ەلباسى ن.نازاربايەۆتىڭ «بولاشاققا باعدار: رۋحاني جاڭعىرۋ» اتتى ماقالاسىندا «ءاربىر ولكەنىڭ حالقىنا سۋىقتا پانا، ىستىقتا سايا بولعان، ەسىمدەرى ەل ەسىندە ساقتالعان ءبىرتۋار پەرزەنتتەرى بار. وسىنىڭ ءبارىن جاس ۇرپاق ءبىلىپ وسۋگە ءتيىس» دەپ اتاپ كورسەتكەن بولاتىن. راسىندا دا، تۋعان جەردىڭ تەكتى توپىراعىنان تالاي تۇعىرلى تۇلعالار تۇلەپ ۇشتى.

قازاققا كەنەندەي ءدۇلدۇل سىيلاعان قاسيەتتى قورداي جەرى ەلىمىزگە اتتارى ءمالىم جۇلدىزدى سپورتشىلارمەن دە بەلگىلى. ايتالىق، زاكير توحتييەۆ 1964 جىلى قورداي اۋدانىنىڭ اۋحاتتى اۋىلىندا دۇنيەگە كەلگەن. ترۋدوۆيك ورتا مەكتەبىن بىتىرگەن. سپورتپەن بالا كەزىنەن اينالىسقان. قازاقتىڭ ت.رىسقۇلوۆ اتىنداعى ەكونوميكالىق ۋنيۆەرسيتەتىڭ بىتىرگەن. ق.مولداجانوۆتىڭ باپتاۋىمەن كاراتە-دو سپورت تۇرىمەن اينالىسىپ، جاپونيادا وتكەن الەمدىك بىرىنشىلىگىندە كەڭەس وداعى بويىنشا تۇڭعىش بولىپ دۇنيە ءجۇزىنىڭ ءابسوليۋتتى چەمپيونى اتاعىن العان. كاسىپقوي بوكستان كەزىندە الدىنا جان سالماعان بىلعارى قولعاپ شەبەرى مارات مازىمبايەۆ، ۋشۋ-ساندو جەكپە-جەگىنەن الەم چەمپيونى، ازيا ويىندارىنىڭ جەڭىمپازى دياس جاماش، ەركىن كۇرەستەن 1998 جىلى ۇلىبريتانيادا جاسوپىرىمدەر اراسىندا وتكەن الەم چەمپيوناتىنىڭ كۇمىس جۇلدەگەرى تولەگەن اقىلبەكوۆ سىندى سپورت ساڭلاقتارى وسى قورداي ولكەسىنەن ءوسىپ ونگەن ازاماتتار.

بۇگىنگى تاڭدا قورداي اۋدانى جاڭا زامان اعىمىنا ساي جاڭاشا سەرپىلىسپەن بيىك جەتىستىكتەرگە جەتىپ كەلەدى. وعان سەبەپ الدىمەن بۇقارا حالىقتىڭ سپورتقا دەگەن جاقسى كوزقاراسى بولسا، ەكىنشى جاعىنان جاڭادان تۇرعىزىلىپ، حالىقتىڭ يگىلىگىنە بەرىلىپ جاتقان سپورت نىساندارى. مىسالى، سۋ جاڭا سوعىلعان 320 كورەرمەنگە ارنالعان دەنە شىنىقتىرۋ-ساۋىقتىرۋ سپورت كەشەنىن ايتساق، بۇل ءزاۋلىم سپورت ورداسىندا ۆولەيبول، باسكەتبول، ۇلكەن تەننيس، جەڭىل اتلەتيكا، كىشى فۋتبول، دزيۋدو، قازاق كۇرەسى جانە ەركىن كۇرەسى تۇرلەرىنەن جاسورەندەر جاتتىعىپ، ۇلكەن سپورتقا قادام باسۋدا.

اۋدان تۇرعىندارىنىڭ بوس ۋاقىتتارىن ءتيىمدى وتكىزۋ جانە بۇقارالىق سپورتپەن شۇعىلدانۋشىلارعا جالپى ءبىلىم بەرەتىن مەكتەپتەردىڭ سپورت زالدارى مەن سپورت نىساندارى كەشكى مەزگىلدە اۋدان تۇرعىندارىنا ەسىگىن ايقارا اشقان، بارىنە قولجەتىمدى. نەگىزى اۋدانداعى ءۇش سپورت مەكتەبىندە سپورتتىڭ 18 تۇرىنەن 126 توپتا 1694 وقۋشى 48 جاتتىقتىرۋشىنىڭ قول استىندا شەبەرلىكتەرىن شىڭدايدى. ال بۇعان اۋلا كلۋبتارىن دا قوسساق بولادى.