ت.رىسقۇلوۆ اۋدانىنداعى «شاۋشەن» شارۋا قوجالىعى ءوز جۇمىسشىلارىنىڭ جايىن ويلاپ، ولاردى باسپانامەن قامتۋ، بالالارىنىڭ مەكتەپكە دەيىنگى تاربيە ورىندارىندا تاربيەلەنۋى، مەكتەپتە ءبىلىم الۋ سىندى الەۋمەتتىك ماسەلەلەرىنىڭ شەشىمىن تاپقان بىردەن ءبىر اگروقۇرىلىم سانالادى، دەپ جازادى Qamshy.kz اقپارات اگەنتتىگى. 

شارۋا قوجالىققا قازاقستاننىڭ ەڭبەك ەرى سايرامباي دونەنبايەۆ جەتەكشىلىك ەتەدى. 22 جىل ىشىندە قويدىڭ باسىن 150، جەر كولەمىن 65 ەسەگە كوبەيتۋگە قول جەتكىزگەن قوجالىق يەسى وسىناۋ جەتىستىكتىڭ سىرىن جۇمىسشىلارىنىڭ الەۋمەتتىك جاعدايىن جاقcارتۋعا دەن قويۋىمەن تۇسىندىرەدى.

–شارۋا قوجالىقتى اشىپ، ءوز قىزمەتىمىزگە كىرىسكەن شاقتا بىزدە 200 گەكتار ەگىستىك جەر، 362 باس قوي جانە 15 جىلقى، 11 باس سيىرىمىز بولدى. مىنە ارادا 22 جىل وتكەن سوڭ ءبىز ۇساق مالدىڭ سانىن 56 مىڭعا، قامبار اتا تۇلىگىن 2300 باسقا جەتكىزە الدىق. سونداي-اق ەگىستىك جەر كولەمى 13 مىڭ گەكتارعا دەيىن ۇلعايدى.

ءبىز مال باسىن ارتتىرۋ، ونىڭ ونىمدەرىمەن ىشكى نارىق قاجەتتىلىگىن وتەۋمەن بىرگە جۇمىسشىلاردىڭ الەۋمەتتىك ماسەلەلەرىنىڭ دە شەشىمىن تابۋعا كوڭىل بولدىك. قۇرىلىس جۇمىستارىن قولعا الىپ مالشى، جۇمىسشىلاردىڭ بالالارىنا ارناپ 50 ورىندىق بالاباقشانى پايدالانۋعا بەردىك. بيىل شارۋاشىلىقتان 10 جىلدان كوپ ەڭبەك سىڭىرگەن 8 ازاماتقا زامان اعىمىنا ساي سان-ساۋلەتى جاراسقان ءۇي سالىپ الۋعا 15 ميلليون تەڭگەدەن بەرىپ وتىرمىن، –دەيدى سايرامباي دونەنبايەۆ.

ايتا كەتۋ كەرەك بۇگىندە تۇتاس ت.رىسقۇلوۆ اۋدانىمەن بىرگە وبلىستىڭ اگروسالاداعى ايتۋلى كاسىپورنىنا اينالعان «شاۋشەن» شارۋا قوجالىعىنا 2005 جىلى ەلباسى نۇرسۇلتان نازاربايەۆتىڭ ءوزى ارنايى ات باسىن بۇرىپ، ونداعى جۇمىستىڭ بارىسىمەن تانىسقان-دى. سول ساتتە ەلباسى سايرامباي دونەنبايەۆقا جيعان بايلىقتى ەلدىڭ يگىلىگىنە جۇمساۋعا شاقىردى. مىنە سودان بەرگى ارالىقتا «شاۋشەن» شارۋا قوجالىعىمەن بۇل ايماقتا ءبىرقاتار ايتۋلى ىستەر قولعا الىندى. اۋىل تۇرعىندارىنىڭ يگىلىگىنە 300 ورىندىق اسحانا پايدالانۋعا بەرىلدى. تۇرعىن ءۇي كەشەندەرى مەن ءزاۋلىم مەشىت، مەدرەسە قۇرىلىسىن دا سايرانباي ءالىق ۇلى ءوزى قارجىسىنا جۇرگىزدى. ال 2017 جىل ايماقتا «تاۋ-قىمىز» ەمدەۋ-ساۋىقتىرۋ ورتالىعىن پايدالانۋعا بەردى.

وسىناۋ يگىلىكتى ءىستىڭ باسى قاسىندا جۇرگەن سايرامباي دونەنبايەۆ 2003 جىلى «ەرەن ەڭبەگى ءۇشىن» مەدالى مەن ال 2012 جىلى «قۇرمەت» وردەنىمەن ماراپاتتالدى. وتكەن جىلى ول ەلىمىزدەگى ەڭ جوعارى مەملەكەتتىك ناگرادا سانالاتىن «قازاقستاننىڭ ەڭبەك ەرى» اتاعىن يەلەندى.