قازاقستان رەسپۋبليكاسىنڭ اتا زاڭىندا مەملەكەتىمىزدىڭ باستى كاپيتالى – ونىڭ ازاماتتارى ەكەنى انىق جازىلعان. بۇل رەتتە، قازاقستاندىقتاردىڭ دەنساۋلىعىن ساقتاۋ، ءومىر ءسۇرۋ ساپاسىن جاقسارتۋ مەن جاسىن ۇزارتۋ ماقساتىندا جوسپارلى جۇمىستار جۇرگىزىلۋدە. بۇل رەتتە، تۇرعىنداردىڭ دەنساۋلىق ساقتاۋ نىساندارىمەن تولىق قامتىلۋى اسا ماڭىزدى. بۇل رەتتە جامبىل وبلىسىندا مەديسينالىق نىسانداردىڭ قۇرىلىسى قارقىندى ءجۇرىپ جاتىر.

اتاپ ايتار بولساق، قازىرگى ۋاقىتتا ايماقتا 65 العاشقى مەديسينالىق-سانيتارلىق كومەك كورسەتۋ نىساندارىنىڭ قۇرىلىسىن جۇزەگە اسىرۋ شارالارى جالعاسۋدا. بۇل جوبالاردىڭ جالپى قۇنى 2،013،7 ملن.تەڭگەنى قۇرايدى. ونىڭ ىشىندە، مەديسينالىق پۋنكتتەرگە 26 ملن.تەڭگە، فەلدشەرلىك-اكۋشەرلىك پۋنكتتەرگە 30 ملن. تەڭگە، دارىگەرلىك امبۋلاتوريالارعا 35 ملن.تەڭگە بولىنگەن. ايتا كەتەر جايت، بۇل قاراجاتقا عيماراتتاردى ساتىپ الۋ ادىسىمەن، جوسپارعا سايكەس، مەديسينالىق نىساندار جىل سوڭىنا دەيىن پايدالانۋعا بەرىلىپ، مەديسينالىق ۇيىمداردىڭ عيماراتتارىنا قاجەتتىلىك قاناعاتتاندىرىلاتىن بولادى.

سونىمەن بىرگە، وتكەن جىلى وبلىستا 200 توسەكتىك وبلىستىق ونكولوگيالىق ديسپانسەر عيماراتىنىڭ قۇرىلىس باستالعان بولاتىن. قۇرىلىس جۇمىستارىنىڭ جالپى قۇنى 13،9 ميلليارد تەڭگەنى قۇرايدى.

بۇدان بولەك، «اۋىل – ەل بەسىگى» جوبا اياسىندا بايزاق اۋداندىق ورتالىق اۋرۋحاناسىندا كۇردەلى جوندەۋ، اعىمداعى جوندەۋ جۇمىستارى جۇرگىزىلىپ، اياقتالدى. سونىمەن قاتار، شۋ اۋدانىنداعى ەڭبەكشى جانە جاڭا جول دارىگەرلىك امبۋلاتورياسىنا كۇردەلى جوندەۋ جۇمىستارى جۇرگىزىلىپ، اياقتالدى.

بايزاق اۋدانىندا 250 كەلۋشىگە ارنالعان ەمحانا قۇرىلىسى رەسپۋبليكالىق بيۋدجەتتەن بولجامدىق قۇنى – 2،084 ملرد.تەڭگەنى قۇراپ، پيلوتتىق جوبانىڭ جول كارتاسىنا ەنگىزىلدى. قۇرىلىس جۇمىستارىنىڭ مەرزىمى 2022-2023 جىلدار ارالىعىندا جۇرگىزىلۋ جوسپارلانعان.

سونداي-اق، قورداي اۋدانىندا 250 كەلۋشىگە ارنالعان ەمحانا سالىنباق. «دەنساۋلىق ساقتاۋ وبەكتىلەرىن سالۋ» جول كارتاسىنا سايكەس قولعا الىنعان جۇمىسقا جوبالاۋ سمەتالىق قۇجاتىن دايىنداۋ ءۇشىن جەرگىلىكتى بيۋدجەت ەسەبىنەن 22،4 ملن.تەڭگە ءبولىندى. جۇرگىزىلگەن جۇمىستار ناتيجەسىندە مەردىگەر انىقتالىپ، جوبالاۋ سمەتالىق قۇجاتتاما مەملەكەتتىك ساراپتاماعا تاپسىرىلدى. سونىمەن قاتار، 270 ورىندىق اۋرۋحانا قۇرىلىسىن جۇرگىزۋگە جوبالاۋ سمەتالىق قۇجاتتاماسىن دايىنداۋ ءۇشىن قاراشا ايىندا بيۋدجەتتى ناقتىلاۋ بارىسىندا قارجى قاراستىرۋ جوسپارلانۋدا. اتالعان ەمحانا جانە اۋرۋحانا قۇرىلىسىنىڭ بولجامدىق قۇنى 9،2 ملرد.تەڭگەنى قۇرايدى.

شۋ اۋدانىنىڭ ورتالىق اۋداندىق اۋرۋحاناسىنا ەمحانا عيماراتىن جاپسارلاس سالۋ «اۋىل – ەل بەسىگى» جوباسىمەن جۇزەگە اسىرىلۋدا. ىسكە اسىرىلۋ مەرزىمى 2019-2020 جىلدار ارالىعى. سمەتالىق قۇنى 304،3 ملن. تەڭگە.