ءورت – ءتىلسىز جاۋ. توسىننان تۋىندايتىن توتەنشە جاعدايدا ادام مەن مال-مۇلىك شىعىنىن بولدىرماس ءۇشىن جەدەل قىزمەتتىڭ جۋىق ارادا ورنالاسۋى اسا ماڭىزدى. وسىعان وراي، جامبىل وبلىسىنىڭ شالعاي جاتقان ەلدى مەكەندەرىندە ءورت ءسوندىرۋ بەكەتتەرى قۇرىلۋدا. سونىڭ ءبىرى جۋىردا مەركى اۋدانىنىڭ انداس باتىر اۋىلىندا اشىلدى.

اۋدان بيۋدجەتىنىڭ شاعىندىعىن ەسكەرە وتىرىپ، مەركى اۋدانى اكىمىنىڭ كەلىسىمىمەن 2019 جىلى انداس باتىر اۋىلىندا ءورت ءسوندىرۋ بەكەتىن كەزەڭ-كەزەڭمەن قۇرۋ جوسپارى جاسالىپ، وبلىس اكىمىنىڭ ءبىرىنشى ورىنباسارى بەكىتىلدى. اۋداندىق بيۋدجەتتەن بەكەتتى ۇستاۋ ءۇشىن 5 ملن. 244 مىڭ تەڭگە ءبولىندى. اتالعان بەكەت التى شتاتتىق قىزمەتكەرلەرمەن جاساقتالعان.

رەسىمدەۋ جانە ماتەريالدىق-تەحنيكالىق بازانى قۇرۋ جۇمىستارى تولىق اياقتالعان سوڭ انداس باتىر اۋىلىندا ءورت ءسوندىرۋ بەكەتىنىڭ اشىلۋ سالتاناتى ءوتتى.

جاڭا ءورت ءسوندىرۋ بەكەتىنىڭ اشىلۋ ءىس-شارالارىنا مەركى اۋدانى اكىمىنىڭ ورىنباسارى مەيىرجان سۇلەيمەنوۆ، انداس باتىر اۋىلدىق وكرۋگى اكىمى بەيبىت مازييەۆ، جامبىل وبلىسى توتەنشە جاعدايلار دەپارتامەنتىنىڭ مەركى اۋدانى توتەنشە جاعدايلار ءبولىمى مەن ءورت ءسوندىرۋ ءبولىمىنىڭ قىزمەتكەرلەرى، سونداي-اق انداس باتىر اۋىلىنىڭ تۇرعىندارى قاتىستى.

ءورت ءسوندىرۋ بەكەتى انداس باتىر اۋىلدىق وكرۋگى اكىمدىگى اپپاراتىنىڭ عيماراتىندا ورنالاسقان. وندا دەمالۋ بولمەسى، تەلەفون بايلانىسىمەن قامتاماسىز ەتىلگەن ديسپەچەرلىك بولمە جانە ءورت ءسوندىرۋ اۆتوموبيلىنە ارنالعان جىلى بوكس بار.

جاڭادان قۇرىلعان ءورت ءسوندىرۋ بەكەتىنىڭ كومانداسى جانۋعا شىعىپ قانا قويماي، ولاردىڭ جاۋاپكەرشىلىك ايماعىندا بولىپ جاتقان باسقا دا توتەنشە جاعدايلاردى جويۋعا قاتىسادى، قيىن جاعدايعا تاپ بولعان ادامدارعا كومەك كورسەتەدى، حالىققا كومەك كورسەتەدى، سونداي-اق الدىن الۋ جۇمىستارىمەن اينالىسادى.

ءورت ءسوندىرۋ بەكەتىنىڭ جاۋاپكەرشىلىك ايماعىندا 20 شاقىرىم راديۋستا 8 مىڭنان استام تۇرعىنى بار 7 ەلدى مەكەن ورنالاسقان.

وبلىستىق تجد مەركى اۋدانى توتەنشە جاعدايلار ءبولىمى مەن ءورت ءسوندىرۋ ءبولىمى قىزمەتكەرلەرى بەكەتىنىڭ اشىلۋ سالتاناتى اياقتالعاننان كەيىن ءورت ءسوندىرۋ بەكەتىنىڭ جەكە قۇرامىمەن شارتتى ءورتتى ءسوندىرۋ بويىنشا تەوريالىق جانە پراكتيكالىق ساباقتار وتكىزدى، جاتتىعۋلار بارىسىندا ولاردىڭ ءورت كەزىندەگى ىس-ارەكەتتەرى، ءورت كەزىندە ءورت اۆتوكولىگىنەن سۋ بەرۋ جانە سۋ كوزدەرىنەن سۋ الۋ امالدارى پىسىقتالدى.

«ءورت ءسوندىرۋ بەكەتتەرىن قۇرۋ جۇمىستارى تۇراقتى باقىلاۋدا جانە ودان ءارى جالعاساتىن بولادى» – دەيدى وبلىستىق توتەنشە جاعدايلار دەپارتامەنتىنىڭ ماماندارى.