جامبىل وبلىسىندا سۋارمالى ەگىستىك القابىن ۇلعايتۋ ماقساتىندا مەحانيكالىق وتريادتىڭ مۇمكىندىگى كەڭىنەن پايدالانۋدا. كۇنى بۇگىنگە دەيىن مەحانيكالىق وترياد كومەگىمەن وبلىس اۋماعىنداعى جالپى ۇزىندىعى 41،6 شاقىرىمدى قۇرايتىن 7 كانال مەن 3 سۋ قويماسىنا مەحانيكالىق تازالاۋ جۇمىستارى جۇرگىزىلدى. سايكەسىنشە بۇل سۋ جۇيەلەرىنىڭ كومەگىمەن وڭىردەگى سۋارمالى جەر كولەمىن 1404 گەكتارعا ۇلعايدى، دەپ جازادى Qamshy.kz اقپارات اگەنتتىگى. 

وبلىس كولەمىندەگى سۋ تاسقىنىنىڭ الدىن الۋ، اۋىل شارۋاشىلىعى القاپتارىنداعى سۋ جۇيەلەرى مەن كانالداردى تازارتۋ جانە قالپىنا كەلتىرۋ جۇمىستارىن تۇراقتى جۇرگىزۋ كىرەتىن كاسىپورىننىڭ ماتەريالدىق-تەحنيكالىق بازاسىن قالىپتاستىرۋعا وبلىس بيۋدجەتىنەن 693 ميلليون 600 مىڭ تەڭگە بولىنگەن. اتالعان قارجىعا 46 دانا تەحنيكا ساتىپ الىندى.

–بۇگىنگى كۇنگە دەيىن مەحانيكالىق جاساق بايزاق، جامبىل، مويىنقۇم اۋداندارىنداعى گيدروقۇرىلىمداردىڭ تەحنيكالىق جاعدايىن نىعايۋتۋعا كۇش سالدى. سونداي-اق جەكە شارۋا قوجالىقتارىمەن كەلىسىم-شارت جاساسۋ ارقىلى جالپى سوماسى 14 ميلليون 753 مىڭ 741 تەڭگەنى قۇرايتىن جۇمىس جۇرگىزىلدى، –دەيدى «تالاس اسا» cۋ شارۋاشىلىعى كاسىپورنىنىڭ ديرەكتورىنىڭ ورىنباسارى باۋىرجان يبراگيموۆ.

بيىل بۇل قۇرىلىم جىل سوڭىنا دەيىن جالپى سوماسى 111 ميلليون 800 مىڭ تەڭگە بولاتىن كانالداردى تازالاۋ، جوندەۋ جانە وزەندەردىڭ جاعالاۋلارىن نىعايتۋ جۇمىستارىن جۇرگىزەدى. تەك مويىنقۇم اۋدانىنىڭ وزىندە جاساقتىڭ تەحنيكالىق مۇمكىندىگى پايدالانىلىپ، 46 شاقىرىمدى قۇرايتىن كانال تازالاندى. كوكتەمگى ەگىس جۇمىستارىنا دەيىن بۇل اۋدانداعى اۋداندا جالپى ۇزىندىعى 19،5 كم كانالدارعا مەحانيكالىق تازالاۋ جۇمىستارى جۇرگىزىلدى. سونداي-اق تالاس اۋدانىندا ۇزىندىعى 1،5 شاقىرىم بولاتىن كانالعا مەحانيكالىق تازالاۋ جانە 5 شاقىرىم تەمىربەتون كانالى قايتا قالپىنا كەلتىرىلدى.

مەحانيكالىق وترياد كومەگىمەن اۋدانداعى «سانۋي»، «كوكجەلەك»، «كۇشامان» كانالدارىنا تازالاۋ جۇمىستارىن جۇرگىزىلدى. بۇل كانالدارعا ءساۋىر ايىندا اعىن سۋ جىبەرلدى. ناتيجەسىندە بيىل اۋدانداعى سۋارمالى ەگىستىك كولەمى 5074 گەكتارعا دەيىن ۇلعايدى، –دەيدى مويىنقۇم اۋدانى اكىمدىگىنىڭ اۋىل شارۋاشىلىعى ءبولىمىنىڭ باسشىسى قىدىر ەلەۋسىزوۆ.

1991 جىلى جامبىل وبلىسىندا 209 مىڭ گەكتار سۋارمالى ەگىس القابى بولسا، ءقازىر وڭىردەگى سۋارمالى جەر كولەمى 184 مىڭ گەكتاردى قۇرايدى. وبلىستا 2021 جىلعا سۋارمالى ەگىس القابىن 13 مىڭ گەكتارعا ۇلعايتۋ جوسپارلانىپ وتىر.