جامبىل وبلىسىندا قىزىلشا القابىن ۇلعايتۋ بويىنشا ءبىرقاتار جۇيەلى جۇمىستار اتقارىلدى. الدىڭعى جىلدارى ۇزدىك شارۋا قوجالىقتاردىڭ جۇمىسىمەن جەكە تانىسىپ، وزىق تەحنولگيالاردى مەڭگەرۋ، بۇگىنگى زامان تالابىنا ساي تىڭايتقىشتاردى ءتيىمدى پايدالانۋدى كوزبەن كورسەتىپ، قولمەن ۇستاتاتىن ۇلكەن باسقوسۋ دا ۇيىمداستىرىلعان ەدى. سول جۇمىستاردىڭ ناقتى ناتيجەمەن ۇشتاسقاندىعىنا ءتاتتى ءتۇبىر جيناپ جاتقان ديقانداردىڭ ەڭبەگى دالەل بولىپ وتىر.

ءتاتتى ءتۇبىر وسىرۋدە الدىڭعى قاتاردا كەلە جاتقان اۋدانداردىڭ ءبىرى – توعىز جولدىڭ تورابىنداعى شۋ اۋدانى. مۇندا بيىلدان باستاپ قانت قىزىلشاسىن ەگۋدى قولعا العان ىرگەلى سەرىكتەستىكتەردىڭ ءبىرى – «قىزىلشا» ج ش س.

«اۋدانعا قانت قىزىلشاسىن ەگۋ ءۇشىن بىلتىر كۇزدە 300 گەكتار جەردى دايىندادىق. ماۋسىمدىق جۇمىس كەزىندە 40-قا جۋىق ينجەنەر، وپەراتور، اگرونومدار مەن اۋىلشارۋاشىلىعى ماقساتىنداعى 20 تەحنيكا تىنىمسىز ەڭبەك ەتتى. بۇنىڭ ءبارى قۇرىلىس جۇمىستارى انە-مىنە باستالاتىن قانت زاۋىتىن شيكىزاتپەن قامتۋدىڭ قامى. ال، زاۋىت پايدالانۋعا بەرىلگەنگە دەيىن شيكىزاتتى مەركى اۋدانىنداعى قانت زاۋىتىنا وتكەرەتىن بولامىز. بيىلعى جىلدىڭ ونىمدىلىگى ويداعىداي بولدى. كەلەسى جىلى قانت قىزىلشاسى القابىن 1000 گەكتارعا دەيىن ۇلعايتۋدى كوزدەپ وتىرمىز. ءقازىر جەردى كوكتەمگى جۇمىستارعا دايىنداۋ جۇمىستارى جۇرگىزىلۋدە» - دەيدى «قىزىلشا» ءجشس-نىڭ وندىرىستىك ديرەكتورى باعدات بەلگىبايەۆ.

قانت قىزىلشاسىن ەگۋ جۇمىستارىن ءساۋىر ايىنىڭ باسىندا باستاعان سەرىكتەستىك بۇگىنگى كۇنى 306 گەكتار جەردى تولىعىمەن يگەرگەن. ولار 300 گەكتارعا نەمىستىڭ «اكاسيا» جانە «ۆيوريكا» سىندى تۇقىمىن ەگىپ، قالعان 6 گەكتار اۋماققا وزدەرىنىڭ زەرتحاناسى ءۇشىن وزگە دە تۇقىمداردى ەگىپتى. اتالمىش سەرىكتەستىكتىڭ قۇرىلعانىنا كوپ ۋاقىت بولماسا دا، ولاردىڭ ماتەريالدىق-تەحنيكالىق الەۋەتتەرى ۇلكەن. ءقازىر مۇندا 300 گەكتار جەردەگى قانت قىزىلشاسىن جيناۋ جۇمىستارى باستالىپ كەتتى. بۇگىنگى تاڭدا 20 گەكتار جەردەگى شيكىزات جينالعان بولسا، قاراشا ايىنىڭ 15-نە دەيىن بۇل جۇمىستار تولىق اياقتالماق. بۇل ماقساتتا ءدال ءقازىر 25 ادام مەن 10-نان اسا تەحنيكا تىنباي ەڭبەك ەتۋدە.

«قىزىلشا» جاۋاپكەرشىلىگى شەكتەۋلى سەرىكتەستىگى 300 گەكتار القاپتان بولەك، 2 گەكتار اۋماققا قانت قىزىلشاسىنىڭ 12 ءتۇرلى سۇرپىن سەۋىپتى. بيىلعى جىلدىڭ كورسەتكىشى بويىنشا 123 گەكتار جەرگە ەگىلگەن نەمىستىڭ «ۆيوريكا» تۇقىمى مول ءونىم بەرسە، 80 گەكتار جەردەگى «اكاسيا» دەپ اتالاتىن ءتۇرىنىڭ ونىمدىلىگى تومەن بولىپ تۇرعان كورىنەدى. ال اۋدان اكىمىنىڭ ورىنباسارى ءاليحان بالقىبەكوۆتىڭ ايتۋىنشا، جالپى اۋدان شارۋالارى قازان ايىنىڭ 10-نان باستاپ جاپپاي جيىن-تەرىن جۇمىستارىن باستاپ كەتكەن.

– بيىل اۋدان بويىنشا 725 گەكتار القاپقا قانت قىزىلشاسى سەبىلگەن بولاتىن. ونىڭ ىشىندە 465 گەكتارى عانا ساقتالىپ وتىر. قازىرگى كەزدە ەسكى-شۋ، قونايەۆ جانە دۋلات اۋىلدىق وكرۋگتەرىندەگى جيىن-تەرىن جۇمىستارى ءوز دەڭگەيىندە ءجۇرىپ جاتىر. ءتۇسىمى دە جامان ەمەس. سونىمەن بىرگە، «قىزىلشا» ج ش س بيىلدان باستاپ قانت زاۋىتىنىڭ قۇرىلىسىن باستاماق. سول سەبەپتى، كەلەسى جىلى اۋدان شارۋالارى تابىسى كول-كوسىر قانت قىزىلشاسىن كوپتەپ ەگىپ، اۋدانىمىزدىڭ اتىن الىسقا شىعارادى دەگەن سەنىمدەمىن، - دەيدى ءاليحان ءابىلاش ۇلى.