ەلباسى ن.نازاربايەۆ قازاقستان حالقىنا ارناعان جولداۋىندا: "دەنە شىنىقتىرۋ مەن سپورت مەملەكەتتىڭ ايرىقشا نازارىندا بولۋى ءتيىس. ناق سول سالاۋاتتى ءومىر سالتى ۇلت دەنساۋلىعىنىڭ كىلتى بولىپ سانالادى" - دەپ، حالىقتىڭ دەنە شىنىقتىرۋ جانە سپورتپەن جاپپاي اينالىسۋى ءۇشىن سپورتتىق ينفراقۇرىلىمداردىڭ قولجەتىمدىلىگىن كەڭەيتۋ قاجەتتىگىنە كوڭىل اۋدارعانى بەلگىلى.

وسىعان وراي جامبىل وبلىسىنىڭ تۇكپىر-تۇكپىرىندە جاڭا سپورت نىساندارى اشىلىپ، جەرگىلىكتى ازاماتتاردىڭ بۇقارالىق سپورتپەن شۇعىلدانۋىنا بارىنشا جاعداي جاسالۋدا. وسىنداي نىساننىڭ ءبىرى بايزاق اۋدانىنداعى بۋرىل اۋىلىندا اشىلدى. جەكە كاسىپكەر قۋانىش شەرمەتوۆتىڭ دەمەۋشىلىگىمەن بوي كوتەرگەن جاڭا ءتيپتى شاعىن فۋتبول الاڭىنىڭ اشىلۋ سالتاناتىنا اۋدان اكىمدىگى ىشكى ساياسات ءبولىمىنىڭ باسشىسى سالتانات يمانوۆا، بۋرىل اۋىلدىق وكرۋگىنىڭ اكىمى ەرىك ءالىقۇلوۆ قاتىستى.

سالتاناتتى ساتتە ءسوز العان اۋدان اكىمىنىڭ ورىنباسارى ءداۋىر داۋلەتوۆ ەلدەن شىققان ازامات قۋانىش اسان ۇلىنىڭ ەل يگىلىگى ءۇشىن اتقارعان مارتتىك ىسىنە العىس ايتتى. سونىمەن بىرگە، اۋدان اۋماعىندا اتقارىلىپ جاتقان ءبىرقاتار يگى ىستەرگە توقتالىپ ءوتتى. "مىقتى سپورتشىلاردىڭ كوبى اۋىلدان شىعادى. وسى "الينۇر - ارەنا" شاعىن فۋتبول الاڭىنان ەلگە، الەمگە بەلگىلى ازاماتتار تاربيەلەنىپ شىقسىن" - دەدى ءداۋىر رىسباي ۇلى.

شاعىن فۋتبول الاڭشاسىندا جانكۇيەرلەر وتىراتىن ورىندىق، جاڭا قاقپا، جاساندى توسەنىش سالىنعان. ءوز قاراجاتىنان 15 ميلليون تەڭگە جۇمساپ، زامان تالابىنا ساي شاعىن سپورت الاڭىن سالعان كاسىپكەرگە اۋىل تۇرعىندارىنىڭ العىسى شەكسىز. زەينەتكەر ورىنباي اجىبەكوۆ تۇرعىندار اتىنان ىستىق ىقىلاسىن جەتكىزىپ، اق باتاسىن بەردى. ەلگە تارتۋ ەتىلگەن سپورت الاڭىن جاقسى كۇيدە ۇستاۋ اۋىلدىقتاردىڭ مىندەتى ەكەنىن ايتتى.

سالتاناتتى شارا سوڭىندا جاڭا فۋتبول الاڭىنىڭ لەنتاسىن جەكە كاسىپكەردىڭ اكەسى اسان اقساقال مەن ەڭبەك ارداگەرى ورىنباي اجىبەكوۆ قيىپ، شاشۋ شاشىلدى. اۋىل ونەرپازدارى ەرلان ماشيروۆ "اۋىلعا"، شاردەن اسىلاي "اسسالاۋماعالەيكۋم" اندەرىن اۋەلەتە شىرقادى.

سالتاناتتى جيىن سوڭى اۋىلدىق وكرۋگتەردەن جاساقتالعان سەگىز كوماندا اراسىندا وتكەن فۋتبولدان اۋەسقويلار جارىسىنا ۇلاستى. تۋرنير ناتيجەسىندە "قازترانسگاز" كومانداسى ءبىرىنشى ورىندى يەلەنسە، جۇلدەلى ەكىنشى، ءۇشىنشى ورىندار تيىسىنشە "كوكتال" جانە "قۇمجوتا" كوماندالارىنا بۇيىردى. جارىس جۇلدەگەرلەرى ۇيىمداستىرۋشىلار تاراپىنان كوماندالىق جانە جەكەلەي ديپلومدار، مەدالدار، اقشالاي سىيلىقتارمەن ماراپاتتالدى.