تابيعاتى كورىكتى جامبىل وبلىسىنداعى جۋالى اۋدانىنىڭ شاقپاق اۋىلدىق وكرۋگىندەگى ءتاتتىباي دۇيسەباي ۇلى اۋىلىنىڭ ۇستىندەگى تاۋ بوكتەرىندە «قارالما» تاۋ-شاڭعى بازاسىنىڭ قۇرىلىسى وتكەن جىلدىڭ جازىندا باستالعان. وبلىس اكىمى اسقار مىرزاحمەتوۆتىڭ باستاماسىمەن قولعا الىنعان دەمالىس ايماعىندا وبلىس تۇرعىندارى مەن قوناقتارى بيىلدىڭ وزىندە-اق دەمالۋعا مۇمكىندىك الادى.

جوبالىق قۇنى 3 ملرد 355 ملن تەڭگەنى قۇرايتىن تۋريستىك ايماق «ىشكى جانە كىرۋ ءتۋريزمىن دامىتۋ» جوباسى اياسىندا جۇزەگە اسىرىلۋدا. جالپى كەشەننىڭ قۇرىلىسىنا 274 گا جەر تەلىمى بولىنگەن. بۇگىندە تاۋ-شاڭعى بازاسىنا قاجەتتى ينفراقۇرىلىمدار – جول، اۋىز سۋ، گاز قۇبىرى جانە ەلەكتر قۋاتىن تارتۋ جۇمىستارىنىڭ دەنى ورىندالعان. اۋىلعا كىرەبەرىستەن سولعا قاراي تاۋ بوكتەرىنە دەيىن كوسىلگەن كەڭ جولاقتى اۆتوجولدىڭ قۇرىلىسى اياقتالۋعا جاقىن. ونى تارازدىق «اييا-سەرۆيس» ج ش س سالىپ جاتىر. ءدال ءقازىر تىكەلەي بازا ورنالاساتىن تاۋ بوكتەرىندە بوي كوتەرەتىن كوتتەدجدەر قالاشىعىندا قۇرىلىس جۇمىستارى قىزۋ قارقىن الىپ وتىر. 17 كوتتەدجدىڭ ىرگەتاسى ورنى قازىلىپ، قۇيىلۋدا. كەيبىر كوتتەجدەردىڭ قابىرعاسى قالانىپ، توبەسى جابىلىپ جاتىر.

دەمالىس ايماعىندا كاسىبي دەڭگەيدەگى سىرعاناۋ جولدارى جاسالىپ، زاماناۋي ۇلگىدەگى اسپالى جول تەڭىز دەڭگەيىنەن 2000 مەتر بيىكتىككە تاۋدىڭ ۇشار باسىنا دەيىن ورناتىلاتىن بولادى. وعان قاجەتتى جابدىقتاردىڭ بارلىعى تولىعىمەن جەتكىزىلگەن.

قارى قالىڭ، قىسى ۇزاققا سوزىلاتىن اۋداننىڭ تابيعاتى جىل ون ەكى اي بويىنا تۋريستەردى تارتۋعا تاپتىرمايتىن ورىن. تەك اۋا رايى عانا ەمەس، لوگيستيكالىق جاعىنان دا ءتيىمدى ايماق. بۇل جەر كورشىلەس جاتقان جامبىل جانە تۇركىستان وبلىستارىنىڭ قاق ورتاسىندا، حالىقارالىق «باتىس ەۋروپا-باتىس جۇڭگو» اۆتودالىزىنەن دە قول سوزىم جەردە تۇر. بۇل تۋريستەردىڭ جول-جونەكەي سوعىپ، ەمىن-ەركىن دەمالىپ كەتۋىنە مۇمكىندىك بەرەدى.

تاۋ-شاڭعى كەشەنى ەۋروپالىق ستاندارتتارعا ساي سالىنۋدا. ول ىسكە قوسىلعاندا تاۋلىگىنە ءۇش مىڭعا دەيىن ساياحاتشىنى قابىلدايتىن بولادى. مۇندا تۋريستەرگە بارلىق سپورتتىق-ساۋىقتىرۋ جانە مادەني-ويىن-ساۋىق قىزمەتتەرى كورسەتىلەدى. ولار قولجەتىمدى باعاعا ساپالى قىزمەت الىپ قانا قويماي، تاۋدىڭ جۇپار ساف اۋاسىمەن تىنىستاپ، جان قالاۋىنا ساي دەمالاتىن بولادى. قوناقۇيلەر مەن مەيرامحانالاردىڭ ەسىگى ايقارا اشىلادى.

تاۋ شاتقالىنداعى جۇمىستار مەملەكەتتىك-جەكەشەلىك ارىپتەستىك اياسىندا جالعاسادى. جوسپار بويىنشا كەشەننىڭ قۇرىلىسى جەلتوقسان ايىنا دەيىن اياقتالىپ، پايدالانۋعا بەرىلمەك.

وبلىستىق تۋريزم باسقارماسى جوبا جۇزەگە اسقان جاعدايدا وڭىردەگى ىشكى جانە كىرۋ تۋريزمىنەن تۋريستىك اعىم ورتا ەسەپپەن 45 000 تۋريسكە كوبەيەدى دەپ بولجامداپ وتىر.