قوعام ءومىرىنىڭ بارلىق سالاسىنا دەندەپ ەنگەن سيفرلاندىرۋ ءوڭىردىڭ دەنساۋلىق ساقتاۋ سالاسىنا دا تىڭ سەرپىن بەرۋدە. سيفرلاندىرۋ ءىسى وبلىستاعى ەمحانالاردىڭ كەزەككە تۇرۋ ۋاقىتى مەن قاعازباستىلىقتى ازايتۋدا كادەگە جاراپ جاتىر. سونداي-اق بۇل ءۇردىس ازاماتتاردىڭ ەمحانالاردان الاتىن قىزمەت تۇرلەرىن ۋاقىتىن جوعالتپاي ونى ەلەكتروندى رەجيمدە الۋعا مۇمكىندىك سىيلاپ وتىر، دەپ جازادى Qamshy.kz اقپارات اگەنتتىگى. 

اعىمداعى جىلدىڭ ناۋرىز ايىنان باستاپ وبلىستاعى ەمحانالارعا ەنگىزىلگەن «Damu Med» كەشەندى مەديسينالىق اقپاراتتىق جۇيەسى 086-ۋ نىسانىنداعى انىقتاماسى مەن ەڭبەككە جارامسىز پاراقتارىنا QR-code ەنگىزۋ ارقىلى ونىڭ ءتۇپنۇسقالىعىن تەكسەرۋ فۋنكسياسىمەن تولىقتى.

كۇنى بۇگىنگە دەيىن QR-كود ەنگىزىلگەن 086-ۋ نىسانىنداعى 48 انىقتاما مەن 9180 دانا ەڭبەككە جارامسىز پاراعى بەرىلگەن. سايكەسىنشە بۇگىندە وبلىس تۇرعىندارىنا دارىگەرلەردىڭ ەمدەۋ قورىتىندىسىن QR-كود ەنگىزىلگەن پاراقپەن الادى. ءوز كەزەگىندە بۇل جۇيە وبلىس ەمحانالارىندا جەڭىل جولمەن ساتىلىپ كەلگەن مەديسينالىق انىقتامالار مەن ەڭبەككە جارامسىز پاراعىن بەرۋ فاكتىلەرىن ءبىرشاما ازايتۋ ماقساتىندا جاسالىپ وتىر. الداعى ۋاقىتتا مەديسينالىق قىزمەتتىڭ ەلەكتروندى بازاسى سانالاتىن «Damu Med» كەشەندى مەديسينالىق اقپاراتتىق جۇيەسىنە وبلىستاعى ءىرى ءدارىحانالاردى دا تىركەۋ جوسپارلانىپ وتىر. سول ارقىلى ءدارىحانالار ەمدەۋ مەكەمەلەرىمەن ۇسىنىلاتىن تەگىن رەسەپتتەردى «Damu Med» موبيلدىك قوسىمشاسىنا ناۋقاستىڭ جسن ءنومىرىن تىركەۋ ارقىلى الۋ مۇمكىندىگىنە قول جەتكىزبەك. بۇل امال دا تەگىن دارىلىك رەسەپتتەردى قولدان جاساۋ فاكتىلەرى مەن سالاداعى سىبايلاس جەمقورلىقتى ازايتۋعا باعىتتالىپ وتىر.

جالپى وبلىستاعى دەنساۋلىق ساقتاۋ ۇيىمدارىنداعى جەمقورلىق فاكتىلەرىن ازايتۋ، بولدىرماۋ قۇزىرلى مەملەكەتتىك ورگانداردىڭ ءجىتى نازارىندا. بۇل جۇمىس اتالمىش قۇرىلىم قىزمەتكەرلەرى باس دارىگەر قىزمەتىندە 10 جىلدان كوپ ۋاقىت وتىرعان باس دارىگەرلەردى كەزەڭ-كەزەڭىمەن اۋىستىرۋ ارقىلى دا جۇزەگە اسىرىلماق. ەمدەلۋشىلەر مەن ولاردىڭ تۋعان تۋىستارى اراسىندا ءانونيمدى ساۋالناما دا جۇرگىزىلۋدە.

وسىنداي ساۋالناما ناتيجەسىندە مەركى، ت.رىسقۇلوۆ، تالاس، مويىنقۇم اۋداندىق اۋرۋحانالارىندا ناركولوگيالىق جانە پسيحونيەۆرولوگيالىق انىقتامالار بەرۋ ءۇشىن اقىلى قىزمەت كورسەتكەنى ءمالىم بولدى. ال بايزاق، قورداي، ت.رىسقۇلوۆ، مەركە اۋداندىق ورتالىق اۋرۋحانالارىندا جانە تاراز قالالىق №5 ەمحانادا №086 نىسانداعى مەديسينالىق انىقتاماسىن ساۋدالاۋ فاكتىسى تىركەلگەن.