تاراز قالاسىندا اقپاراتتىق تەحنولوگيا سالاسى ماماندارىن دايارلاۋ، جوعارى تەحنولوگيالىق جوبالاردى قۇرۋ ماقساتىندا «Taراز HUB» اقپاراتتىق تەحنولوگيالار ورتالىعى جۇمىس جاساۋدا، دەپ جازادى Qamshy.kz اقپارات اگەنتتىگى. 

بۇل ورتالىقتىڭ تاعى ءبىر ەرەكشەلىگى مۇندا اقپاراتتىق تەحنولوگيا سالاسىندا قىزمەت ەتەتىن ءبىرقاتار جامبىلدىق كومپانيالار شوعىرلانعان.

––بۇل ەلىمىزدەگى نۇر-سۇلتان قالاسىنداعى «Astana HUB» اقپاراتتىق تەحنولوگيا ورتالىعىنان كەيىنگى ەكىنشى قۇرىلىم. بۇل ورتالىق ارقىلى ءدال وسى سالاعا بەيىمدەلگەن كوممەرسيالىق ۇيىمدار تەك ءوز مۇمكىندىكتەرىن ەسەلەۋمەن اينالىسادى. ولاردىڭ قۇجاتتارىن رەتتەۋ، اكىمشىلىك ەسەپ قيساپتارىن جۇرگىزۋ تولىعىمەن ورتالىق اكىمشىلىگىنىڭ ەنشىسىندە،–دەيدى ورتالىق ديرەكتورى نۇرسۇلتان تەمىرحانوۆ.

وسىنداي توپتىڭ ءبىرى «Enactus Dulaty» كومانداسى. جاقىندا عانا اقش جەرىندەگى جاڭا تەحنولوگيالار باعىتىندا وتكەن دۇنيەجۇزىلىك بىرىنشىلىكتە ەل نامىسىن ابىرويمەن قورعاعان بىلگىر جاستار مۇندا «Warm Box»، «Water Energy» جوبالارىن جەتىلدىرۋمەن اينالىسىپ جاتىر. جوبانىڭ نەگىزگى ماقستا اۋىل شارۋاشىلىعى جانە اعاش وڭدەۋشى كاسىپورىنداردىڭ قالدىعىنان تاس كومىردى الماستىرۋشى وتىن ءتۇرىن وندىرىسكە ەنگىزۋ بولىپ تابىلادى. توپ مۇشەلەرى وتىننىڭ وسى ءبىر ءتۇرى ارقىلى وبلىستاعى ەلدى مەكەندەرىنىڭ قاتتى وتىنعا سۇرانىسىن تولىق وتەۋگە بولاتىندىعىنا نازار اۋدارادى.

– ورتا ەسەپپەن جىلىتۋ ماۋسىمىندا اۋىلدارداعى ۇيلەردى 4-5 توننا كومىر جۇمسالادى. بۇل اۋىل تۇرعىندارى ءۇشىن وتە ۇلكەن شىعىن. ءبىز ءوز جوبامىز ارقىلى بۇل شىعىندى 8 ەسەگە ازايتۋعا مۇمكىندىك بەرىپ وتىرمىز. سونداي-اق ءبىزدىڭ كوماندا توزىعى جەتكەن ماشينالارعا اۋا سۇزگىسىن ورناتۋ، بالامالى ەنەرگيا كوزدەرىن ويلاپ تابۋ بويىنشا دا جوبالار دايىنداپ جاتىر. ەڭ اۋەلى جوعارىدا اتالعان جوبانى تابىس كوزىنە اينالدىرۋ ارقىلى بىرتە-بىرتە باسقا جوبالارىمىز جۇزەگە اسىرۋعا كوشەمىز.، –دەيدى توپ جەتەكشىسى كارىمجان سۇلەيمەنوۆ.

«Taراز HUB» اقپاراتتىق تەحنولوگيالار ورتالىعىنىڭ جەتەكشىسى ايتۋىنشا بۇل مەكەمە جاس ءارى وزىق ويلى كاسىپكەرلەردى قولداۋدا تەك كەڭسە بولمەلەرىن ارزان باعادا جالعا بەرىپ قانا قويمايدى. ورتالىقتىڭ ۇيىتقى بولۋىمەن كومپيۋتەرلىك باعدارلاماۋشىلار اراسىندا «حاكاتون» دەپ اتالاتىن سايىستار وتكىزىلمەك. بايقاۋ جەڭىمپازدارىنا ارنايى گرانتتار دا تاعايىندالادى. بۇل گرانتتاردى جاس كاسىپكەرلەر وزدەرىنىڭ بيزنەس-يدەيالارىن ىسكە اسىرۋعا جۇمسايدى.

ال ورتالىقتىڭ fab-زەرتحاناسى ءوڭىر مەكتەپتەرىندەگى روبوتوتەحنيكا كابينەتتەرىمەن تىعىز بايلانىستا جۇمىس جاساپ جاتىر. سونىمەن قاتار مۇندا روبوتوتەحنيكادان ءدارىس وقيتىن ۇستازدار دا بىلىكتىلىگىن جەتىلدىرمەك.

ءقازىر مۇندا 30-عا جۋىق ستارتاپ-كومپانيا جۇمىس جاساۋدا.