جامبىل وبلىسىنىڭ ديقاندارى وڭىردەگى قىزىلشا القاپتارىنىڭ كولەمىن جىل وتكەن سايىن كەڭەيتىپ كەلەدى. بۇعان وبلىس باسشىلىعىنىڭ ءتاتتى ءتۇبىر وسىرۋشىلەرگە جاساپ وتىرعان قولايلى جاعدايى ۇلكەن سەپتىگىن تيگىزۋدە. جىل باسىندا بالتامىر ەككەن شارۋالار جاقىندا ءونىم جيناۋعا كىرىسىپ كەتتى.

اتالعان ىستە بايزاق اۋدانىنىڭ ديقاندارى الدىڭعى قاتاردان كورىنىپ وتىر. اۋداننان اتتانعان العاشقى بولىپ ءتاتتى ءتۇبىر تيەگەن اۋىر جۇك كولىكتەرىن تاراز قانت زاۋىتى قابىلدادى.

بۇگىندە اۋىل شارۋاشىلىعى داقىلدارىنىڭ ىشىنەن ەڭ نەگىزگىسى بۇل قانت قىزىلشاسى بولىپ وتىر. ءتاتتى ءتۇبىردى ءوسىرۋ، ونىڭ كولەمىن ۇلعايتۋ جانە ونىمدىلىگىن ارتتىرۋ اۋدانىمىزدىڭ ماڭىزدى ستراتەگيالىق سالاسى بولىپ قالا بەرمەك.

وسى باعىتتا اۋدان باسشىلىعى تاراپىنان اۋقىمدى ىستەر اتقارىلىپ، اۋدان كولەمىندەگى قانت قىزىلشاسىن ەككەن شارۋاشىلىقتاردىڭ الدىڭعى قاتارىندا اپتانىڭ بەيسەنبىسى كۇنى قوستوبە اۋىلدىق وكرۋگىندەگى “زۋلۋف-وگلى” شارۋا قوجالىعى تاراز قالاسىندا ورنالاسقان قانت زاۋىتىنا ءوز ونىمدەرىن وتكىزدى.

شارۋا قوجالىق جەتەكشىسى وسمان زۋلۋف-وگلى ۇستىمىزدەگى جىلى ءوز يەلىگىندەگى جەردىڭ ەلۋ بەس گەكتارىنا قانت قىزىلشاسىن ەكسە، ونىڭ ون بەس گەكتارىن تامشىلاتىپ سۋارۋ تەحنولوگياسى بويىنشا وتىرعىزىپتى. اتالمىش شارۋا قوجالىقتا بەس ادام ەڭبەك ەتسە، ناۋقان كەزىندە قوسىمشا قاجەتتىلىگىنە بايلانىستى ادامدار جۇمىسپەن قامتىلادى ەكەن.

مەملەكەتتىك قولداۋ ناتيجەسىندە شارۋالارعا بارلىق جاعداي جاسالىپ جاتقانىن اتاپ وتكەن شارۋا تۇقىم سەبۋدەن باستاپ ءونىم العانعا دەيىن جۇمىستى ساپالى جۇرگىزۋ جونىندەگى ىس-تاجىريبەسىن ورتاعا سالدى. وسى القاپتاعى قانت قىزىلشاسى ۇنەمى باقىلاۋدا ۇستالىپ، ۋاقىتىلى سۋارۋ، ءتۇرلى تىڭايتقىشتاردى بەرۋ، ءتۇبىن قوپسىتۋ، ارامشوپتەن تازالاۋ ناتيجەسىندە بۇگىندە ەگىس القابى جايقالىپ تۇر. “بۇل - بالا سياقتى، بابى مەن كۇتىمى كەلىسسە عانا ءونىم بەرەدى”، - دەيدى وسمان زۋلۋف-وگلى.

قوجالىق باسشىسىنا ساتتىلىك تىلەگەن ءبىز قانت قىزىلشاسى تيەلگەن كەرۋەنمەن ىلەسىپ تاراز قالاسىنداعى قانت زاۋىتىنا بەت الدىق. مۇندا قاز-قاتار ساپ تۇزەگەن اۋىر جۇك كولىكتەرى رەتىمەن تارازىعا ءتاتتى ءتۇبىردى ولشەتىپ، كەزەگىمەن ءتيىستى ورىنعا اۋدارىپ جاتتى.

“وزدەرىڭىز كورىپ تۇرعانداي، بۇگىننەن باستاپ اۋداندا قانت قىزىلشاسىن جيناۋ باستالدى. اۋدان بويىنشا ۇستىمىزدەگى جىلى 1207 گەكتار قانت قىزىلشاسى جينالادى دەپ وتىرمىز. بيىل قانت زاۋىتىنا 35-36 مىڭ توننا شاماسىندا ءتاتتى ءتۇبىر وتكىزۋ جوسپاردا بار. قانت زاۋىتىنا العاشقى بولىپ “زۋلۋف-وگلى” شارۋا قوجالىعى قانت قىزىلشاسىن وتكىزۋدە. ولار ءار گەكتاردان 600 سەنتنەردەن ءونىم الۋعا ءۇمىتتى” - دەيدى بىزگە بەرگەن سۇحباتىندا اۋدان اكىمىنىڭ ورىنباسارى بولات ساعىنبەكوۆ.

وسىلايشا، اۋا-رايىنىڭ قولايلى ءساتىن ءتيىمدى پايدالانىپ قالۋعا ۇمتىلعان اۋدان شارۋالارى قانت قىزىلشاسى القابىندا قىزۋ ەڭبەككە كىرىسىپ تە كەتتى.