فورماتقا ىڭعايلستىرىلعان جيىندا وعان قاتىسۋشىلار بەلسەندىلىگىن بايقاتتى. ماڭىزدى قۇجاتتىڭ باسىمدىقتارى مەن مىندەتتەرى تۋرالى جان-جاقتى وي ءبولىستى. ءبىرقاتار ماسەلەلەردىڭ جۇزەگە اسىرىلۋ جايىندا ۇسىنىس-تىلەكتەر تالقى تارازىسىنا سالىنىپ، باستاۋىش ۇيىم مۇشەلەرى ءبىراۋىزدان شەشىم قابىلدادى