قازاق دالاسىندا ءورشىل رۋح پەن وشپەس ەرلىك ەتكەن ەرلەرگە ارنالىپ تۇرعىزىلعان ەسكەرتكىشتەر كوپ. الايدا حالىق جۇرەگىنەن شىنايى ورىن الىپ، داستان ەرلىگى ۇرپاقتان ۇرپاققا ۇمىتىلماي جەتكەندەرى ساناۋلى عانا. جامبىل وبلىسىنداعى، بايزاق اۋدانىنداعى بايزاق داتقان مامبەت ۇلىنىڭ كەسەنەسى دە ءور تۇلعا ارنالعان ەڭسەلى ەسكەرتكىش ءارى «رۋحاني جاڭعىرۋ» باعدارلاماسى اياسىندا قازاقستاننىڭ كيەلى جەرلەرى كارتاسىنا جالپىۇلتتىق ماڭىزعا يە نىسان رەتىندە الىنعان تاريحي ورىن سانالادى، دەپ جازادى Qamshy.kz اقپارات اگەنتتىگى. 

بايزاق مامبەت ۇلىنىڭ ەسىمى حالىق جادىندا قوقان حاندىعى مەن رەسەي يمپەرياسىنا قارسى ۇلت-ازاتتىق كوتەرىلىستىڭ ۇيىمداستىرۋشىسى رەتىندە ساقتالدى. الايدا قازاقتىڭ جەرىنە كوز الارتقان ولار اقىرى دەگەنىنە جەتتى. قازاقتىڭ باس كوتەرەر ازاماتى ءارى ەل الدىندا سىيلى بايزاق داتقانى زەڭبىرەك اۋزىنا ماتاپ اتىپ جىبەرەدى. ايتۋعا اۋىز بارمايتىن بۇل جاۋىزدىقتى جاساۋعا قوقان حانى ءالىمقۇل بۇيرىق بەرەدى. دەسە دە بۇدان حالىقتىڭ ەڭسەسى جىعىلا قويمايدى. اردا ازاماتتىڭ ەكى ساۋساعى تۇسكەن تالاس وزەنىنىڭ بويىنداعى قازىرگى سارىكەمەر اۋىلىنىڭ ماڭىنا جەرلەيدى. كەيىننەن مۇندا باتىرعا ارنالعان ەڭسەلى كەسەنە بوي كوتەردى.

بۇل كۇندە بايزاق باتىر كەسەنەسى وڭىردەگى كيەلى تاريحي-مادەني ەسكەرتكىشتەردىڭ ءبىرى سانالادى. ەلباسىنىڭ «رۋحاني جاڭعىرۋ» باعدارلامالىق ماقالاسىنان تۋىنداعان مىندەتتەردى ىسكە اسىرۋ ماقساتىندا قازاقستان رەسپۋبليكاسى ۇلتتىق مۋزەيىنىڭ جانىنان قۇرىلعان «قاسيەتتى قازاقستان» عىلىمي-زەرتتەۋ ورتالىعىنىڭ «قازاقستاننىڭ جالپىۇلتتىق كيەلى ورىندارى» جوباسى 100 نىسانىنىڭ تىزىمىنە الىندى.

«باتىس ەۋروپا – باتىس جۇڭگو» ترانزيتتىك ءدالىزى بويىندا ورنالاسقان ەڭسەلى نىساننىڭ ءقازىردىڭ وزىندە جەرگىلىكتى تۇرعىندار ءتاۋ ەتىپ، تۋريستەر تاماشالايتىن قاسيەتتى ورنىن سانالادى. جىل سايىن مۇندا مەكتەپ وقۋشىلارى مەن اۋدان جاستارى اۋدان جاستارى ات باسىن بۇرادى. جاڭادان شاڭىراق كوتەرگەن جاستاردىڭ دا باتىر كەسەنەسىن ءتاۋ ەتە كەلەتىن يگى ءداستۇر قالىپتاسقان. وسىنى ەسكەرگەن ايماقتىڭ قالتالى ازاماتتارى اۋداننىڭ 80 جىلدىق مەرەيتويى قارساڭىندا «بايزاق بابا» كەسەنەسىنە باراتىن جول سالۋعا، كەشەن اۋماعىنا سۋ تارتىپ، كوگالداندىرۋ جۇمىستارىنا دەمەۋشىلىك جاسادى. سونىمەن قاتار، كەسەنە ماڭى جارىقتاندىرىلىپ جانە اينالاسى قورشاۋ جۇمىستارى جۇرگىزىلدى.

قازاق تاۋەلسىزدىگى جولىندا قۇربان بولعان بايزاق داتقا مامبەتۇلىن حالىق جادىندا قالدىرۋ ماقساتىندا 1995 جىلدىڭ 20 جەلتوقسانىندا قازاقستان رەسپۋبليكاسى جارلىعىمەن جامبىل وبلىسىنداعى سۆەردلوۆ اۋدانىنا بايزاق داتقانىڭ اتى بەرىلدى.