ۆەتەريناريا سالاسىنىڭ نەگىزگى قىزمەتى - اسا ءقاۋىپتى جۇقپالى اۋرۋلاردىڭ الدىن الۋ، اۋرۋلاردى دياگنوستيكالاۋ، مالدان الىناتىن تاماق ونىمدەرى مەن شيكىزاتتاردىڭ ادام ومىرىنە قاۋىپسىزدىگىن قامتاماسىز ەتۋ بولعاندىقتان، وسى ماقساتتا جوسپارلانعان ءىس-شارالار جامبىل وبلىسىندا تولىعىمەن اتقارىلۋدا.

وڭىردە ۆەتەريناريالىق ءىس-شارالاردى 160 ۆەتەريناريالىق پۋنكتەرى بار 11 كوممۋنالدىق مەملەكەتتىك كاسىپورىندار اتقارسا، بۇل مەكەمەلەردە ارنايى ورتا جانە جوعارعى ءبىلىمدى 887 ۆەتەرينار ماماندار جۇمىس جاساۋدا.

2019 جىلى ەپيزووتيالىق ءىس-شارالاردى جۇرگىزۋگە رەسپۋبليكالىق بيۋدجەتتەن 1،5 ملرد. تەڭگە بەكىتىلىپ، تىكەلەي اۋداندىق بيۋدجەتتكە بەرىلدى. بۇل وتكەن جىلعى دەڭگەيدەن 13،3% - عا ارتىق.

-وبلىستا جانۋارلاردىڭ اسا ءقاۋىپتى اۋرۋلارىنا قارسى ۆاكسيناسيا جانە اللەرگيالىق زەرتتەۋلەردىڭ 13 اۋرۋ ءتۇرى بويىنشا، دياگنوستيكالىق زەرتتەۋلەردىڭ 23 اۋرۋ ءتۇرى بويىنشا جوسپارلى ەپيزووتياعا قارسى ءىس-شارالار جۇرگىزىلەدى. وسى ءىس-شارالاردىڭ بارلىعى ءىس-شارالار جوسپارىنا سايكەس جۇرگىزىلۋدە.

قاجەتتى بارلىق ۆەتەريناريالىق پرەپاراتتار الىنىپ، اۋداندارداعى ۋاقىتشا ساقتاۋ ورىندارىنا جەتكىزىلدى. اۋداندارداعى ۆەتەريناريالىق كاسىپورىنداردا پرەپاراتتاردى ۋاقىتشا ساقتايتىن قويمالار بار. ولار ۆەتەريناريالىق تالاپتارعا سايكەس كەلەدى. اۋىلدىق وكرۋگتەردە ۆەتەريناريالىق پرەپاراتتار توڭازىتقىشتاردا ساقتالادى. اۋدان ورتالىعىنان اۋىلدىق وكرۋگتەرگە ۆاكسينالار تەرموچەموداندارمەن تاسىمالدانادى،-دەيدى وبلىس اكىمدىگى ۆەتەريناريا باسقارماسىنىڭ باسشىسى وسپان بەردياروۆ.

دياگنوستيكالىق زەرتتەۋلەرگە جۇرگىزىلگەن تالداۋ بويىنشا مالدار اراسىندا سوزىلمالى برۋسەللەز اۋرۋىنا شالدىعۋ جىلدان جىلعا تومەندەۋدە. 2010-2019 جىلدار ارالىعىندا ءىرى قارا مالداردا برۋسەللەز اۋرۋى 86 پايىزعا تومەندەگەن. ال ۋاق مالداردا برۋسەللەز اۋرۋى – 17 پايىزعا ازايىپ وتىر.

سونداي-اق، وبلىس بويىنشا ادامداردىڭ برۋسەللەز اۋرۋىنا شالدىعۋى 2010 جىلمەن سالىستىرعاندا 255 ادامعا كەمىدى

برۋسەللەزگە شالدىققان اۋىل شارۋاشىلىعى جانۋارلارى دەر كەزىندە وقشاۋلانىپ، ۆەتەريناريالىق تالاپتارعا سايكەس ۋاقىتىلى سانيتارلىق سويۋعا جىبەرىلىپ، مەملەكەتتىك ۆەتەريناريالىق دارىگەردىڭ قاداعالاۋىمەن وڭدەۋ ورىندارىنا جىبەرىلۋدە. بۇل باعىتتاعى جۇمىستار جۇيەلى جالعاسا بەرەتىن بولادى.