قازاننىڭ 1ء-ى كۇنى جۇڭگو كوممۋنيستىك پارتيانىڭ  70 جىلدىعىن پەكيندە شەرۋلەتىپ جاتقان كەزدە، قىتايعا جارتىلاي باعىناتىن گونكونگ حالقى نارازىلىق ءبىلدىرىپ، پوليسيامەن قاقتىعىسقا ءتۇسۋىن جالعاستىرۋدا.  

 حالىقتىڭ نارازىلىق اكسياسى ءۇش ايدان استام ۋاقىتقا سوزىلعان. اكسياعا سەبەپ بولعان جاعدايدىڭ ءبىرى تۇتقىنداردى قىتايعا ەكستراديسيالاۋ تۋرالى زاڭ جوباسىنا قارسىلىق.

الەمنىڭ 24 ەلىندە، 65 قالادا گونكونگتەگى نارازى توپتى قولداۋ اكسياسى بولىپ ءوتتى. ەلىمىزدىڭ نۇر-سۇلتان، الماتى قالالارى دا 29 قىركۇيەك كۇنى 50-گە جۋىق ادام نارازىلىق شاراسىن وتكىزدى.

بۇگىننىڭ وزىندە گونكونگتاعى نارازىلىق باسىلار ەمەس. بەلسەندىلەر سنارياد، بەنزيندى بومبامەن قارۋلانىپ، گونكونگتىڭ بىرنەشە اۋداندارىندا پوليسيامەن قاقتىعىسىپ جاتىر دەپ حابارلايدى BBC News  اقپاراتتىق اگەنتتىگى.

پوليسيا 269 ادامدى قاماۋعا الىپ، 100-دەن استامى اۋرۋحاناعا جەتكىزىلدى. سەيسەنبى كۇنگى ورىن العان قاقتىعىس كەزىندە پوليسيا 900 رەزەڭكە وق پەن 1400 كوزدەن جاس اعىزاتىن گاز وعىن شىعارعان.

جەكسەنبى كۇنگى بولعان قارسىلىق كەزىندە يندونەزيالىق «سۋارا» گازەتىنىڭ جۋرناليستىنە رەزەڭكە وعى 12 مەتر قاشىقتىقتا كوزىنە تيگەن. ءجۋرناليستتىڭ ادۆوكاتى مايكل ۆيدلەردىڭ ايتۋىنشا: «ول اۋرۋحاناعا جەتكىزىلدى. دارىگەرلەر ونىڭ ماڭگىلىككە كورۋ مۇمكىندىگىنەن ايىرىلعانىن مالىمدەدى.»