«اتامەكەن» ۇلتتىق كاسىپكەر پالاتاسى وبلىستىق فيليالىنىڭ كاسىپكەرلەردىڭ قۇقىعىن قورعاۋ جانە اكىمشىلىك كەدەرگىلەردى ازايتۋ ءبولىمى جەكە ءىسىن جۇرگىزۋدە زاڭگەرلىك كەڭەسكە جۇگىنۋگە ءماجبۇر بولعان جامبىلدىق بيزنەس وكىلدەرىنىڭ تالاپ-تىلەكتەرىنە قۇلاق ءتۇرىپ كەلەدى. جىل باسىنان بەرى بولىمگە تۇسكەن 225 ارىز-شاعىمنىڭ 48ء-ى وڭ شەشىمىن تاپقان، دەپ جازادى Qamshy.kz اقپارات اگەنتتىگى.
جالپى اتالعان بولىمنەن بولەك كاسىپكەرلەردىڭ قۇقىعىن قورعاۋدا كاسىپكەرلەر پالاتاسى جانىنداعى كاسىپكەرلەردىڭ قۇقىعىن قورعاۋ جانە سىبايلاس جەمقورلىققاقار كەڭەستىڭ كومەگىنە جۇگىنۋشىلەر دە تابىلادى.ال بىلىكتى ماماندار جابىرلەنۋشىلەردىڭ قۇپيا شاعىمدارىنا قۇلاق ءتۇرىپ، ولاردىڭ ارىز-شاعىمدارىن تەكسەرەتىن بولىمگە اعىمداعى جىلدىڭ 8 ايىندا 225 ارىز-شاعىم تۇسكەن.
–مۇنداعى 48 ارىز-شاعىم يەسى ءوز دەگەنىنە جەتىپ، ىستەر جابىرلەنۋشىلەردىڭ پايداسىنا شەشىلگەن. كاسىپكەرلىككە كەدەرگى كەلتىرگىسى كەلگەن 16 تۇلعاعا تارتىپتىك جازا قولدانىلدى. اتاپ ايتقاندا مەكتەپتەردەگى ىستىق تاماقتى ۇيىمداستىرۋعا جاۋاپتى كاسىپكەرلەردىڭ ارەكەتىنە ارالاسقان 8 ءبىلىم بەرۋ مەكەمەسىنىڭ قىزمەتكەرى ءتيىستى جازاسىن الدى. سونداي-اق قىزمەتتىك مانسابىن پايدالانىپ بيزنەس وكىلدەرىنىڭ قۇقىعىن تاپتاعىسى كەلگەن 3 جول ساقشىسىنا ارەكەتىنە شەكتەۋ قويىلدى.
«اتامەكەن» ۇلتتىق كاسىپكەر پالاتاسى وبلىستىق فيليالىنىڭ كاسىپكەرلەردىڭ قۇقىعىن قورعاۋ جانە اكىمشىلىك كەدەرگىلەردى ازايتۋ بولىمىنە تۇسكەن ارىزدى تەكسەرۋدە زاڭعا قايشى ارەكەت ەتكەنى دالەلدەنىپ، تارتىپتىك جازاعا تارتىلعانداردىڭ قاتارىندا قۇرىلىس، مەملەكەتتىك ساتىپ الۋ، جەر قاتىنىستارى سالاسىنىڭ جاۋاپتى ماماندارى بار. ەسەپتى كەزەڭدە كاسىپكەرلەردەن تۇسكەن ارىز-شاعىم بويىنشا قۇقىق قورعاۋ ورگاندارىمەن كوتەرىلگەن 19 ءىس سوتقا جەتىپ، ونداعى 11 ءىس كاسىپكەرلەردىڭ پايداسىنا شەشىلدى، –دەيدى وبلىستىق كاسىپكەرلەر پالاتاسى ديرەكتورىنىڭ قۇقىقتىق ماسەلەلەر جونىندەگى ورىنباسارى يرينا كيم.
ديرەكتوردىڭ ورىنباسارى پالاتا جانىنداعى قۇقىعىن قورعاۋ جانە اكىمشىلىك كەدەرگىلەردى ازايتۋ بولىمىنەن بولەك كاسىپكەرلەردىڭ قۇقىعىن قورعاۋ جانە سىبايلاس جەمقورلىققاقار كەڭەسىنە دە جەرگىلىكتى بيزنەس قاۋىمداستىقتىڭ سەنىمى نىعايا تۇسكەنىن جاسىرمادى. جىل باسىنان بەرى 7 مارتە باس قوسقان كەڭەس مۇشەلەرى سالاداعى وزەكتى 11 ماسەلەنى كوتەرىپ، ولاردىڭ جەتەۋىنىڭ كاسىپكەرلەردىڭ مۇددەسىنە شەشىلۋىنە باستاما كوتەرگەن.
