اتقا قونعان ازاماتىڭ ابىرويلى بولسا، جۇرتتىڭ دا بوساعاسىنا بەرەكە كىرەتىنى بەلگىلى. سوندىقتان دانا قازاق «اكىم بول، حالقىڭا جاقىن» بول دەپ بەكەر ايتپاعان. قازىرگى تاڭدا اۋىلداعى اعايىننىڭ قامىن ويلايتىن بىردەن-بىر ازامات اۋىل اكىمى ەكەنى داۋسىز. سوندىقتان ەلدى مەكەن اكىمدەرى ەلباسىنا تاپسىرماسىنا وراي ەل الدىندا ەسەپ بەرۋدى داستۇرگە اينالدىرعان دەپ جازادى Qamshy.kz اقپارات اگەنتتىگى. ماسەلەن قورداي اۋدانىنا قاراستى كەنەن اۋىلدىق وكرۋگىنىڭ اكىمى نۇركەن جامانكوزيەۆتىڭ سوزىنە سۇيەنسەك، 2019 جىلدىڭ 9 ايى ىشىندەگى وكرۋگتىڭ الەۋمەتتىك-ەكونوميكالىق دامۋىندا ايتارلىقتاي ءدۇمپۋ بار ەكەن.

بيۋدجەتكە تۇسەتىن سالىقتىق تولەمدەردىڭ جوسپارعا ساي اتقارىلعانىن ايتىپ وتكەن اۋىل باسشىسى جىل باسىنان باستاپ جەرگىلىكتى ءوزىن-وزى باسقارۋ شوتى بويىنشا قوعامداستىق مۇشەلەرىمەن 11 جيىن ۇيىمداستىرىلىپ، قاراجاتتاردى ماقساتتى پايدالانۋ باعىتىنداعى جۇمىستار جايىنا توقتالدى. كەنەن اۋىلىندا «وڭىرلەردى دامىتۋ-2020» باعدارلاماسى اياسىندا ە.قاشاعانوۆ كوشەسىنىڭ 150 مەتر جولىنا اعىمدى جوندەۋ جۇمىستارى جۇرگىزىلىپتى. سونىمەن قاتار، قىركۇيەك ايىندا ن.بەلاشوۆ كوشەسىنىڭ 480 مەترىنە جارىقتاندىرۋ جۇرگىزىلسە، سايماساي كاكەتاي جانە تىنىباي ماجيرين كوشەلەرىنە 17 دانا كوشە باعىتتاعىش ورناتىلعان.

اۋىلداعى اۋىل شارۋاشىلىعى سالاسى دا وڭدى جولعا قويىلعان. بيىلعى جيىن-تەرىم جۇمىستارى تولىعىمەن اياقتالىپ، شارۋالار استىقتى شاشاۋ شىعارماي جيناپ الىپتى. كاسىپكەرلىك سالاسى بويىنشا، اۋداندىق كاسىپكەرلەر پالاتاسى ارقىلى «باستاۋ بيزنەس»، «بەرەكە» باعدارلامالارىنا قاتىسقان ءبىرقاتار كەنەندىكتەر نەسيەسىن الىپ، كاسىبىن باستاسا، ەكى ازامات قۇجاتتارىن وتكىزىپ قويعان.

– اۋىل شارۋاشىلىق مالداردىڭ جۇقپالى ىندەتتەرگە قارسى جۇمىستارىن 7 مال دارىگەر ماماندارى اتقارادى. ولار كەرەكتى جابدىقتارمەن جانە اۆتوكولىگىمەن قامتاماسىز ەتىلگەن. اۋىلدا مالدارعا بەكىتىلگەن جوسپار بويىنشا الدىن الا ەگۋ شارالارى، قان الۋ، سىرعا سالۋ جانە ۆەتەريناريالىق انىقتاما بەرۋ جۇمىستارى جولعا قويىلعان. اعىمداعى جىلى جاڭا ۆەتەرينارلىق پۋنكت ىسكە قوسىلدى، – دەيدى ن.جامانكوزوۆ.

كەنەندە جاڭا فورماتتاعى اتاۋلى الەۋمەتتىك كومەك الاتىندار سانى 34 ادام بولسا، ءبىر ازاماتقا شارتسىز الەۋمەتتىك كومەك تاعايىندالىپتى. سونىمەن بىرگە، ناتيجەسىز جۇمىسپەن قامتىلعان 50 ازامات بۇگىنگى كۇنى وزەكتەندىرىلىپ، ساناتتارى انىقتالعان.

قايرىمدىلىقتى جانىنا سەرىك ەتكەن كەنەندىكتەر سول باعىتتا دا قوماقتى جۇمىستار اتقارىپتى. ماسەلەن، ءبىر كوپبالالى وتباسىنا اۋىل اكىمشىلىگى مەن اۋىل يمامىنىڭ ۇيىتقى بولۋىمەن كەنەندىك جاماعات 3 ميلليون تەڭگەگە ءۇي الىپ بەرسە، ءبىر جالعىز باستى انا مەن تۇرمىسى تومەن تاعى ءبىر وتباسىنا قارجىلاي كومەك كورسەتىلگەن. ال، رەسپۋبليكالىق «مەكتەپكە جول» اكسياسى اياسىندا 24 وقۋشىعا مەكتەپكە قاجەتتى فورماسى مەن قۇرالدار تارتۋ ەتىلگەن.

ءيا، كەنەننىڭ تىرلىگى كەلىستى.