مەملەكەت باسشىسى قاسىم-جومارت توقايەۆ ءوز جولداۋىندا ەلىمىز شاعىن جانە ورتا بيزنەستى دامىتۋعا قاتىستى جۇمىستاردى ارمەن قاراي جۇرگىزە بەرەتىندىگىن ايتقان ەدى. «شاعىن، اسىرەسە، ميكروبيزنەس ەلىمىزدىڭ الەۋمەتتىك-ەكونوميكالىق جانە ساياسي ومىرىندە ماڭىزدى ءرول اتقارادى. اتاپ ايتقاندا، ەڭ الدىمەن، اۋىل تۇرعىندارىنا تۇراقتى جۇمىس بەرەدى، جۇمىسسىزدىقتى ازايتادى. سونىمەن قاتار، سالىق بازاسىن قۇراپ، جەرگىلىكتى بيۋدجەتتى نىعايتادى. سونداي-اق، جاپپاي كاسىپكەرلىكتى دامىتۋ ساناعا سىڭگەن پاتەرناليستىك پيعىل مەن ماسىلدىقتان ارىلۋعا مۇمكىندىك بەرەدى. سوندىقتان مەملەكەت الداعى ۋاقىتتا دا بيزنەسكە قولداۋ كورسەتە بەرەدى. بۇل ماقساتقا ۇلتتىق قوردان 100 ميلليارد تەڭگەگە جۋىق قارجى ءبولىندى» دەپ كاسىپكەرلەرگە ءتيىستى قولداۋلار كورسەتىلەتىن ناقتىلادى. پرەزيدەنت كاسىپكەرلىكتى دامىتۋدىڭ ۇلگى بولارلىق مىسالدارى ەلىمىزدە جەتكىلىكتى ەكەندىگىن ايتىپ، شاعىن كاسىپكەرلىكتى بۇكىل قوعام بولىپ قولداۋ كەرەكتىگىن العا تارتتى. «ۇكىمەتكە ميكرو جانە شاعىن بيزنەس سالاسىنداعى كومپانيالاردى تابىسقا سالىناتىن سالىقتان ءۇش جىلعا بوساتۋ ءۇشىن زاڭنامالىق بازا ازىرلەۋدى تاپسىرامىن. ءبىز بيزنەستىڭ ادال ءارى زاڭعا سايكەس جۇرگىزىلەتىنىنە سەنەمىز» دەپ بيزنەس وكىلدەرىنە ۇلكەن سەنىم ءبىلدىردى. بۇل دەگەنىمىز كەلەشەكتە ەلىمىز بويىنشا شاعىن جانە ورتا بيزنەسكە دەگەن قولداۋ ەسەلەنەدى دەگەن ءسوز.

بۇگىندە ازاماتتاردى كاسىپكەرلىككە باۋلۋ، ونىڭ قىر سىرىن ۇيرەتۋ – مەملەكەتتىڭ ماڭىزدى باعىتتارىنىڭ ءبىرى. بۇل باعىتتا اۋقىمدى جۇمىستار اتقارىپ جۇرگەن «اتامەكەن» كاسىپكەرلىك پالاتا قىزمەتكەرلەرىنىڭ ەڭبەگىن ەلەپ، ەرەكشە اتاپ وتكەنىمىز ءجون بولار. جۋىردا اتالمىش پالاتانىڭ ت. رىسقۇلوۆ اۋداندىق فيليالى قىزمەتكەرلەرىنىڭ ۇيىمداستىرۋىمەن ىلكىمدى ءىس-شارالاردىڭ ءبىرى ءوتتى. شارا بارىسىندا قۇلان اۋىلشارۋاشىلىعى كوللەدجىنىڭ ستۋدەنتتەرى مەن مەكتەپ وقۋشىلارى كاسىپكەرلەرمەن كەزدەسىپ، ولاردىڭ اتقارىپ وتىرعان جۇمىستارمەن جاقىن تانىستى. ستۋدەنتتەر مەن وقۋشىلار ەڭ الدىمەن پالاتانىڭ اۋداندىق كەڭسەسىندە جينالىپ، وندا فيليال ديرەكتورى نۇرلان ساپاربەكوۆ جاستارعا ەكسكۋرسيانىڭ ماقسات-مىندەتىن ءتۇسىندىردى. ودان بولەك نۇرلان گيززات ۇلى كەڭسەگە كەلىپ، كاسىپكەرلىككە قاتىستى تەگىن كەڭەس الۋعا بولاتىنىن، بيزنەس جوبانى جاساۋ جولدارىن، كاسىپكەرلەردىڭ قۇقىقتارىن، «باستاۋ بيزنەس» پەن «جاس كاسىپكەر» باعادارلامالارىنىڭ شارتتارىن بايانداپ بەردى.

ىزىنەن شاراپاتى مول ءىس-شارا ەكسكۋرسياعا ۇلاستى. ستۋدەنتتەر مەن وقۋشىلار وتىرعان ميكرواۆتوبۋس ەڭ الدىمەن «كاۋسار» ءسان سالونىنا كەلىپ توقتادى. ستۋدەنتتەر وندا سالوننىڭ جۇمىسىمەن تانىسىپ، كاسىپكەرمەن جەكە تىلدەستى. ايتا كەتۋ كەرەك، سالون يەسى ءداريا «باستاۋ بيزنەس» جوباسى بويىنشا ءبىلىم الىپ، مەملەكەتتىك گرانتتىڭ يەگەرى اتانعان. كەلەسى ايالداما «قاليماش» كونديتەرلىك سەحى بولدى. بىلىمگەرلەر وندا ءار ءتۇرلى ءتاتتى ونىمدەردىڭ دايارلانۋىن ءوز كوزدەرىمەن باقىلادى. سونىمەن قاتار، جاستار «زەينەپ»، «تاستانبەكوۆ ب.ت.»، «اققۋ» جەكە كاسىپكەرلىكتەرىن ارالاپ، جيھاز جاساۋ، قۇس جانە ەشكى شارۋاشىلىعىنىڭ جۇمىستارىمەن جاقىن تانىسىپ، ۇلكەن اسەرگە بولەندى.