بۇگىنگى تاڭدا جەمقورلىق ماسەلەسى تەك قازاقستاندا عانا ەمەس، الەمنىڭ باسقا دا ەلدەرى ءۇشىن اسا وزەكتى ماسەلە بولىپ تابىلادى. قاي مەملەكەتتە بولسا دا ەڭ ءقاۋىپتى قۇبىلىس – جەمقورلىقتىڭ جايىلىپ، پاراقورلىقتىڭ دەندەۋى. سىبايلاس جەمقورلىقتىڭ ءورشىپ تۇرعان كەزىندە قوعام ەشقاشان العا باسپايدى، كەرىسىنشە مەملەكەتتىڭ دامۋى تەجەلەدى. قازاقستاننىڭ بۇل ماسەلەدەگى احۋالى وسى قوعامنىڭ كەز كەلگەنىنىڭ الاڭىنا اينالدى. بۇگىندە ءبىزدىڭ قوعامدا جەمقورلىق پەن پاراقورلىق ارالاسپاعان سالا قالمادى. سەبەبى، سىبايلاس جەمقورلىق ۇلتتىق شەكتەۋلەردى بىلمەيدى. ول بارلىق جەرلەردە كەڭ تارالعان. سىبايلاس جەمقورلىق حالىقتى قاناۋدىڭ كولەڭكەلى كورىنىسى بولا وتىرىپ، ادامزات قوعامىنىڭ دامۋ كەزەڭدەرىنەن قالىسپاي كەلەدى. ول بارلىق ۋاقىتتا دا سىنعا ۇشىراپ، ايىپتالىپ، ونىمەن ۇنەمى كۇرەس جۇرگىزىلىپ كەلەدى. سىبايلاس جەمقورلىق قۇبىلىسىنىڭ قاۋىپتىلىگى –ول مەملەكەتتىك بيلىك قىزمەتىنە حالىقتىڭ سەنىمدىلىگىن جوعالتادى. سوندىقتان دا، وسىناۋ الەۋمەتتىك قۇبىلىس ۇلتتىق قاۋىپسىزدىككە تىكەلەي قاتەر توندىرەدى. بۇل رەتتە، قوعام دەرتىنىڭ جاستار اراسىندا جايىلۋىن بولدىرماۋ اسا ماڭىزدى.

وسىعان وراي، م.ح.دۋلاتي اتىنداعى تاراز مەملەكەتتىك ۋنيۆەرسيتەتىندە «جاستار اراسىندا سىبايلاس جەمقورلىققا قارسى مادەنيەتتى قالىپتاستىرۋدىڭ ەرەكشىكتەرى» تاقىرىبىندا اشىق سەمينار-ديسكۋسسيا وتكىزىلدى. ۋنيۆەرسيتەتتىڭ №2 ستۋدەنتتىك جاتاقحاناسىندا وتكەن شارانى «سانالى ۇرپاق» ءفرونت-وفيسى ۇيىمداستىردى.

ءىس-شاراعا قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتى باسقارماسىنىڭ باسشىسى داۋرەن وماروۆ، زاڭ فاكۋلتەتىنىڭ دەكانى زاۋرەش ابدۋكاريموۆا، «سانالى ۇرپاق» ستۋدەنتتىك كلۋبىنىڭ مۇشەلەرى، ۋنيۆەرسيتەتتىڭ وقىتۋشىلار مەن ستۋدەنتتەر قاتىستى.

د. وماروۆ ءوزىنىڭ سوزىندە جاستارعا سىبايلاس جەمقورلىققا قارسى ءىس-قيمىل ورگاندارىنىڭ سوڭعى كەزدە اتقارعان جۇمىستارى جونىندە ايتىپ ءوتتى. سونىمەن قاتار ول بىرنەشە قىزمەت بارىسىندا كەزدەسكەن وقيعالارعا توقتالدى، جانە دە سەمينارعا قاتىسۋشىلاردى ادالدىققا، پاراساتتىلىققا بەيىمدەلۋگە شاقىردى.

ءوز كەزەگىندە ز.ابدۋكاريموۆا بارلىق ستۋدەنتتەردى ءوز بىلىمدەرىن ادال جولمەن الۋ كەرەكتىگى تۋرالى اڭگىمەنى قوزعادى. قازىرگى كەزدەگى ەڭبەك نارىعىندا تەك كاسىبي ماماندارعا، تەك ءوز سالاسىنىڭ شەبەرلەرىنە سۇرانىس بولاتىندىعى جايلى، وڭاي جولمەن كەلگەن تابىستىڭ بەرەكەسى بولمايتىندىعى تۋرالى ايتتى.

جيىندى زاڭ فاكۋلتەتى بويىنشا «سانالى ۇرپاق» ستۋدەنتتىك كلۋبىنىڭ ءتورايىمى سەيتقاسىم اقبوتا جالعاستىردى. ول ەڭ الدىمەن قاتىسۋشىلاردى كلۋبتىڭ نەگىزگى ماقساتتارىمەن، جۇمىسىمەن تانىستىرىپ شىقتى، جانە دە سونىڭ قاتارىنا ستۋدەنتتەردى كوسىلۋعا ۇگىتتەدى.

اياعىندا سەمينارعا قاتىسۋشىلار تاقىرىپ اياسىندا پىكىر الماستى، كەلگەن قوناقتارعا ساۋالدارىن قويىپ، تولىققاندى جاۋاپتار الدى، سونىمەن قاتار پاراساتتى قوعامدى قۇرۋعا ءبىر قادام جاسادى دەپ ايتۋعا بولادى.