جامبىل وبلىسى تۇرعىندارىنىڭ قاۋىپسىزدىگىن قاداعالاۋ ماقساتىندا قازاقستان رەسپۋبليكاسى اۋىل شارۋاشىلىعى مينيسترلىگىنىڭ ۆەتەريناريالىق باقىلاۋ جانە قاداعالاۋ كوميتەتىنىڭ جامبىل وبلىستىق اۋماقتىق ينسپەكسياسى ايماقتىڭ ەپيزووتيالىق احۋالىن تولىق باقىلاۋدا ۇستاپ وتىر. اتالعان جۇمىستار ناتيجەسىندە، جانۋارلار ارقىلى تارايتىن ءتۇرلى ءقاۋىپتى اۋرۋلاردىڭ تارالۋىنا جول بەرىلمەي وتىر.

ماسەلەن، 2018 جىلى وبلىس بويىنشا 9 وشاقتا برۋسەللەز اۋرۋىنان ساۋىقتىرۋ ءىس-شارالارى جۇرگىزىلسە، بيىل وبلىس بويىنشا 5 وشاقتا ساۋىقتىرۋ ءىس-شارالارى جۇرگىزىلدى. ونىڭ ىشىندە 1 وشاقتاعى ساۋىقتىرۋ جۇمىستارى 2018 جىلدان اۋىسىپ، 2019 جىلى جالعاستىرىلىپ، ناتيجەسىندە قويىلعان شەكتەۋلەر الىندى. 2019 جىلدىڭ 4 وشاعىنان بارلىعى 5461 باس ۇساق مالداردان، 30 باس ءمۇيىزدى ءىرى قارادان، 14 باس ەت قورەكتىدەن 2-4 رەتتەن قان الىنىپ، 18 باس ۇساق مال برۋسەللەزگە وڭ ناتيجە كورسەتىپ، سانيتاريالىق سويۋعا جىبەرىلدى، 5000 شارشى مەتر قورا-جايلار زالالسىزداندىرىلدى.

ادامداردىڭ برۋسەللەزبەن اۋىرۋىن ەپيدەميولوگيالىق تۇرعىدان تالداۋ بارىسىندا 2017 جىلى 212 ادام، 2018 جىلى 200 ادام اۋىرىپ تىركەلسە، 2019 جىلدىڭ 9 ايىندا 147 ادام اۋىرىپ، اۋرۋدىڭ جۇعۋى تومەندەۋدە.

سونىمەن قاتار، شەتەلدەن الىپ كەلىنگەن اسىل تۇقىمدى مالداردان اۋرۋ تاراماۋى دا اۋماقتىق ينسپەكسيا باقىلاۋىندا تۇر. بۇل رەتتە، ينسپەكسيا ماماندارى اتالعان ءتورت تۇلىكتى تولىق تەكسەرۋدەن وتكىزىپ كەلەدى. اتاپ ايتار بولساق، جامبىل وبلىسىنا 2018 جىلى رەسەي فەدەراسياسى مەن چەحيا رەسپۋبليكاسىنان بارلىعى 1717 باس اسىل تۇقىمدى ءمۇيىزدى ءىرى قارا مالدارى اكەلىنسە، 2019 جىلى رەسەي، چەحيادان، اۆستريادان، گەرمانيادان بارلىعى 4174 باس اسىل تۇقىمدى ءمۇيىزدى ءىرى قارا مالدارى اكەلىندى. ۆەتەريناريالىق-سانيتاريالىق تالاپتارعا سايكەس اكەلىنگەن ءمۇيىزدى ءىرى قارا مالدارى كارانتينگە قويىلىپ، ءتيىستى ۆەتەريناريالىق ءىس-شارالار جۇرگىزىلىپ، كارانتين الىندى.

جاۋاپتى ماماندار ۆەتەريناريالىق-سانيتاريالىق باقىلاۋ جۇمىستارىن دا قاتاردان قالدىرماي كەلەدى. 2018 جىلى وبلىس بويىنشا 19 تەكسەرۋلەر جۇرگىزىلىپ، 54 جەكە جانە زاڭدى تۇلعالارعا اكىمشىلىك قۇقىق بۇزۋشىلىق كودەكسىنىڭ 406 بابىنىڭ نەگىزىندە 1 887 925 تەڭگە ايىپپۇل سالىنىپ، 43 نۇسقاما بەرىلسە، 2019 جىلدىڭ 9 ايىندا 27 جەكە جانە 1 زاڭدى تۇلعالارعا اكىمشىلىك قۇقىق بۇزۋشىلىق كودەكسىنىڭ 406 بابىنىڭ نەگىزىندە 789 063 تەڭگە ايىپپۇل سالىنىپ، 56 نۇسقاما بەرىلگەن.

ال، جەرگىلىكتى اتقارۋشى ورگانداردىڭ ۆەتەريناريالىق ماماندارى 282 تۇلعالارعا 8 168 873 تەڭگە ايىپپۇل سالىپ، 1186 دانا نۇسقاما بەردى. وبلىس بويىنشا بارلىعى 310 تۇلعاعا 8 957 936 تەڭگە ايىپپۇل سالىنعان.