جالعاس جۇماعۇلوۆ پەن ءالي باگاۋتينوۆتىڭ اراسىنداعى جەكپە-جەك قازاقستاندىق سپورتشىنىڭ جەڭىسىمەن اياقتالدى دەپ حابارلايدى Qamshy.kz اقپارات اگەنتتىگى sports.kz سايتىنا سىلتەمە جاساپ. 

ونىڭ باستى جەكپە- جەگى قازاقستاندىق جالعاس جۇماعۇلوۆ (12-3) پەن رەسەيلىك ءالي باگاۋتينوۆتىڭ (19-6) اراسىندا ءوتتى. باسكە جۇماعۇلوۆقا تيەسىلى Fight Nights Global چەمپيونى تيتۋلى تىگىلدى. بەس راۋندقا ەسەپتەلگەن جەكپە-جەكتە تورەشىلەردىڭ شەشىمىمەن جۇماعۇلوۆ جەڭىسكە جەتتى.

وسىلايشا جالعاس جۇماعۇلوۆ ءوزىنىڭ چەمپيوندىق تيتۋلىن ءساتتى قورعاپ، كاسىبي كارەراسىنداعى ون ءۇشىنشى جەڭىسىنە قول جەتكىزدى. ال بۇرىن UFC-دە باعىن سىناعان رەسەيلىك سپورتشى جەتىنشى رەت جەڭىلىسكە ۇشىرادى.

ءالي باگاۋتينوۆتىڭ تورەشىلەردىڭ شەشىمىنە كوڭىلى تولمادى.

"نەگىزى مامانداردىڭ بارلىعى دا مەنىڭ جەڭگەنىمدى ايتىپ جاتىر. تورەشىلەردىڭ شەشىمىمەن داۋلاسپايمىن، ءبىراق ءبىز مەنىڭ كومانداممەن بىرگە اپەللياسياعا بەرەمىز. قالاي بولاتىنىن كورە جاتارمىز. مەنىڭ جەكپە-جەگىم ءۇشىن قانشاما اقشا تىگىلدى. مۇمكىن، جالعاسقا جانكۇيەر بولعاندار كوپ اقشا جەڭىپ العان بولار. بۇل قاراجاتتى ولار قايىرىمدىلىققا، مۇقتاج بالالارعا مەن ناۋقاستارعا بەرسىن"، - دەدى باگاۋتينوۆ.