جامبىلدىق كاسىپكەرلەر قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىمەن جالپى سوماسى 343 ميلليارد 936 ميلليون 600 مىڭ تەڭگە بولاتىن سىبايلاس جەمقورلىققا قارسى 20 كەلىسىمشارتقا قول قويدى، دەپ جازادى Qamshy.kz اقپارات اگەنتتىگى.
قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى وبلىستاعى ينۆەستيسيالىق احۋال مەن كاسىپكەرلىك سالاسىنداعى ماسەلەلەردى ۇنەمى نازارىندا ۇستايدى. بۇل ماقساتتا اتالمىش دەپارتامەنت «Protecting business and investments» جوباسىن قولعا العان. جوبا اياسىندا جىل باسىنان بەرى قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى جانە وبلىستىق كاسىپكەرلەر پالاتاسىمەن بىرلەسىپ 17 كاسىپكەردىڭ زاڭدى قۇقىقتارىن قورعاعان. ءارى ولاردىڭ مۇددەلەرىن بارلىق قۇزىرلى ورگاندار اراسىندا ءوز دەڭگەيىندە قورعاۋدى جۇزەگە اسىرىپ كەلەدى.
نەگىزىنەن ءوڭىر كاسىپكەرلەرىنىڭ قىزمەتىنە جەرگىلىكتى اتقارۋشى ورگانداردىڭ ارالاسۋ فاكتىسى ءجيى تىركەلەدى. اسىرەسە جەر تەلىمدەرىن بەرۋ، كاسىپتىك نىسانداردىڭ قۇرىلىسىن جۇرگىزۋ، عيماراتتارداعى تەحنيكالىق قاۋىپسىزدىك ەرەجەسى تالاپتارىن بەرۋدە قۇزىرلى ورگان قىزمەتكەرلەرى تاراپىنان كاسىپكەرلەر كەدەرگىلەرگە ۇشىراپ جاتادى. ءوز كەزەگىندە وسىنداي فاكىلەرگە جول بەرمەۋدە سىبايلاس جەمقورلىققا قارسى قىزمەت وكىلدەرى ينۆەستورلار مەن كاسىپكەرلەردى سىبايلاس جەمقورلىققا قارسى سۇيەمەلدەۋدە سىبايلاس جەمقورلىققا قارسى كەلىسىم شارتقا قول قويۋدى جۇزەگە اسىرادى. بۇل شارتتىڭ ءمانى ءارى استارى كاسىپكەرلەردىڭ جۇمىستارىن تازا جۇرگىزۋ جانە سىبايلاس جەمقورلىق كورىنىستەرىنە «نولدىك توزىمدىلىك» تانىتۋ بولىپ تابىلادى.
–اتالعان شارتتى باسشىلىققا الا وتىرىپ كاسىپكەرلىك نىسانداردىڭ قىزمەتىنە نەگىزسىز ارالاسۋ جانە ولارعا كەدەرگى كەلتىرۋ فاكتىلەرى بويىنشا ءبىرقاتار مەملەكەتتىك مەكەمەلەرگە ۇسىنىستار بەردىك. اتالعان مەكەمەلەر ءوز قۇزىرەتى شەڭبەرىندە ءبىزدىڭ ۇسىنىستارىمىزدى تالقىلاپ ونى ىسكە اسىرۋدىڭ زاڭدى تەتىكتەرىن قاراستىراتىن بولادى. ءبىر سوزبەن ايتقاندا ءبىزدىڭ دەپارتامەنت وڭىردەگى ينۆەستورلار مەن كاسىپكەرلەردىڭ زاڭدى قۇقىقتارى مەن مۇددەلەرىن ءاردايىم قورعاۋعا دايىن، – قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىسى ءادىلحان اشىربايەۆ.
پىكىر قالدىرۋ