جامبىل وبلىسىنىڭ كارتاسىندا جالپاعىنان جاتقان مويىنقۇم اۋدانى بيىل تىڭ تىرلىكتى تۇلەتكەنىن ەل جاقسى بىلەدى. اۋدان اكىمى مادەن مۇسايەۆتىڭ تىكەلەي باستاماسىمەن ەلدى مەكەندە جۇگەرى شارۋاشىلىعى قولعا الىنىپ، ەلدىڭ ەڭسەسى تىكتەلۋدە. مىنە وسى دالا قازىناسى وراق ءتۇسىپ، تۇرعىندار جيىن-تەرىنگەن كىرىسىپ كەتتى، دەپ جازادى Qamshy.kz اقپارات اگەنتتىگى. 

حالىقتى ازىق-تۇلىك جانە ونەركاسىپتى شيكىزاتتىڭ تۇرلەرىمەن قامتاماسىز ەتۋىمەن ەرەكشەلەنەتىن ماڭىزدى سالانىڭ ءبىرى –اۋىلشارۋاشىلىعى سالاسى. اسىرەسە، قارا جەردەن ءوز نەسىبەسىن تاۋىپ جۇرگەن شارۋالاردىڭ ەڭبەگى ەرەكشە. اۋداندا «دالا ارۋى» اتانعان جۇگەرى داقىلىنا وراق سالىنىپ، شارۋالار بىتىك شىققان جۇگەرىنى جيناۋ ناۋقانىن باستاپ كەتتى.

ء-بىزدىڭ «بايباراق-اگرو» دەپ اتالاتىن كووپەراتيۆىمىزدىڭ 100 گەكتاردان استام جەرى بار. ءقازىر سونىڭ 30 گەكتارىنا جۇگەرى ەگىپ، ەندى سوعان وراق سالىپ جاتىرمىز. باقشا دا ەككەن بولاتىنبىز. باقشا ونىمىمەن اۋىل تۇرعىندارىن قامتاماسىز ەتتىك. ونىمدىلىگىنە كەلەتىن بولساق جۇگەرى بىتىك شىقتى، 120 سەنتنەردىڭ ءار گەكتاردان 12 توننادان ءونىم الىپ وتىرمىز، – دەيدى «بايباراق — اگرو» كووپەراتيۆىنىڭ ءتوراعاسى المابەك ءابدىحالىقوۆ.

بيىل بىرلىك اۋىلدىق وكرۋگى بويىنشا ەگىستىك اۋماعى 1546 گەكتار بولسا، سونىڭ 425 گەكتار جەرىنە جۇگەرى داقىلى ەگىلدى. سونداي-اق، اۋىلدىق وكرۋگتەن شابىلعان جۇگەرىنى جيناۋ ءۇشىن ارنايى قىرمان مەن تەحنيكالاردى ساقتاۋعا ارنالعان متس سوعىلدى.

– اۋدان بويىنشا 5074 گەكتار سۋارمالى جەردى يگەرىپ، ال ونىڭ 1165 گەكتار القابىنا داندىك جۇگەرى ەگىلگەن بولاتىن. وسى داندىك جۇگەرىنى جيناۋ ءۇشىن شارۋالارمەن كەلىسە وتىرىپ «حەرسونەس-9» اتتى كومبايىننىڭ 3-ەۋىن الدىق. ءقازىر بىرەۋى كەڭەس اۋىلىندا، ال ەكەۋى بىرلىك اۋىلىنىڭ شارۋا قوجالىقتارىنىڭ جۇگەرىسىن شاۋىپ جاتىر. اۋدان بويىنشا نەگىزىنەن جۇگەرى، تارىعا وراق سالىنىپ جاتسا، ال باقشا، كوكونىس ونىمدەرىن جينالىپ، ءبىتىپ قالدى. قازىرگى تاڭدا جۇگەرىنىڭ 70 گەكتارى ورىلسا، ءتۇسىم ءار گەكتاردان 12 توننادان اينالىپ وتىر. ەندىگى مىندەت جينالعان ءونىمدى يگىلىككە جاراتۋ، – دەيدى اۋداندىق اۋىلشارۋاشىلىعى ءبولىمىنىڭ باسشىسى قىزىر ەلەۋسىزوۆ.

اراعا جيىرما جىلدان استام ۋاقىت سالىپ، بيىل عانا قايتادان قولعا الىنعان داندىك جۇگەرىنى اۋدان شارۋالارى، كەلەر جىلى كوپتەپ ەگىپ، القاپتارىن كەڭەيتۋدى كوزدەپ وتىر. ەندەشە شارۋالاردىڭ الا جازداي توككەن تەرى تەككە كەتپەي ەڭبەكتەرى جەمىستى بولسىن دەمەكپىز.