بايزاق اۋدانىندا ارداگەرلەر كەڭەسىنىڭ V پلەنۋمى بولىپ ءوتتى. ونى اۋداندىق ارداگەرلەر كەڭەسىنىڭ ءتوراعاسى كەمەلبەك بەسپايەۆ اشىپ، ەسەپتى كەزەڭدە اتقارىلعان جۇمىستارعا بايلانىستى بايانداما جاسادى.

قازىرگى تاڭدا، اۋداندا 9000 زەينەتكەر تۇرادى. ولار 18 اۋىلدىق وكرۋگتەردەگى ارداگەرلەر كەڭەستەرىنە، 65 باستاۋىش ۇيىمدارىنا بىرىكتىرىلگەن. بايانداماشى ەل مۇددەسى جولىندا ارداگەرلەر قاۋىمىنىڭ تىندىرعان تىرلىكتەرىن العا تارتا كەلە، ەلباسىنىڭ «ۇلت جوسپارى»، «ۇلى دالانىڭ جەتى قىرى» اتتى ماقالالارى مەن مەملەكەت باسشىسى قاسىم-جومارت توقايەۆتىڭ قازاقستان حالقىنا ارناعان جولداۋىنداعى باسىم باعىتتارىن ءتۇسىندىرۋ بويىنشا قولعا الىنعان تىرلىكتەرگە توقتالدى. وبلىس اكىمى اسقار مىرزاحمەتوۆتىڭ حالىقتىڭ ءال-اۋقاتىن كوتەرۋ باعىتىنداعى قاناتقاقتى جوباسىنىڭ ماڭىزىن ءتۇسىندىرۋ، جاستاردى وتانسۇيگىشتىككە تاربيەلەۋ، باستاۋىش ۇيىمداردىڭ جۇمىسىن جاقسارتۋ، اۋداننىڭ 80 جىلدىق مەرەيتويىن اتاپ وتۋدەگى ارداگەرلەردىڭ يگىلىكتى تىرلىكتەرى، وبلىستىق، اۋداندىق دەڭگەيدەگى وتكىزىلگەن سپورتتىق جارىستاردا توپ جارعان بايزاقتىق قاريالاردىڭ جەڭىستەرى، كومەككە ءزارۋ قاريالارعا كورسەتىلەتىن قايىرىمدىلىق شارالارى مەن الداعى ۋاقىتتا قولعا الىنعالى وتىرعان ماڭىزدى ىستەردى جەرگىلىكتى جاعدايمەن بايلانىستىرا باياندادى. مۇنىمەن قاتار، بايانداماشى ارداگەرلەر اراسىندا شاعىن بيزنەستى دوڭگەلەتىپ وتىرعان نەسىپكۇل بايجانوۆا، رىسكەلدى سارشايەۆ جانە بەكجاسار ەرماحانبەتوۆتىڭ، ارداگەرلەر كەڭەسىندەگى جاستار ىسىمەن اينالىساتىن تۇراقتى كوميسسياسىنىڭ ءتوراعاسى سەرىك كەمبايەۆتىڭ، نۇسقامالىق-ادىستەمەلىك كوميسسياسىنىڭ ءتوراعاسى شايمەردەن مىرزالييەۆتىڭ ەسىمدەرىن اتاپ ءوتىپ، الەۋمەتتىك ماسەلەلەر جونىندەگى كوميسسياسى ءتوراعاسى سەرىك بالابەكوۆتىڭ تىكەلەي ۇيىتقى بولۋىمەن اشىلعان الەۋمەتتىك بولمەنىڭ جۇرتقا تيگىزىپ وتىرعان پايداسىن نازاردان تىس قالدىرمادى. ارداگەرلەر كەڭەسى الدىندا تۇرعان مىندەتتەردى جۇمىلا وتىرىپ، ىسكە اسىرىلاتىندىعىن جەتكىزدى.

بايانداما بويىنشا جارىسسوزگە شىققان ارداگەرلەر كەڭەسىنىڭ مۇشەلەرى وزدەرى تۇراتىن اۋلدارداعى ءبىرقاتار ماسەلەلەردى كوتەرىپ، سولاردى نازارعا الۋ جايىندا وتىنىشتەرىن ايتتى.

پلەنۋمدا ءسوز العان اۋدان اكىمى نۇرجان نۇرجىگىتوۆ اۋىلدىق وكرۋگتەردى ارالاپ، جەرگىلىكتى تۇرعىنداردىڭ تىنىس-تىرشىلىگىمەن تانىسۋ بارىسىندا اعىن سۋ، كوگىلدىر وتىن، تازا اۋىز سۋمەن قامتۋ جانە جولداردى جوندەۋ، تۇرعىنداردىڭ ءال-اۋقاتىن كوتەرۋ سىندى مىندەتتەر باعىتىنداعى جۇمىستارعا توقتالدى.

پلەنۋم سوڭىندا كۇن تارتىبىنە شىعارىلعان ماسەلەلەر بويىنشا قاۋلى قابىلداندى.