قازاقستان رەسپۋبليكاسى دامۋىنىڭ ستراتەگيالىق جوسپارىندا ەلباسى 2020 جىلعا دەيىن رەسپۋبليكامىزدا دەنە شىنىقتىرۋمەن شۇعىلداناتىن حالىقتىڭ پايىزدىق كورسەتكىشىن 30 پايىزعا جەتكىزۋدى تاپسىرعان بولاتىن. وسى ماقساتتا قورداي اۋىلىندا 320 كورەرمەنگە ارنالعان دەنە شىنىقتىرۋ-ساۋىقتىرۋ كەشەنىڭ قۇرىلىسى اياقتالىپ، نۇر-سۇلتان قالاسىنىڭ 20 جىلدىعىنا وراي سالتاناتتى تۇردە اشىلۋى ءوتىپ، تۇرعىلىقتى ەل ءبىر قۋانىپ قالعان-دى. سپورت كەشەنىندە اۋداندىق، وبلىستىق، حالىقارالىق تۋرنيرلەر وتكىزىلەتىن بولعاندىقتان، جوباعا ساي ول بۇقارالىق سپورتتىق ءىس-شارالار وتكىزۋ ورتالىعى بولىپ قۇرىلدى. ايتۋلى سپورت كەشەنى ءبىر جاعىنان قانشاما تالانتتى جاس سپورتشىلاردىڭ توماعاسىن سىپىرۋعا سەبەپ بولاتىن بولسا، ەكىنشى جاعىنان قانشاما ادامعا جۇمىس ورنى تابىلىپ كۇرمەۋى قيىن جۇمىسسىزدىقتىڭ ءتۇيىنى شەشىلۋدە. بۇگىنگى تاڭدا بۇل نىساندا 24 شتاتتىق بىرلىك جانە 19 اۋىلدىق وكرۋگتەردە سپورت ادىسكەرلەرى جۇمىس ىستەيدى.
قازىنالى قورداي اۋدانى اسىرەسە، ۇلتتىق سپورتقا باسا نازار اۋدارعان. كەزىندە بۇل وڭىردە تاليسمان، قاراتوبەل، دايار سەكىلدى اۋزىمەنەن قۇس تىستەگەن، جال قۇيرىعى توگىلگەن جۇزدەن جۇيرىك تۇلپارلار تالاي الامان جارىستىڭ الدىن بەرمەي، قورداي جەرىن قازاقستانعا تانىتقانى بەلگىلى. قوردايلىقتار ات سپورتىمەن بىرگە باسقا دا ۇلتتىق ويىنداردى جاڭعىرتىپ كەلەدى. ايتالىق، 2018 جىلدىڭ ناۋرىز ايىنان باستاپ ۇلتتىق سپورت تۇرلەرى بويىنشا توعىزقۇمالاق، اسىق اتۋ، اۋدارىسپاق، قازاق كۇرەسى، قۇسبەگىلىك، قىز قۋۋ، تەڭگە ءىلۋ، كوكپار تارتۋ ويىندارىن دامىتۋ ماقساتىندا №3 بالالار – جاسوسپىرىمدەر سپورت مەكتەبى ءوز الدىنا شاڭىراق كوتەرسە، بۇگىنگى تاڭدا ۇلتتىق سپورت تۇرلەرىنەن اۋداندىق دەڭگەيدە 4 بىردەي ءدۇبىرلى جارىس وتكىزىلىپ، وبلىس بويىنشا ەكى بىردەي الامان جارىسقا قاتىسىپ قانجىعالارى مايلانا تۇسكەن ەكەن.
«شىنىقساڭ شىمىر بولاسىڭ» دەيدى حالىق دانالىعى. راسىندا دا سپورتقا بەت بۇرىپ، سالاماتتى ءومىر سالتىن سەرىك ەتكەندەردىڭ سەرگەك جۇرەتىندىگى بەسەنەدەن بەلگىلى. ال، بۇل تۇرعىدا ەلباسىنىڭ بۇقارالىق سپورتتى دامىتۋ تۋرالى تاپسىرماسى نەگىزگى باعدارشام. وسى ورايدا قورداي اۋدانىندا جاڭا نىساندار سالىنىپ، ەل يگىلىگىنە ۇسىنىلۋدا. ەڭ باستىسى ەل-جۇرتتىڭ دا سپورتقا دەگەن كوزقاراسى دۇرىس. سونىڭ ناتيجەسىندە وسكەلەڭ ۇرپاق تا كەمەل كەلەشەككە نىق قادام باسۋدا.
