سوزگە شەبەر، ىسكە ۇستا حالقىمىزدىڭ زور مادەنيەتى مەن ونەرىن پاش ەتەتىن قۇندىلىقتاردىڭ ءبىرى – قولونەر. اعاشتان، تەمىردەن ءتۇيىن تۇيگەن، جۇننەن كوز جاۋىن الاتىنداي بۇيىم جاساعان. سونىمەن قاتار اسىل تاستاردان ءسان بۇيىمدارىن سوققان، سۇيەك پەن ءمۇيىزدى، ءشيدى قيىنىنان قيىستىرعان حالىق شەبەرلەرىنىڭ ءىسى ماقتاۋعا تۇراتىنداي ونەر تۋىندىسى سانالادى.

قۇدىرەت تاۋىلبايەۆ جامبىل وبلىسى جۋالى اۋدانىنداعى بايتەرەك اۋىلىنداعى №2 بالالار ونەر مەكتەبىندە قولونەر ءپانىنىڭ ءمۇعالىمى بولىپ جۇمىس ىستەپ، بالالاردى ساندىك قولدانبالى ونەرگە باۋلۋدا. ول كوبىنەسە ۇلتتىق اسپاپتىڭ تۇرلەرىن، ەر-تۇمان، استاۋ، وجاۋ جانە تاعى دا باسقا زاتتاردى اعاشتان ويىپ جاسايدى. قولونەر بۇيىمدارىن جاساۋ ءۇشىن قاراعاش، باقاتەرەك، جاڭعاق اعاشتارىن پايدالانادى.

شەبەردىڭ ارمانى مەن ماقساتى – قولونەر بۇيىمدارىن جاساۋدى دامىتۋ، ونى جاستارعا ۇيرەتۋ، شاكىرت تاربيەلەۋ.

- قازاق حالقى سالت-داستۇرگە، ادەت-عۇرىپقا جانە ونەرگە باي. اتا-بابامىز قالدىرعان التىن مۇرالارىمىزدىڭ استارىندا ۇلكەن ءمان-ماعىنا جاتىر. سونىڭ ىشىندە قولونەر بۇيىمدارىن جاساۋ ادامدى شىدامدىلىققا، سابىرلىققا، توزىمدىلىككە باۋليدى. ءار بۇيىمدى جاساۋدىڭ ءوز ەرەكشەلىگى مەن قيىندىعى بولادى. قولونەر ادامنىڭ جان دۇنيەسىنىڭ تازالىعىن قالايدى، نازىكتىكتى تالاپ ەتەدى. سونىمەن قاتار، جاساعان دۇنيەڭ كوزدىڭ جاۋىن الاتىنداي بولۋى ءۇشىن ۇزاق ەڭبەكتەنۋىڭ كەرەك. سەبەبى، ساندىك قولدانبالى بۇيىمنىڭ اتى اتقانداي ءسانى مەن سالتاناتى كەلىسۋى كەرەك، - دەيدى قۇدىرەت ءجاقسىلىق ۇلى.

بۇل ونەر قۇدىرەتكە اتا-اناسىنان دارىعان ەكەن. ءوزىنىڭ ماماندىعى باسقا سالا بولا تۇرا، بۇيىم جاساۋدى تاڭدايدى. ءار ەڭبەك ىزدەنىسپەن كەلەدى. بۇل رەتتە ول ءوزىنىڭ ىزدەنىمپازدىلىعىمەن شەبەرلىكتىڭ قىر-سىرىن ۇيرەنەدى.

-مەنىڭ كوپ ۋاقىتىم بالالارمەن وتەدى. ولارمەن ساباق وتكەن وتە قىزىقتى. وقۋشىلار كوپ ءبىلىپ، ۇيرەنگىسى كەلەدى. سول ماقساتتا ولاردىڭ تاراپىنان قويىلعان سۇراقتارعا جالىقپاي جاۋاپ بەرەمىن. ونەردىڭ شەگىنە جەتىپ بولمايسىڭ. ءبىز اتا-بابامىزدان قالعان مۇرالاردى جاستارعا ۇيرەتىپ، ونىڭ جوعالىپ كەتپەۋىنە اتسالىسۋىمىز كەرەك. البەتتە، اۋىلدا نەبىر تۋما تالانتتى جاندار بار. مىنە، سونداي ازاماتتار باردا ءتول ونەرىمىز ءمانىن دە، ماعىناسىن دا جوعالتپايدى، - دەيدى شەبەر.

ناعىز شەبەردىڭ جان جۇرەگىمەن جاسىلعان دۇنيەسى ەشقاشان جەردە قالمايدى. ول ماڭگىلىك مۇرا بولىپ ساقتالاتىنى بارشامىزعا بەلگىلى. ال ۇستانىڭ ونەرىن جالعاستىرۋشىسى، كەلەر ۇرپاققا تاراتۋشىسى دا ونىڭ شاكىرتتەرى بولاتىنى ايدان انىق. وسى ورايدا جاس شەبەردىڭ ارتىنان ەرگەن وقۋشىلارى مەدەت قارىمتايەۆ، يمانعالي يبراگيم، ارابحان الايداروۆ تاعى دا باسقا وقۋشىلار ونەر مەكتەبىندە قولونەر سىنىبىنان قالماي، ۇستازدارىنىڭ ۇيرەتكەندەرىن كوڭىلدەرىنە توقۋدا.