مەملەكەت باسشىسى قاسىم-جومارت توقايەۆ وبلىسقا ساپارى بارىسىندا وڭىردە تۋريزم يندۋسترياسىن دامىتۋدىڭ ماڭىزدىلىعىن ەسكەرىپ، ايماق باسشىسى اسقار مىرزاحمەتوۆكە الماتى، تۇركىستان جانە جامبىل وبلىستارىن بايلانىستىراتىن «جاڭا جىبەك جولى» ەكسپەديسيالىق مارشرۋتىنىڭ تۋريستىك ينفراقۇرىلىمىن دامىتۋدى تاپسىرعان بولاتىن. وسى ورايدا، وتكەن اپتادا «جاڭا جىبەك جولى» تۋريستىك جوباسى جان-جاقتى تالقىلانىپ، وبلىستاعى تۋريستىك ورىنداعى اقپاراتتىق تۋر ۇيىمداستىرىلدى.

اتالعان جيىنعا الماتى قالاسى مەن الماتى وبلىسى، شىمكەنت قالاسى مەن تۇركىستان وبلىستارىنىڭ تۋريستىك باسقارمالارى مەن اتالعان سالاعا قاتىستى قاۋىمداستىقتاردىڭ وكىلدەرى قاتىستى. ءۇش كۇنگە سوزىلعان شارانىڭ العاشقى كۇنى ش.ۋاليحانوۆ اتىنداعى ورتالىقتاندىرىلعان امبەباپ-عىلىمي كىتاپحاناسىندا پرەسس-بريفينگ ءوتتى. وندا وبلىستىق تۋريزم باسقارماسىنىڭ باسشىسى قارلىعاش ارالبەكوۆا «جاڭا جىبەك جولى» ەكسپەديسيالىق مارشرۋتى قازاقستان ايماقتارىنا جاسالاتىنەڭ ءىرى ەكسپەديسيا ەكەندىگىن جەتكىزىپ، وسى ارقىلى تۋريستىك كلاستەرلەردى قامتي وتىرىپ، ماڭىزدى تابيعي نىساندارعا بارۋ كوزدەلگەنىن ءسوز ەتتى.

– بۇل شارانىڭ ماقساتى – جاڭا تۋريستىك باعىتتاردى جاساۋ ءۇشىن تابيعي، تاريحي، كيەلى مەكەندەردى زەرتتەۋ، ىشكى تۋريزم مەن ينفراقۇرىلىمدى دامىتۋ جانە تۋعان ەلدى زەرتتەۋ. سونداي-اق ەكسپەديسيا تۋرالى ماتەريالدار ەلىمىزدىڭ تۋريستىك دەستانسيا رەتىندە تانىلۋىنا جانە حالىقتى ىشكى تۋريزمگە تارتۋعا ىقپال ەتەدى. اتالعان شارانىڭ ناتيجەسىندە ەلىمىزدىڭ تابيعي نىساندارى بويىنشا تۋريستىك باعىتتار، ساپالى فوتو-ۆيدەوبانكتەر قۇرىلادى. ولاردىڭ قازىرگى جاعدايى تۋرالى اقپاراتتار الىنىپ، جولنۇسقا جاسالاتىن بولادى. ايتا كەتەرلىگى، قىتايدىڭ سينسزيان-ۇيعىر اۆتونوميالىق اۋدانىنان باستالاتىن ەكسكۋرسيا الماتى وبلىسىن قامتىپ، ءبىزدىڭ وبلىس ارقىلى وتەدى. ودان كەيىن ءوڭىردىڭ تاريحي-مادەني ورىنلدارىنىڭ بارلىعىن ارالاپ، مارشرۋت تۇركىستان وبلىسىندا جالعاسادى. ساپار وزبەكستان رەسپۋبليكاسىندا مارەسىنە جەتەدى، – دەدى قارلىعاش ءامىر قىزى.

مۇنان سوڭ ءار وبلىستان جيىلعان تۋريستىك سالا وكىلدەرى «جاڭا جىبەك جولى» ەكسپەديسيالىق مارشرۋتىن الماتى، تۇركىستان جانە جامبىل وبلىستارىندا دامىتۋدىڭ جولدارىن تالقىلادى. ونداعى ينفراقۇرىلىمدار مەن تۋريستەرگە جاسالاتىن جاعدايدىڭ جاي-جاپسارىن تالقىلادى. ايتا كەتەرلىگى، ءبىزدىڭ وڭىردەن اتالعان مارشرۋتقا 18 تاريحي-مادەني ورىن كىرىپ وتىر.

ەكسپەديسيانىڭ نەگىزگى شاراسىنان سوڭ تاراز قالاسىنىڭ اۋماعىنا ەكسكۋرسيا ۇيىمداستىرىلدى. تۋريستىك سالا وكىلدەرى «كونە تاراز» ارحەولوگيالىق پاركى، داۋىتبەك كەسەنەسى، ەرتە يسلام داۋىرىندەگى مەشىت، قازاق حاندىعىنا 550 جىل، ايشا ءبيبى جانە بابادجا حاتۋن كەسەنەلەرىندە بولدى. سونداي-اق جۋالى اۋدانىنداعى تەرىس اششىبۇلاق سۋ قويماسى مەن قارالما تاۋ-شاڭعى بازاسى، «بيتيان» قالاشىعى مەن كوكساي شاتقالىندا بولىپ، تۋريستىك الەۋەتتەرىنە كوز جەتكىزدى.

ءۇش كۇنگە سوزىلعان ەكسكۋريانىڭ قالعان ەكى كۇنىندە قاتىسۋشىلار ت.رىسقۇلوۆ، مەركى، شۋ جانە قورداي اۋداندارىنداعى تاريحي-مادەني ەسكەرتكىشتەرمەن تانىستى. ءوز كەزەگىندە سالا ماماندارى جاسالىنۋى ءتيىس جۇمىستارعا توقتالىپ، ۇسىنىستارىن ءبىلدىردى.