ەلباسىنىڭ «100 ناقتى قادام» ۇلت جوسپارىندا ەت كلاستەرىن دامىتۋعا ايرىقشا كوڭىل بولىنگەنىن ەل جاقسى بىلەدى. اسىرەسە ۇلت كوشباسشىسى ەت ەكسپورتىن دامىتۋدى مىقتاپ تاپسىردى. سونىڭ ارقاسىندا جامبىل وبلىسى وتكەن جىلى قوزى ەتىن ەكسپورتتاۋ بويىنشا رەسپۋبليكا كولەمىندە كوش باستاعان بولاتىن. ارينە ەت ەكسپورتىن ورىستەتۋ ءۇشىن مال بورداقىلاۋ الاڭدارى مەن قاساپحانالاردىڭ اتقارار ءرولى وراسان. بۇل ورايدا اۋليەاتا جەرىندە جاڭا ەت باعىتىنداعى نىساندار كۇن ساناپ كوبەيۋدە، دەپ جازادى Qamshy.kz اقپارات اگەنتتىگى. ماسەلەن ەكى جىلعا جۋىق ۋاقىت قورداي اۋىلىندا تابىستى جۇمىس ىستەپ جاتقان «پەرۆومايسكيە دەليكاتەسى» جاۋاپكەرشىلىگى شەكتەۋلى سەرىكتەستىگىنە قاراستى قاساپحانانىڭ الەۋەتى جىلدان جىلعا ارتىپ كەلەدى. تولىقتاي زاماناۋي جانە وزىق تەحنولوگيالارمەن جابدىقتالعان مال سويۋ الاڭىندا ءىرى قارا مەن ۇساق مال سويۋ جۇمىستارى كۇندەلىكتى جۇرگىزىلۋدە. بۇل جەردە سويىلعان مال تولىق سيكلدى باستاپقى وڭدەۋدەن ءوتىپ، تۇتىنۋشىعا جونەلتىلەدى. ايتا كەتەرلىگى، زاماناۋي تەحنولوگيالاردىڭ ارقاسىندا قالدىقسىز ءوندىرىس ءادىسى قولعا الىنعان. ياعني، سويىلعان تۇلىكتىڭ ءار بولشەگى قاجەتكە جاراتىلادى. ال، بۇل ىسكە قويىلعان تالاپتار وتە قاتاڭ. قاساپحانا ىشىندەگى ءمىنسىز تازالىقتان باستاپ، مالدى باۋىزداۋ، ونى بولشەكتەۋ سىندى جۇمىستار حالىقارالىق ستاندارتتارعا ساي جۇرگىزىلۋدە. سونىمەن قاتار، يسلام قاعيداتتارى دا ساقتالادى، ياعني بۇل جەردەن شىققان ەت «حالال» ستاندارتىنا ساي كەلەدى.

نەگىزىنەن قازاقستان بويىنشا وتكىزىلەتىن ەت، جاقىندا شەتەلدەرگە دە ەكسپورتتالا باستادى. سەرىكتەستىك ەت ەكسپورتتاۋشى كومپانيالارمەن كەلىسىمشارتقا وتىرىپ، مال ەتى باحرەين، بىرىككەن اراب امىرلىكتەرى سىندى ازيا ەلدەرىنە جىبەرىلۋدە.

بۇل ارينە قۋانارلىق جاي. ەستەرىڭىزدە بولسا وسىدان بىرەر جىل بۇرىن مويىنقۇم اۋدانىنداعى مىڭارال اۋىلدىق وكرۋگىندەگى بالىق زاۋىتا ءدال وسىنداي قالدىقسىز جۇمىس جاساۋ جۇيەسىنە كوشكەن بولاتىن. جانە كاسىپورىن ءوندىرىسىن ورىستەتىپ، ءونىمىن جاقىن-الىس شەت مەملەكەتتەرگە شىعارا باستاعان ەدى. ناتيجەسىندە مويىنقۇم بالىق زاۋىتىن ورتا ازياداعى مەملەكەتتەردىڭ دەنى ەستىپ، تىرلىگىنە ءتانتى بولعان. ەندى مىنە «پەرۆومايسكيە دەليكاتەسى» جاۋاپكەرشىلىگى شەكتەۋلى سەرىكتەستىگى دە وندىرىسكە ەكپىن قوسىپ وتىر. جانە ونىمدەرى حالال ستاندارتىنا ساي بولىپ عانا قويماي، بىرىككەن اراب امىرلىكتەرىنە دەيىن شىعارىلۋدا. اۋليەاتانىڭ ەت ەكسپورتتىق الەۋەتى ءوستى دەگەن وسى.