ەلىمىز ەگەمەندىك العالى بەرى اۋىل شارۋاشىلىعىن دامىتۋ ماسەلەسى كۇن تارتىبىنەن تۇسكەن ەمەس. ەلباسى-قازاقستان رەسپۋبليكاسىنىڭ تۇڭعىش پرەزيدەنتى ن.نازاربايەۆ قازاقستان حالقىنا جىل سايىنعى جولداۋلارىندا اگروونەركاسىپ كەشەنىن دامىتۋ ماسەلەسىن نازاردان تىس قالدىرعان جوق. مەملەكەت باسشىسى قاسىم-جومارت توقايەۆ تا سالاعا سەرپىلىس سىيلاۋ ماقساتىندا ستراتەگيالىق ماقساتتار قويىپ وتىر.

اۋىل شارۋاشىلىعىن دامىتۋ ماسەلەسى ايتىلعان جەردە ۆەتەريناريالىق قاۋىپسىزدىكتىڭ دە قاتار جۇرەتىندىگى داۋسىز.

بۇگىندە جامبىل وبلىسىنىڭ اۋماعىندا ەنزووتيالىق اۋرۋلارعا قارسى كۇرەستى جۇرگىزۋگە 388 ميلليون تەڭگە ءبولىنىپ، ءمۇيىزدى ءىرى قارا مالىنىڭ تەيلەريوز اۋرۋىنا، جىلقىنىڭ ساقاۋىنا جانە اۋىل شارۋاشىلىعى مالدارىنىڭ سالمونەللەز (قىلاۋ) اۋىرۋىنا قارسى ەگىلەتىن ۆاكسينالارى الىنىپ، الدىن الۋ جۇمىستارى جوسپارعا سايكەس جۇرگىزىلۋدە.

بۇدان بولەك وبلىس كولەمىندە ازىق-تۇلىك ونىمدەرىنىڭ قاۋىپسىزدىگىن قامتاماسىز ەتۋدى باقىلاۋ جانە قاداعالاۋ جۇمىستارى جۇرگىزىلۋدە. وڭىردە 14 ستاسيونارلىق 4 جىلجىمالى ۆەتەريناريالىق-سانيتاريالىق لابوراتوريا جۇمىس اتقارۋدا.

سونىمەن قاتار ايماقتا 10 مال سويۋ پۋنكتى، 50 مال سويۋ الاڭى، 3 ەت وڭدەۋ كومبيناتى جانە 1 قۇس وڭدەۋ كاسىپورنى جۇمىس ىستەيدى.

وبلىس بويىنشا مال ولەكسەلەرىن زالالسىزداندىراتىن 41 بيوتەرميالىق شۇڭقىر جانە مال ولەكسەلەرىن ورتەيتىن 16 ستاسيونارلى، 5 جىلجىمالى بارلىعى 21 ينسينەراتور ىسكە قوسىلعان.

بارلىق ۆەتەريناريالىق نىساندار ۆەتەريناريا بولىمدەرىمەن باقىلاۋعا الىنىپ، ۆەتەريناريالىق زاڭناما تالاپتارى بۇزعىلعان جاعدايدا اكىمشىلىك قۇقىق بۇزۋشىلىق كودەكىسىنىڭ 406 بابىمەن ايىپپۇل سالىنۋى ءتيىس.

وبلىس اكىمدىگى ۆەتەريناريا باسقارماسىنىڭ باسشىسى وسپان بەردياروۆتىڭ ايتۋىنشا، ايماق بويىنشا 2019 جىلدىڭ 9 ايىندا زاڭدى جانە جەكە تۇلعالارعا 8 ميلليون 509 مىڭ 748 تەڭگە ايىپپۇل سالىنىپ، ۆەتەريناريالىق-سانيتاريالىق تالاپتاردى ورىنداۋ ءۇشىن 1186 نۇسقاما بەرىلگەن.

ءسىبىر جاراسى كومىندىلەرىنىڭ كاداسترى بويىنشا وبلىس اۋماعىندا 189 ءسىبىر جاراسى وشاعى بەلگىلەنگەن. بارلىق وشاقتار سانيتاريالىق-ەپيدەميولوگيالىق تالاپتارعا سايكەستەندىرىلىپ، تۇراقتى جەر پايدالانۋ قۇقىعىن بەرەتىن اكتىسى الىنىپ، ءبىرىڭعاي اۆتوماتتاندىرىلعان اقپاراتتىق جۇيەگە ەنگىزىلگەن.