تاراز قالاسىنىڭ اكىمى قايرات دوسايەۆ جاستار جىلى اياسىندا جامبىل پوليتەحنيكالىق جوعارى كوللەدجىنىڭ ستۋدەنتتەرىمەن كەزدەستى. ەركىن فورماتتا وتكىزىلگەن بۇل كەزدەسۋدە شاھار باسشىسى ستۋدەنتتەرمەن جاستار تاربيەسى، ماماندىق تاڭداۋ، ادال ەڭبەك ەتۋدەن باستاپ قالاداعى ستۋدەنتتەردىڭ جول ءجۇرۋ اقىسى، عىلىمي ىزدەنىسى، بيزنەس يدەيالارى سىندى سان ءتۇرلى ماسەلەلەرگە قاتىستى ويلارىن ورتاعا سالىپ، ولاردىڭ تالاپ-تىلەكتەرى مەن ۇسىنىسىنا قۇلاق ءتۇردى، دەپ جازادى Qamshy.kz اقپارات اگەنتتىگى. 

كەزدەسۋدى تاراز قالالىق جاستار رەسۋرستىق ورتالىعىنىڭ ديرەكتورى نۇرلان قاناتوۆ اشىپ جۇرگىزىپ وتىردى. كەلەر ساتتە ءسوز تىزگىنىن العان تاراز قالاسىنىڭ اكىمى بۇل كەزدەسۋدىڭ جاستاردىڭ جاي-كۇيىمەن تانىسىپ، ولاردىڭ ۇتىمدى ۇسىنىستارىن ءبىلۋ ماقساتىندا ۇيىمداستىرىلىپ وتىرعانىن جەتكىزدى. ىلە شالا ستۋدەنتتەر دە شاھار باسشىسىنا كوكەيلەرىندە جۇرگەن ساۋالدارىن قويىپ، تۇشىمدى جاۋاپ الدى. ماسەلەن جامبىل پوليتەحنيكالىق جوعارى كوللەدجىنىڭ 2 كۋرس ستۋدەنتى رامازان سلان قالا اكىمىنەن بالالارىنىڭ مەملەكەتتىك قىزمەتكە بارۋعا قاتىستى كوزقاراسىن سۇرادى.

–ءوزىم العاشقى ەڭبەك جولىن باستاپ، قىزمەتكە ارالاسقان ساتتەن مەملەكەتتىك قىزمەتكە اڭسارىم اۋدى. 1995 جىلدان بەرى مەملەكەتتىك قىزمەتتەن كەلە جاتىرمىن. ۇلدارىم جولىمدى جالعايمىن دەسە ەش قارسىلىق جوق. الايدا تۇڭعىشىم ا-دەگەننەن قالاۋى جەكە كاسىپكەرلىك ەكەنىن ايتتى، –دەدى قايرات اسكەربەك ۇلى.

كەزدەسۋگە جينالعان جاستارعا قاراتا ايتىلعان تاعى ءبىر سوزىندە تاراز قالاسىنىڭ اكىمى ولارعا كۇندەلىكتى سپورتپەن شۇعىلدانىپ، كوركەم ادەبيەت وقۋعا كەڭەس بەردى. ال ستۋدەنتتەردىڭ جول ءجۇرۋ بيلەتىنە قاتىستى ساۋالىنا جاۋاپ قاتقان قايرات اسكەربەك ۇلى بۇل ماسەلەنى رەتتەۋدىڭ ءارتۇرلى تەتىكتەرىنىڭ قاراستىرىلىپ جاتقانىن تىلگە تيەك ەتتى.

–راسىندا ستۋدەنتتەردىڭ جول ءجۇرۋ بيلەتى جۇيەسىن ەنگىزۋ وتە وزەكتى ماسەلە. ءارى بۇل قالاداعى جوعارى جانە ارناۋلى وقۋ ورىندارىندا وقيتىن 40 مىڭعا جۋىق ستۋدەنتكە ۇلكەن كومەك بولار ەدى. ءدال وسى ماسەلەگە قاتىستى شاھارداعى جولاۋشىلار تاسىمالىمەن اينالىساتىن 10 كومپانيا وكىلدەرىنىڭ باسىن قوستىم. الايدا ورتاق شەشىمگە كەلە الماي وتىرمىز. ولار بۇل ماسەلەنى جولاقىنىڭ باعاسىن كوتەرۋ ارقىلى شەشۋدى ۇسىندى. سونىڭ ەسەبىنەن ولار جولاۋشىلار تاسىمالداۋ ءىسىنىڭ ساپاسىن ارتتىرۋ، اۆتوپاركتەردى جاڭعىرتۋ، كاسىبي جۇرگىزۋشىلەردى قىزمەتكە تارتۋ مۇمكىن بولاتىندىعىن ايتادى. مەنىڭشە قالاداعى جولاۋشىلار تاسىمالى سالاسىن جەتىلدىرۋدىڭ جاڭا جۇيەسى قاجەت جانە سول جۇيەنى قالىپتاستىرۋ، قولدانىسقا ەنگىزۋ ارقىلى مۇنداعى وتكىر ماسەلەلەردىڭ شەشىمىن تابامىز،–دەدى ق.دوسايەۆ.

كەزدەسۋ سوڭىندا ستۋدەنتتەر شاھار جاستارىنىڭ ماسەلەسىنە قۇلاق ءتۇرىپ، ولاردىڭ ۇتىمدى ۇسىنىستارىمەن تىڭ يدەيالارىن جۇزەگە اسىرۋعا قولداۋ بىلدىرۋگە دايىن ەكەندىگىن جەتكىزگەن تاراز قالاسى اكىمىنە العىستارىن ءبىلدىرىپ، ونىمەن ەستەلىك سۋرەتكە ءتۇستى.