ەلباسى-تۇڭعىش پرەزيدەنتتىڭ باستاماسىمەن وزگەرىس ەنگىزىلگەن الەۋمەتتىك كومەكتىڭ جاڭا ءتۇرى كوپ بالالى وتباسىلاردىڭ تابىسىن ەسەلەۋگە مول مۇمكىندىك بەردى. بۇل ورايدا جامبىلدىقتار اتاۋلى الەۋمەتتىك كومەكتىڭ شاراپاتىن ايقىن سەزىنۋدە. جامبىلدىق كوپ بالالى انالارعا اتاۋلى الەۋمەتتىك كومەك تاعايىنداۋعا 21،5 ميللياردا تەڭگە قاراستىرىلعان، دەپ جازادى Qamshy.kz اقپارات اگەنتتىگى.
اعىمداعى جىلدىڭ 9 ايىندا الەۋمەتتىك كومەك 35،5 مىڭ وتباسىنا تاعايىندالدى. سايكەسىنشە 179،5 مىڭ جامبىلدىق جاڭا فورماتتاعى الەۋمەتتىك كومەكتى كادەسىنە جاراتتى. ەلباسى باستاماسى ەلدەگى كەدەيشىگى شەگى 50 پايىزدان 70 پايىزعا دەيىن كوتەرىلۋى اتاۋلى الەۋمەتتىك كومەكتىڭ ورتاشا مولشەرىن 2،5 ەسەگە وسىرۋگە جول اشتى. ماسەلەن جامبىل وبلىسىندا 2019 جىلدىڭ 1 توقسانىندا اتاۋلى الەۋمەتتىك كومەكتىڭ ورتاشا مولشەرى 5246 تەڭگە بولسا، قازان ايىندا بۇل كورسەتكىش 12935 تەڭگەگە دەيىن ءوستى.
–اعىمداعى جىلى بيۋدجەتتەن وبلىستاعى اتاۋلى الەۋمەتتىك كومەكتى الۋشىلارعا ءتيىستى تولەم جاساۋعا 21 ميلليارد 600 ميلليون تەڭگە قاراستىرىلدى. جىل باسىنان بەرگى 9 اي ىشىندەگى بۇل سومانىڭ 67 پايىزى نەمەسە 14 ميلليارد 500 ميلليون تەڭگەسى ماقساتتى يگەرىلدى. جامبىلدىقتارعا اتاۋلى الەۋمەتتىك كومەك تاعايىنداۋعا بولىنگەن قارجىنىڭ 20 ميلليارد تەڭگەسى رەسپۋبليكالىق بيۋدجەتتەن بولىنسە قالعان 1 ميلليارد 600 ميلليون تەڭگە جەرگىلىكتى بيۋدجەتتەن قاراستىرىلعان.
نەگىزىنەن اتاۋلى الەۋمەتتىك كومەك تاعايىندالعان 17 مىڭ وتباسى كوپ بالالى جانۇياعا جاتادى. ولارعا شامامەن 8 ميلليارد 400 ميلليون تەڭگە كولەمىندە اتاۋلى الەۋمەتتىك كومەك تولەندى. جاقىندا عانا ەڭبەك جانە حالىقتىق الەۋمەتتىك قورعاۋ مينيسترلىگى بارشا كوپ بالالى انالارعا وتباسىلىق ورتاشا تابىستى ەسەپكە الماستان جاڭا اتاۋلى الەۋمەتتىك كومەك تاعايىنداۋدىڭ ءتيىمتى تەتىكتەرىن ۇسىندى. ۇكىمەت وتىرىسىندا قارالعان بۇل جوبا بويىنشا كەلەر جىلدان باستاپ بارلىق كوپ بالالى انالارعا بالا سانىنا قاراي اي سايىن 42500 تەڭگەدەن 73 375 تەڭگەگە دەيىن تولەم الادى. باستىسى كومەكتىڭ بۇل ءتۇرىن الۋشىلاردىڭ وتباسىندا 4 جانە ودان دا كوپ كامەلەت جاسىنا تولماعان نەمەسە ارناۋلى ورتا، جوعارى وقۋ ورىندارىندا ءبىلىم الىپ جاتقان جاسى 23-كە تولماعان بالالارى بولۋى كەرەك،–دەيدى وبلىس اكىمدىگىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى تيمۋرجان نۇرىمبەتوۆ.
پىكىر قالدىرۋ