جامبىل وبلىسىندا «جاستاردىڭ التىن بەسىگى» تاقىرىبىندا جاستاردىڭ «قازاقستاننىڭ 100 جاڭا ەسىمى» جوباسىنىڭ كانديداتتارى جانە جەڭىمپازدارىمەن كەزدەسۋى ءوتتى. بايزاق اۋدانى سارىكەمەر اۋىلدىق وكرۋگىندە وتكەن شارا قازاقستان حالقى اسسامبلەياسىنىڭ «قوعامدىق كەلىسىم» مەكەمەسىنىڭ تاپسىرىسى بويىنشا ۇيىمداستىرىلدى.

جاستار جىلى اياسىندا وتكەن جيىنعا جامبىل وبلىستىق ءماسليحاتىنىڭ ءۇشىنشى، ءتورتىنشى جانە بەسىنشى شاقىرىلىمدارىنىڭ دەپۋتاتى، قوعامدىق كەڭەستىڭ ءتوراعاسى سەمبەك سەيدازيموۆ، جامبىل وبلىسى اكىمدىگىنىڭ دەنساۋلىق ساقتاۋ باسقارماسى جامبىل وبلىستىق «قان ورتالىعىنىڭ» ديرەكتورى، قازاقستان حالقى اسسامبلەياسىنىڭ مۇشەسى گۋلام ۋماروۆ، جامبىل اۋدانى اسا اۋىلىنداعى «اينالايىن» بالالار مەن جاسوسپىرىمدەر ورتالىعىنىڭ «جاستار كلۋبى» قوعامدىق بىرلەستىگىنىڭ ءتورايىمى ايگۇل رازاقوۆا قاتىسىپ، جاستارمەن جەتىستىككە جەتۋدىڭ جولى جايلى ويلارىمەن ءبولىسىپ، ءبىلىم باسەكەسىندە وزىق بولۋعا شاقىردى.

جانىنا راحات سىيلاماعان مەيرامحانادان باس تارتىپ، بالالارعا ارنالعان تەگىن مەكتەپ اشقان ايگۇل رازاقوۆا:

– «100 جاڭا ەسىم» جوباسىنىڭ تىزىمىنە كىرەمىن دەپ ويلامادىم. مەن تەك وزىمە باقىت سىيلايتىن جۇمىسپەن اينالىستىم. جانە سول ەڭبەگىم وسىنداي جەڭىسكە جەتكىزدى. جاس كەزىمىزدە 90-جىلدارى جولداسىم ەكەۋمىز 3 بولمەلى ۋيىمىزدەن بالالارعا ارنالعان تەگىن مەكتەپ اشتىق. مەكتەپتىڭ شىعىنىن ءوزىم كۋنىنە 4-5 شۇلىق، 1 جەمپىر توقىپ وتەدىم. سولاي مەكتەپتە بىرنەشە ۇيىرمەلەر اشتىق. قازىرگى ۋاقىتتا ورتالىعىمىزداعى 9-سىنىپ وقۋشىسى بي ونەرىنەن «قازاقستان رەكوردتار» كىتابىنا ەندى. مەنىڭ ايتقىم كەلگەنى سەندەردىڭ ءارقايسىلارىڭ وسى «100 ەسىمنىڭ» قاتارىندا بولۋعا لايىقتىسىڭدار. تەك جاس كەزدەرىڭدى بوس ىستەرمەن اۋرەلەمەي، قازىرگى كەزدىڭ وزىندە ۇلكەن جەتىستىككە جەتە الاتىندارىڭدى تۇسىنسەڭدەر دەيمىن، – دەپ اعىنان جارىلدى.

وسكەلەڭ ۇرپاقتىڭ ساناسىندا الەۋمەتتىك جاۋاپكەرشىلىكتى، ءپاتريوتيزمدى نىعايتۋعا باعىتتالعان كەزدەسۋدەن جاستاردىڭ العان اسەرى ەرەكشە. № 3 بايزاق كوللەدجىنىڭ ستۋدەنتى نۇرقاسىم مىڭجاسار: «بۇگىنگى كەزدەسۋدەن كوللەدجىمىزدىڭ جاستارى ەرەكشە اسەر الدى. جيىنعا قاتىسىپ، تاعىلىمدى دۇنيەلەر ايتىپ جاستاردى جىگەرلەندىرگەن قوعام قايراتكەرلەرىنە ەرەكشە العىس ايتامىز. الداعى ۋاقىتتا وسىنداي كەزدەسۋلەر ءجيى ۇيىمداستىرىلسا ءبىز تەك قۋانامىز!» – دەپ كەزدەسۋدەن العان تالىمىمەن ءبولىستى.

شارا ناتيجەسىندە جاستار ءبىلىم-عىلىم سالاسىندا جەتىستىككە جەتىپ، ءوز ىستەرىنىڭ شەبەرى اتانعان كەيىپكەرلەرمەن اشىق اڭگىمەلەسە وتىرىپ «قازاقستاننىڭ 100 جاڭا ەسىمى» جوباسى جەڭىمپازدارىنىڭ ناقتى جەتىستىكتەرىمەن تانىسىپ، بولاشاققا باعدار الدى.