م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ «Enactus TarSU» كومانداسى كومىردەن ارزان ءارى قۋاتتى بريكەت دەپ اتالاتىن وتىن ءتۇرىنىڭ ءوندىرىسىن قولعا الماق. العىر جاستاردان قۇرالعان توپ ءارتۇرلى تۇرمىستىق جانە شارۋاشىلىق قالدىقتارى مەن كومىر كۇلىنەن تۇراتىن وزىندىك قۇنى تاس كومىردەن 8 ەسە ارزان وتىن ءتۇرىن قولدانىسقا ەنگىزۋدى قۇپتايدى، دەپ جازادى Qamshy.kz اقپارات اگەنتتىگى. 

نەگىزىندە الەم ەلدەرىنىڭ تاجىريبەسىندە جىلىتۋ ماۋسىمىندا ونەركاسىپ، اۋىل شارۋاشىلىق سالالارىنىڭ قالدىقتارىنان دايىندالاتىن بريكەت قولدانىلادى.

–ءبىزدىڭ جوبا Warm Box دەپ اتالادى. بۇل تىركەستى سوزبە ءسوز اۋدارعاندا «جىلى قوراپ» دەگەن ماعىنانى بەرەدى. گازداندىرىلماعان اۋىلدارعا جىلىتۋ ماۋسىمىن ارزانداتىلعان وتىن تۇرىمەن وتكىزۋگە جول اشاتىن بريكەتتى وتىن رەتىندە جاپپاي قولدانىس ەنگىزۋ الگوريتمى دە وتە قاراپايىم. ءبىز اۋىل تۇرعىندىرىنا بريكەتتى ءوز قولدارىمەن جاساۋدى ۇيرەتەمىز. سول ارقىلى ولار وسى ادىسپەن تابىس تاۋىپ بۇكىل اۋىلدا جىلىتۋ ماۋسىمىنا قاجەتتى وتىن تۇرىمەن قامتي الادى،– دەيدى «Enactus TarSU» كومانداسىنىڭ مۇشەسى ديانا ناربايەۆا.

تالاپتى جاستار ءوز جوبالارىن 2017 جىلدان باستاپ ىسكە اسىرا باستاعان. ءدال وسى ۋاقىتتا ولار جىلىتۋ ماۋسىمىنا ازىرلىگى جوق وتباسىعا كومەك قولىن سوزعان. ءاۋ باستا بريكەتتى مەحانيكالىق قوندىرعىلارمەن شىعارعان توپ ءقازىر بۇل ءۇردىستى تولىقتاي اۆتوماتتاندىرىلعان رەجيمگە اۋىسقانىن ايتادى. ءقازىر جوبا اۆتورلارى پيلوتتىق رەجيمدە قالا ماڭىنداعى كولتوعان ، قۇمشاعال، ءشولدالا اۋىلدارىنا بريكەتتى جاپپاي قولدانىسقا ەنگىزۋ باعىتىندا جۇمىس جاساۋدا.

بريكەتتىڭ حيميالىق قۇرامىن تۇزۋدە «Enactus TarSU» كومانداسىنىڭ مۇشەلەرى م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ «حيميا» كافەدراسىمەن تىعىز بايلانىس ورناتقان. ءتىپتى بولاشاقتا جامبىلدىق جاسامپاز جاستار ازىرلەگەن بريكەت وتاندىق نارىققا جول تارتپاق. تۇرمىستىق قالدىقتار نەگىزىن قۇرايتىن بريكەت ءوندىرىسىنىڭ ەكونوميكالىق تۇرعىدان تيىمدىلىگى دەپ ەش تالاس تۋدىرمايدى. وسىنىسىمەن-اق جامبىلدىق جاستاردىڭ بريكەت ءوندىرىسى جوباسى نارىقتا جوعارى سۇرانىسقا يە بولا الاتىن سىڭايلى.

اۋىلدىقتاردىڭ جىلىتۋ ماۋسىمىنداعى باس اۋىرتار ماسەلەسىنە وڭاي ءارى ءتيىمدى شەشۋ باعىتىنداعى ىزدەنىستى جولعا قويعان جاستار بۇگىندە رەسپۋبليكالىق «Enactus» قوزعالىسىنىڭ ۇزدىگى سانالادى. جاقىندا عانا ولار ءدال وسى قوزعالىس مۇشەلەرى اراسىندا اقش-تا وتكەن دۇنيەجۇزىلىك بىرىنشىلىكتە ەل نامىسىن ابىرويمەن قورعاپ قايتتى.