تاراز قالاسىندا «رۋحاني جاڭعىرۋ» باعدارلاماسى نەگىزىندە «قۇندى ولكەتانۋ قۇجاتتارىن سيفرلاۋ» جوباسى قول الىندى. جوبا اياسىندا جەرگىلىكتى اۆتورلاردىڭ شىعارمالارى مەن كىتاپحانا قورىنداعى ءبىرقاتار كىتاپتاردىڭ سيفرلى نۇسقاعا اۋىسىپ، وقىرمان سۇرانىسىن ەلەكتروندى فورماتتا وتەۋگە كوشتى، دەپ جازادى Qamshy.kz اقپارات اگەنتتىگى.
جاستارعا ولكە تاريحىن تانىتۋدى ماقسات ەتكەن جوباعا ساي 18 جەرگىلىكتى اۆتورمەن كەلىسىم-شارتتار جاسالدى. بۇل كەلىسىمگە كەلگەن شىعارماشىل جانداردىڭ 56 اتالىممەن جارىق كورگەن 810 دانا كىتابى سيفرلى فورماتقا اۋىستىرىلدى. مۇنداعى 37 اتاۋىمەن جارىق كورگەن 688 دانا مەملەكەتتىك تىلدە. جاسامپاز، جاڭاشىل جوبا اياسىندا سيفرلى فورماتقا كوشىرىلگەن كىتاپتاردىڭ بارلىعى دا كىتاپحانانىڭ دەرەكقورىنا ەنگىزىلدى.
جامبىل وبلىستىق تاريحي-ولكەتانۋ مۇراجايىندا دا «قۇندى ولكەتانۋ قۇجاتتارىن سيفرلاۋ» ءساتتى جۇزەگە اسىرىلىپ كەلەدى. ماقساتتى جۇرگىزىلگەن جۇمىستار ناتيجەسىندە اعىمداعى جىلى «فوتوارحيۆ» دەرەك قورىنا 623 فوتوقۇجات ەنگىزىلدى.
جالپى وڭىردە قۇندى مالىمەتتەردى ەلەكتروندىق فورماتقا كوشىرۋ جۇمىستارى قارقىندى جۇرگىزىلىپ كەلەدى. «سيفرلى قازاقستان» مەملەكەتتىك باعدارلاماسىنان تۋىنداعان بۇل جاۋاپتى مىندەتتەرگە ساي 2020 جىلعا دەيىن بارلىق قازاقستاندىق اۆتورلاردىڭ كىتاپتارى سيفرلىق فورماتقا كوشىرىلمەك. سايكەسىنشە وڭىردەگى كىتاپحانالاردىڭ پايدالانۋ اۋقىمىن كەڭەيتۋ جۇمىستارى كەڭەيە ءتۇستى. ەندىگى جەردە وبلىس اۋماعىنداعى كىتاپحانالار وقىرمانداردىڭ سۇرانىسىن وتەپ قانا قويمايدى. ولارعا جەرگىلىكتى تۇرعىندارعا سيفرلىق-اقپاراتتىق قىزمەت ۇسىنۋ جاۋاپكەرشىلىگى قوسا جۇكتەلمەك. كەزەڭ-كەزەڭىمەن وبلىستاعى 274 مەملەكەتتىك كىتاپحانا ءوڭىر تۇرعىندارىنا جاڭا فورماتتا قىزمەت كورسەتە باستايدى. 2018 جىلدان بەرى وسى ماقساتتا وبلىستاعى 130 كىتاپحانا جانىنان سيفرلاندىرىلعان اقپاراتتىق جانە كوۆوركينگ ورتالىقتارى اشىلعان. مۇنداعى 18 نىسان كوۆوركينگ، ال نىسان 112 - سيفرلاندىرىلعان اقپاراتتىق ورتالىق ەتىپ جابدىقتالدى. وبلىس ورتالىعىنان شالعاي ەلدى مەكەندەردە قۇرىلعان 107 سيفرلاندىرىلعان اقپاراتتىق ورتالىق ينتەرنەتكە قول جەتكىزە الماي وتىرعان ءوڭىر تۇرعىندارىنىڭ كادەسىنە جاراپ كەلەدى. ولاردىڭ كەيبىرى «ەلەكتروندى ۇكىمەت» جۇيەسىمەن ءبىرقاتار مەملەكەتتىك قىزمەت تۇرلەرىن ۇسىنادى. وبلىستا جىل سوڭىنا دەيىن وسىنداي 19 سيفرلاندىرىلعان اقپارات ورتالىعى اشىلماق.
پىكىر قالدىرۋ