بۇگىندە جامبىل وبلىسىنداعى قورداي اۋدانىندا بۇقارالىق سپورتتىڭ دامىتۋ باعىتىندا تىڭ باستامالار كوتەرىلۋدە. جاڭا نىساندار پايدالانۋعا بەرىلىپ، جاستار اراسىندا ءتۇرلى جارىستار وتكىزىلۋدە. بۇل، ارينە، ەلباسى ساياساتىنىڭ ناتيجەسى ەكەندىگى ءسوزسىز. وسى ورايدا قۇتتى قورداي جەرىندە تۋىپ ءوسىپ، ەلىمىزدىڭ نامىسىن الەمدىك، حالىقارالىق جارىستاردا ابىرويمەن قورعاپ جۇرگەن جالىندى جاستاردىڭ ەسىمدەرىن ايتا كەتكەننىڭ ارتىقتىعى جوق.

2018 جىلى 1-3 اقپان ارالىعىندا يران مەملەكەتىندىڭ تەگەران قالاسىندا وتكەن جەڭىل اتلەتيكادان XXIIءى ازيا چەمپيوناتىندا سۆەتلانا گولەندوۆا 4ح100 مەتر ەستافەتالىق جۇگىرۋدەن جانە جەكەلەي جۇگىرۋدەن ءبىرىنشى ورىن جانە تامىز ايىندا يندونەزيا مەملەكەتىنىڭ دجاكارتا قالاسىندا وتكەن جەڭىل اتلەتيكادان ازيا ويىندارىندا جۇلدەلى ءۇشىنشى ورىندى يەلەنگەن.

سونىمەن قاتار رەسەي فەدەراسياسى اناپا قالاسىندا كيكبوكسينگتان وتكەن الەم كۋبوگى جارىسىندا بەيسەنبەك ماقسات كۇمىس جۇلدەنى، ايدىن تۇردىبەكوۆ قولا مەدالدى جەڭىپ الىپ، قورداي عانا ەمەس قازاقستاننىڭ مارتەبەسىن كوتەرىپ تاستادى.

سونداي-اق ماۋسىم ايىندا وبلىس ورتالىعىندا وتكەن تىرەك-قيمىل اپپاراتى زاقىمدانعان جانە كورۋ قابىلەتى تومەن مۇمكىندىگى شەكتەۋلى سپورتشىلار اراسىندا قازاقستاننىڭ بەسىنشى سپارتاكياداسىنا جامبىل وبلىسىنىڭ ىرىكتەۋ جارىسىندا توعىزقۇمالاقتان شاميل ريشات باس جۇلدەنى جەڭىپ العان. ال جالپى اۋدان بويىنشا جەكەلەي تۇرعىداعى جەتىستىكتەر تۋرالى ءسوز ەتكەندە تومەندەگى سپورتشىلاردىڭ اتى-جوندەرىن العا تارتۋعا بولادى. قازاقستانىڭ جەپكە-جەك سپورت تۇرىنەن بەس دۇركىن چەمپيونى، پانكراتيوننان الەم چەمپيونى، ONE FC جەكپە-جەگىنەن الەم چەمپيونى، كوپتەگەن حالىقارالىق جارىستاردىڭ جەڭىمپازى، قورداي اۋدانى قاراسۋ اۋىلىندا دۇنيەگە كەلگەن يگور سۆيريد، پانكراتيوننان الەم چەمپيونى، كيكبوكسينگتان حالىقارالىق دارەجەدەگى سپورت شەبەرى، قازاقستانىڭ پانكراتيونان ءۇش دۇركىن چەمپيونى، قولمەن كۇرەس سپورت تۇرىنەن حالىقارالىق دارەجەدەگى سپورت شەبەرى، قورداي اۋدانى قورداي اۋىلىندا تۋعان ساعىن قازبەك، الەم كۋبوگىنىڭ يەگەرى، پانكراتيوننان حالىقارالىق دارەجەدەگى سپورت شەبەرى، التى دۇركىن قازاقستان چەمپيونى، قازىرگى تاڭدا كاسىپقوي بوكستا ءۇش كەزدەسۋ وتكىزىپ، ۇشەۋىندە دە جەڭىسكە جەتكەن، قورداي اۋدانى اۋحاتتى اۋىلىنىڭ تۋماسى اسحات جانتۇرسىنوۆ، تاعى دا باسقا كوپتەگەن ساڭلاقتاردى قوردايلىقتار ايرىقشا ماقتان تۇتادى.