جامبىل وبلىسىندا مەكەمە باسشىلارى كەڭ جۇمىس كابينەتتەرىن شاعىن كولەمدەگى بولمەلەرگە اۋىستىرىپ جاتىر. حالىققا قولجەتىمدى بولا ءتۇسۋ ءۇشىن ءوز كەڭسەسىنىڭ ءبىرىنشى قاباتىنا قونىس اۋدارعان باسشىلار دا تابىلادى. ەسەسىنە ولاردان بوساعان كابينەتتەر وزگەدە ءتيىمدى ماقساتتارعا پايدالانۋدا. بۇل جۇمىستار «جامبىل ادالدىق الاڭى» جوبا اياسىندا جۇزەگە اسىرىلۋدا، دەپ جازادى Qamshy.kz اقپارات اگەنتتىگى. 

جوبالىق وفيس قىزمەتكەرلەرىمەن ەڭ اۋەلى وبلىستاعى 440 مەكتەپكە زەردەلەۋ جۇمىستارى جۇرگىزىلدى. سونداي-اق بۇل باعىتتاعى جۇمىستار جەرگىلىكتى اتقارۋشى ورگانداردىڭ 353 باسشىسىنىڭ كابينەتىن قامتىدى.

–مەكتەپ باسشىلارىنىڭ كابينەتتەرىن ءبىلىم ورداسىنىڭ ءبىرىنشى قاباتىنا جانە اۋدانى ۇلكەن ەمەس بولمەلەرگە الماستىرىلدى. ماسەلەن 35-50 شارشى مەتر ارالىقتاعى الاڭداردا جۇمىس جاساپ وتىرعان 74 مەكتەپ ديرەكتورىنىڭ كابينەتتەرى 11-20 شارشى مەترلىك بولمەلەرگە اۋىستىرىلدى. ناتيجەسىندە مەكتەپ عيماراتىنداعى 866 شارشى مەتر الاڭ بوساتىلدى. ال ول الاڭعا مەكتەپ وقۋشىلارىنا قاجەتتى روبوتوتەحنيكا، سۋرەت جانە اعىلشىن ءتىلى سىنىپتارى اشىلدى.

جەرگىلىكتى اتقارۋشى ورگان باسشىلارىنىڭ 353 كابينەتىنە جۇرگىزىلگەن مونيتورينگ كەزىندە ولاردىڭ 239 شارشى مەتر بولاتىن دەمالىس بولمەلەرى بار كابينەتتەرگە يەلىك ەتىپ وتىرعان انىقتالدى. سايكەسىنشە 17 مەملەكەتتىك ورگان باسشىسىنىڭ دەمالىس بولمەلەرىنىڭ پايدالانۋ ماقساتتارى وزگەرتىلدى. مۇندا ەندى اتالعان مەكەمەنىڭ مۇراعاتى، قويماسى ورنالاسپاق. حالىققا مەيلىنشە جاقىن بولۋى، ءارى ارىز-شاعىمدارىن الا كەلگەن تۇرعىندارعا وڭتايلى جاعداي جاساۋ ماقساتىندا وبلىستاعى 133 باسشىنىڭ كابينەتى 1-قاباتقا كوشىرىلدى، –دەيدى قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنت باسشىسىنىڭ ءبىرىنشى ورىنباسارى راۆيل تولەبايەۆ

«جامبىل ادالدىق الاڭى» جوباسىمەن جۇرگىزىلگەن تۇگەندەۋ جۇمىستارى كەزىندە بۇعان دەيىن كاسىپكەرلىك سۋبەكتىلەرگە تيەسىلى نىسانداردا جايعاسقان قورداي اۋدانى اكىمدىگىنىڭ جەر قاتىناستارى، دەنە شىنىقتىرۋ جانە سپورت، اۋىل شارۋاشىلىعى، ءوندىرىس جانە كاسىپكەرلىك بولىمدەرى، ق ر ەم اتومدىق جانە ەنەرگەتيكالىق قاداعالاۋ مەن باقىلاۋ كوميتەتىنىڭ جامبىل وبلىسى بويىنشا اۋماقتىق دەپارتامەنتى سىندى 5 مەملەكەتتىك ورگاننىڭ كەڭسەسى كوممۋنالدىق مەنشىكتەگى عيماراتقا ورنالاستىرىلدى. ءدال وسى جۇمىستىڭ ناتيجەسىندە اتالعان مەكەمەلەرمەن تولەنگەن جالداۋ اقىسى ەسەبىنەن 16 ميلليون تەڭگەدەن اسا مەملەكەت قارجىسى ۇنەمدەلدى.