قوعامنىڭ ءومىرىنىڭ سان سالاسىنا تۇرەن سالىپ، تاريحقا قايتا ءۇڭىلۋ ارقىلى وتكەندى تانۋعا باعىت بەرگەن ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا تاراز قالاسىندا دا ايتۋعا تۇرارلىق شارۋا اتقارىلدى، دەپ جازادى Qamshy.kz اقپارات اگەنتتىگى. 

ءوز كەزەگىندە بۇل جۇمىستاردىڭ ءوز دەڭگەيىندە اتقارىلۋى قالالىق جوبالىق وفيس پەن قالالىق اكىمدىكتىڭ ءجىتى نازارىندا. ءارى بۇل قۇرىلىمدار باعدارلامالىق ماقالادان تۋىنداعان مىندەتتەردى ىسكە اسىرۋ، ناسيحاتتاۋ جۇمىستارىندا ەسەپتى كەزەڭگە جاسالعان جوسپارعا يەك ارتادى.

–بيىلعى جوسپارعا تاراز قالاسى كولەمىندە اتقارىلاتىن 86 ءىس-شارا ەنگىزىلدى. جىل باسىنان بەرى سان ءتۇرلى باعىتتار مەن جوبالاردى قامتىعان بۇل شارالاردىڭ 58ء-ى وتكىزىلدى. اتالعان شارالارعا 17 352 تارازدىق قاتىستى. ال جوسپارعا ساي 86 ءىس-شارا 36 282 قالا تۇرعىنىن قامتىماق. سونداي-اق باعدارلامالىق ماقالادان تۋىندايتىن كىشى باعدارلامالاردىڭ دا ءوز دەڭگەيىندە ىسكە اسىرىلعانىن اتاپ وتكەن ءجون. ماسەلەن تاراز قالاسىندا «رۋحاني قازىنا» كىشى باعدارلاماسى بويىنشا 4 جوبا قولعا الىنسا، «تاربيە جانە ءبىلىم» كىشى باعدارلاماسى بويىنشا دا 4 جوبا ۇيىمداستىرىلىپ جاتىر. سونداي-اق «اتامەكەن» كىشى باعدارلاماسى اياسىندا 1 جوبا ىسكە اسىرىلۋدا. بۇل جوبالارعا قارالعان جالپى قاراجاتتىڭ كولەمى 82،3 ميلليون تەڭگەنى قۇرايدى. «بولاشاققا باعدار: رۋحاني جاڭعىرۋ» باعدارلامالىق ماقالاسىنىڭ كىشى باعدارلامالارى اياسىندا ۇيىمداستىرىلعان 382 ءىس-شارا 60 350 قالا تۇرعىنىن قامتىدى،–دەيدى قالا اكىمىنىڭ ورىنباسارى كەنجەبەك ولجاباي.

سونداي-اق «رۋحاني جاڭعىرۋ» ءراسىمى اياسىندا وتكىزىلگەن «تارازدىڭ تۇرلەنۋى» اتتى ىسكەرلىك-ارىپتەستىك كەزدەسۋى، «TARAZ FILM SCHOOL» كينو مەكتەبىنىڭ تۇلەكتەرىنە سەرتيفيكات تابىستاۋ راسىمدەرى تارازدىقتاردىڭ جادىندا ساقتالعانى انىق. مۇنان بولەك «ءسىز وقۋعا ءتيىس الەمدىك 100 كىتاپ» ادەبيەت اللەياسى مەن «قازاقستانداعى تاريحي ورىندار» اتتى كىتاپ كورمەسى دە وبلىس ورتالىعى تۇرعىندارىنىڭ رۋحاني جان دۇنيەسىن بايىتا ءتۇستى. وبلىستىڭ 80 جىلدىق مەرەيتويى اياسىندا جاڭعىرعان جەڭىس ساياباعىندا اۋدان ونەرپازدارىنىڭ قاتىسۋىمەن وتكىزىلگەن «جامبىلىم قانداي تاماشا» اتتى كونسەرتتىك باعدارلاماسىندا دا تارازدىقتار ۇلتتىق ونەردىڭ قادىر-قاسيەتىن جەتە سەزىنە الدى. وسىناۋ شارالارعا قالا تۇرعىندارىنىڭ بەلسەندى قاتىسۋىنان تاريحي شاھارداعى «رۋحاني جاڭعىرۋ» باعدارلاماسىنىڭ ءوز دەڭگەيىندە قولعا الىنعانى اڭعارىلادى.