جامبىل وبلىسىندا 1 مەن 6 جاس ارالىعىنداعى بالالاردى مەكتەپكە دەيىنگى تاربيەمەن جانە وقىتۋمەن تولىق قامتۋ ماقساتىندا بالاباقشالار مەن شاعىن ورتالىقتار كوپتەپ اشىلۋدا. ناتيجەسىندە، بالدىرعانداردى قامتۋ كورسەتكىشى 100 پايىزعا جۋىقتاپ قالدى. مۇنداي ناتيجەگە اۋدانداردا بالالار باقشالارىن اشۋ ءىسىنىڭ ىلگەرىلەۋى دە ءوز سەپتىگىن تيگىزىپ وتىر.
بالاباقشا اشۋدى مىقتاپ قولعا العان اۋدانداردىڭ ءبىرى – ت. رىسقۇلوۆ اۋدانى. اۋدانداعى اقىرتوبە اۋىلىندا ءقازىر ەكى بالالار باقشاسى بار. ونىڭ بىرەۋى مەملەكەتتىك تە، ەكىنشىسى، جەكەمەنشىك بوبەكجاي. اۋداندىق ءبىلىم بەرۋ بولىمىنە قارايتىن «بولاشاق» بالاباقشاسىنا 65 ءبۇلدىرشىن بارىپ ءجۇر. بۇرىن اۋداندا بالالاردى باقشالارعا ورنالاستىرۋ اجەپتاۋىر ماسەلە ەدى. كەيىنگى كەزدە ارالاس ياعني، مەملەكەتتىك باقشامەن جەكەمەنشىك باقشانىڭ سەرىكتەسۋى ارقاسىندا پايدا بولعان مەكەمەلەر كوبەيىپ، باقشا كەزەگى اناعۇرلىم ازايعان. ايتۋ ءلازىم، كاسىپكەرلەر ءوز قاراجاتتارىنا باقشا سالىپ، ونى جارتىلاي مەملەكەت مەنشىگىنە وتكىزىپ، بىرلەسە جۇمىس ىستەۋدە. مۇنداي جاعدايدا مەملەكەت تاراپىنان ءار بالاعا 24500 تەڭگە قاراجات بولىنەدى.
اقىرتوبە اۋىلىندا وتكەن جىلدىڭ قىركۇيەك ايىندا اشىلعان «اياۋلىم» جەكەمەنشىك بوبەكجايىندا بۇگىندە ەلۋ ءبۇلدىرشىن تاربيەلەنۋدە. بوبەكجايدى اشقان اۋدانىمىزعا بەلگىلى پارتيا جانە مەملەكەت قايراتكەرى بولىپ زەينەتكە شىققان «قازاقستان رەسپۋبليكاسىنىڭ ءبىلىم بەرۋ ءىسىنىڭ قۇرمەتتى قىزمەتكەرى» زاۋرەش ورىنقۇل قىزى تويبەكوۆا. ز. تويبەكوۆانىڭ اقىرتوبە اۋىلىنان جەكەمەنشىك بوبەكجاي اشۋى الدىمەن اۋىل تۇرعىندارىنا جاساعان ۇلكەن جاقسىلىعى بولدى.
– بوبەكجاي اشۋ كوپتەن بەرى ويىمدا ءجۇر ەدى. «تۋعان جەرگە تۋىڭدى تىك» دەمەي مە؟ اۋىلداعى ءبىر بالاباقشا جالپى تۇرعىن حالىقتىڭ سۇرانىسىن وتەي المايدى عوي. سوندىقتان ون ءۇش-ون ءتورت بولمەلى تۇرعىن ءۇيدى بوبەكجايعا اينالدىرىپ، اسحاناسىنا دەيىن سالىپ، بىتىردىك. ءتورت تاربيەشى، ءبىر ادىسكەر، ءبىر حورەوگراف، ەكى بالا كۇتۋشى مەن ەكى اسپاز، بارلىعى 23 ادام بالالارعا ايانباي قىزمەت كورسەتۋدە، – دەيدى زاۋرەش ورىنقۇل قىزى شىرت ۇيقىدا جاتقان بۇلدىرشىندەردى وياتىپ المايىن دەپ، اقىرىن سويلەپ.
«ايىنا التى مىڭ تولەماقى دەگەن نە ءتايىرى، ەڭ باستىسى بالالارىمىز قاراۋسىز كوشەدە قالماي مەيىرىمدى دە كىشىپەيىل ادامداردىڭ قامقورلىعىنا كوشتى» دەيدى ءقازىر كەز كەلگەن اۋىل تۇرعىنىنان سۇراي قالساڭىز. ايتكەنمەن «اياۋلىمعا» كەزەكتە تۇرعانداردىڭ سانى 20-عا جەتىپتى.
مۇندا بالالاردىڭ دا، تاربيەشىلەردىڭ دە بوس ۋاقىتى جوق. بوبەكجايدا ءبارى دە الدىن الا جاسالعان جوسپار، باعدارلاماعا سايكەس وتەدى. دەگەنمەن باقشا مەڭگەرۋشىسى زاۋرەش تويبەكوۆا الدىن بولجاپ، الداعى جىلى تاعى دا 50 بالاعا ارنالعان مەكتەپكە دەيىنگى دايىندىق توبىن اشۋدى كوزدەپ وتىر.
سول ءۇشىن ارنايى جەر ءبولىنىپ، الداعى كوكتەمدە قۇرىلىس جۇمىستارىن باستاماقشى بولىپ وتىر ەكەن.
پىكىر قالدىرۋ