جامبىل وبلىسى بۇگىندە تۇقىم شارۋاشىلىعى بويىنشا وزگەلەردەن كوش ىلگەرى كەلەدى. شارۋالار جاڭا تۇقىم تۇرلەرىن شىعارىپ عانا قويماي، تاجىريبەلەرىمەن بولىسۋدە. مىنە سونداي القالى جيىننىڭ ءبىرى ساپالى تۇقىم ساتاتىن «Sygenta» جانە «AG Agro» كومپانيالارىنىڭ ۇيىتقى بولۋىمەن سارىبۇلاق اۋىلدىق وكرۋگىندەگى «سامعاۋ» شارۋا قوجالىعىنىڭ القاپتارىندا ءوتتى. وندا قورداي اۋدانى ديقاندارى باس قوسىپ، جۇگەرىنىڭ جاڭا گيبريدتىك تۇقىمى تانىستىرىلدى دەپ جازادى Qamshy.kz اقپارات اگەنتتىگى.  بۇگىندە ءوڭىرىمىزدىڭ شارۋالارى ونىمدىلىكتى ارتتىرۋ ءۇشىن ءتيىمدى تاسىلدەردى پايدالانىپ، سەرتيفيكاتتالعان تۇقىم ەگىپ، جاڭا تەحنولوگيالار مەن وسىمدىكتەردى قورعاۋ ادىستەرىن كوپتەپ پايدالانۋدا. وسىلاردىڭ قاتارىنا «سامعاۋ» شارۋا قوجالىعىن جاتقىزۋعا بولادى. جۇگەرى وسىرۋدە اۋدان، قالا بەردى وبلىس كولەمىندە كوشباسشىلار قاتارىنان تابىلاتىن «سامعاۋ» شق زاماناۋي تەحنولوگيالاردى ءتيىمدى پايدالانۋدىڭ ارقاسىندا جىلدان جىلعا ءونىم كولەمىن ارتتىرىپ، بۇل ىستە الدىنا جان سالماي كەلەدى. مۇنىمەن قوسا، ەۆگەنيي ترۋبنيكوۆ باسقارىپ وتىرعان اگروقۇرىلىم وزگە شارۋالارمەن تابىسقا جەتۋدىڭ جاڭا جولدارىمەن، ونىڭ تىڭ تاسىلدەرىمەن ءبولىسۋدى داستۇرگە اينالدىرعان. وعان دالەل رەتىندە قوجالىق اتالعان «Sygenta» كومپانياسىنىڭ وكىلدەرىن شاقىرىپ، «دالا ارۋىن» باپتاۋدىڭ قىر-سىرىن ۇيرەتەتىن ءىس-شارا ۇيىمداستىردى. سەمينار بارىسىندا گيبريدتى تۇقىمداردى دۇرىس تاڭداۋ، توپىراقتى قورەكتەندىرۋ، پايدالى تىڭايتقىشتاردىڭ تۇرلەرى، ولاردى تاڭداۋ ەرەكشەلىكتەرى مەن قولدانۋ قاعيدالارى جايىندا كەڭىنەن اڭگىمە ءوربىدى. ايتا كەتسەك، سەمينار وتكىزۋ ورتالىعى رەتىندە «سامعاۋدىڭ» ەگىن القاپتارى بەكەر تاڭدالعان جوق. مۇندا ءوڭىردىڭ توپىراعى مەن اۋا رايى جاعدايىنا كەلەتىن سۇرىپتى انىقتاۋ ماقساتىندا جىل سايىن 15-تەن 20-عا دەيىن جۇگەرىنىڭ گيبريدتى تۇقىمدارى ەگىلەدى ەكەن.

ءىس-شارا بارىسىندا «Syngenta» كومپانياسىنىڭ وكىلدەرى مول ونىمگە قول جەتكىزۋ تاسىلدەرىن قاراپايىم تىلمەن جەتكىزىپ بەردى. بيىل اتالمىش ەگىس القابىنا «سي اتوميك فاو 550»، «سي كوبالت فاو 320»، «سي دجۋلەن فاو 600»، «سي انتەكس فاو 700»، «سي گەليۋم فاو 700»، «سي زەفير فاو 360»، «سي مايامي فاو 660» سۇرىپتارى جانە بيىلعى جىلدىڭ جاڭالىعى «سي گيدرو فاو 700» سۇرىپى ەگىلگەن. «Syngenta» كومپانياسىنىڭ ساراپشىسى رەت-رەتىمەن ءار سۇرىپتىڭ ەرەكشەلىگىن اتاپ ءوتىپ، جۇگەرى سوبىعىن ءۇزىپ، ارنايى قۇرىلعىمەن ىلعالدىلىعىن تەكسەردى. سەبەبى، ىلعالدىلىق جوعارى بولسا، ءونىم كەپتىرگەننەن كەيىن عانا قامباعا ءتۇسىپ، ساتۋعا جارامدى بولادى. ال، بۇل قوسىمشا شىعىن، وعان قوسا ۋاقىتتى تالاپ ەتەتىن ءىس ەكەنى ايتپاسا دا بەلگىلى. زاماناۋي سۇرىپتار بولسا قاجەتتى ىلعالدىلىققا تەز جەتىپ، دانەكتەردى كەپتىرۋ ساتىسىنان جىلدام وتۋگە مۇمكىندىك بەرەدى.

وسى ورايدا، سەمينار بارىسىندا كومپانيا وكىلدەرى قاتىسۋشىلاردىڭ نازارىنا جۇگەرى ءوسىرۋ تيىمدىلىگىن ارتتىرۋعا باعىتتالعان كەشەندى باعدارلامالارىن ۇسىندى. كومپانيا ۇسىنعان گيبريدتەر ارنايى جامبىل جانە الماتى وبلىستارىنا بەيىمدەلگەنىن اتاپ وتكەن ءجون. ماسەلەن، «سي مايامي فاو 660» گيبريدى مول ءونىم بەرەتىن سۇرىپ رەتىندە تانىلىپ ۇلگەرگەن. ءپىسۋ جانە جيناۋ كەزىندە قاجەتتى ىلعالدىلىققا تەز جەتۋ اتالمىش تۇقىمنىڭ ەرەكشەلىگى بولىپ تابىلادى. مامانداردىڭ ايتۋىنشا، بۇل سۇرىپ 2018 جىلدىڭ قورىتىندىسى بويىنشا 14 پايىز ىلعالدىلىقتا 130 سەنتنەر ءونىم بەرگەن. بۇل ءوڭىردىڭ اۋا رايىنىڭ قولايسىز جاعدايى مەن ءوڭىر توپىراعىنىڭ قۇنارلىلىعىن ەسەپكە العاندا تاماشا كورسەتكىش.