«جىبەك جولىنداعى سۇحباتتار» جوباسى ورتالىق ازيا ايماعى ەلدەرىنىڭ قاتىسۋىمەن جىل سايىن وتكىزىلەتىن ءداستۇرلى شارا. ۇلى جىبەك جولىن الەمدىك تاريحتاعى ادامزاتتىڭ ەڭ جارقىن جانە ماڭىزدى جەتىستىكتەرىنىڭ ءبىرى دەپ اتاۋعا بولادى. بۇل - كوپتەگەن بىرەگەي قالالاردىڭ، تاريحي ەسكەرتكىشتەردىڭ، ادەت-عۇرىپتاردىڭ جانە ءتىپتى مەملەكەتتەردىڭ پايدا بولۋىنا سەبەپ بولعان شىعىس پەن باتىستى بىرىكتىرگەن وراسان زور ساۋدا باعىتى. بۇل تەڭىزدەن تەڭىزگە دەيىنگى جول عانا ەمەس، حالىقتاردى بەيبىتشىلىك پەن ىنتىماقتاستىققا شاقىرعان كۇردەلى مادەني-ەكونوميكالىق كوپىر بولدى دەپ جازادى Qamshy.kz اقپارات اگەنتتىگى. جوبا جالپى 2005 جىلى جانداندى. جوبانىڭ جەتەكشىسى بەلگىلى قازاقستاندىق عالىم، مادەنيەتتانۋشى جانە قوعام قايراتكەرى مۇرات اۋەزوۆ. وسى ورايدا، بۇگىن جامبىل وبلىسى تاراز قالاسىنىڭ دوستىق ۇيىندە قازاقستان حالقى اسسامبلەياسى مەن ق ر پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسىنىڭ ۇيىمداستىرۋىمەن «جىبەك جولى بويىنداعى سۇحبات - 2019» حالىقارالىق مادەنيەتتانۋ جوباسى اياسىندا «جاڭعىرۋ. ورتا ازيا حالىقتارىنىڭ تاريحي جانە زاماناۋي تاعىلىمى» تاقىرىبىندا ءىرى ءىس-شارا بولىپ ءوتتى.
شارانىڭ ۇيىمداستىرۋشىلارى قازاقستان حالقى اسسامبلەياسى، ق ر پرەزيدەنتى جانىنداعى «قوعامدىق كەلىسىم» رەسپۋبليكالىق مەملەكەتتىك مەكەمەسى بولسا، سەرىكتەستەرى - جامبىل وبلىسى اكىمدىگى، تاراز قالاسى اكىمدىگى، ق ر ۇلتتىق كىتاپحاناسى جانىنداعى م.و. اۋەزوۆ عىلىمي كابينەتى.
ءداستۇرلى قاتىسۋشىلار - قازاقستان رەسپۋبليكاسىنىڭ بەلگىلى جازۋشىلارى، عىلىمي قايراتكەرلەرى، حالىقارالىق ساراپشىلارى - رەسەي، قىرعىزستان، وزبەكستان، تاجىكستان، تاجىكستان، تۇرىكمەنستان ەلدەرىنىڭ جەتەكشى عالىمدارى، قحا عىلىمي-ساراپتامالىق كەڭەسىنىڭ مۇشەلەرى، ەتنومادەني بىرلەستىكتەر مەن قحا كافەدراسىنىڭ مۇشەلەرى.
قوناقتاردى سالتاناتتى قابىلداۋ ءراسىمى جامبىل وبلىسى قازاقستان حالقى اسسامبلەياسى مەن جامبىل وبلىسى اكىمى اپپاراتىنىڭ «قوعامدىق كەلىسىم» كمم وكىلدەرىنىڭ قۇتتىقتاۋى جانە قوناقجايلىلىعىنان باستالدى. تاراز قالاسىنىڭ ءاربىر ەتنوسىنىڭ جاستارى كونفەرەنسياعا قاتىسۋشى شەتەلدىك جانە وتاندىق قوناقتاردى قىزىلدى-جاسىلدى جارقىن ءتۇستى ۇلتتىق اسەم كيىمدەرىمەن تاڭ قالدىردى. سونداي-اق، ءسان-سالتاناتى كەلىسكەن ۇلتتىق كيىمدەگى ارۋلار فورۋمعا قاتىسۋشىلارعا قازاق ۇلتتىق تاعامدارى: قۇرت، سۇزبە، ىرىمشىك، جەنت جانە باۋىرساق تاعامدارىن ۇسىنسا، قوناقتاردى وبلىستىق فيلارمونيانىڭ «الاتاۋ» فولكلورلىق ءانسامبلى اۋەزدى اسەم سازدى كۇيىمەن قارسى الدى.
ءىس-شارانىڭ باستاۋى قازاقستان رەسپۋبليكاسى پرەزيدەنتى جانىنداعى «قوعامدىق كەلىسىم» رمم ديرەكتورى، تاريح عىلىمدارىنىڭ دوكتورى، پروفەسسور ءماجيتوۆ ساتتار فازىل ۇلى جانە جامبىل وبلىسى اكىمىنىڭ ورىنباسارى قۇرمانبەكوۆا سۇلۋشاش ساتبەك قىزىنىڭ قۇتتىقتاۋ سوزدەرىمەن اشىلدى.
«سۇحبات - 2019» اياسىندا ۇلى جىبەك جولى ەلدەرىنىڭ جاس اۆتورلارى اراسىنداعى حالىقارالىق ALQA ادەبي بايقاۋىنىڭ تۇساۋكەسەرى ءوتتى. سونىمەن بىرگە كونفەرەنسياعا قاتىسۋشىلار مەن قوناقتار تاراز قالاسىنىڭ تاريحي ەسكەرتكىشتەرىمەن تانىسىپ، ۇلتتىق قولونەر، كىتاپ كورمەلەرىن، سونداي-اق «جىبەك جولى بويىنداعى سۇحبات» جوباسى جايلى تۇسىرىلگەن دەرەكتى ءفيلمدى (رەجيسسەر - ە.سوي) تاماشالادى.
پىكىر قالدىرۋ