جامبىل وبلىسى اكىمدىگىندە جامبىل وبلىستىق، قالالىق، اۋداندىق قوعامدىق كەڭەستەرى ءتورالقالارىنىڭ تەڭ ءارى ارىپتەستىك نەگىزدە اۋماقتىق ادىستەمەلىك-ۇيلەستىرۋ كەڭەسىنىڭ «قوعامدىق كەڭەستەردىڭ دامۋى» اتتى كونفەرەنسياسى وتكىزىلدى. كەلەلى جيىن جامبىل وبلىسى اكىمدىگى ىشكى ساياسات باسقارماسىنىڭ «جەرگىلىكتى ءوزىن-وزى باسقارۋدى جانە قوعامدىق باقىلاۋدى دامىتۋ بويىنشا اقپاراتتىق ورتالىقتى ۇيىمداستىرۋ» اتتى جوباسى اياسىندا «جامبىل وبلىسى جاستار ۇيىمدارىنىڭ قاۋىمداستىعى» زتب ۇيىمداستىرۋىمەن ءوتتى.
جيىندا وبلىستىق قوعامدىق كەڭەستىڭ ادىستەمەلىك-ۇيلەستىرۋ كەڭەسىنىڭ ءتوراعاسى جاندار كارىباي ۇلى جۇرگىزدى. جاندار كارىباي ۇلى «وبلىستاعى قوعامدىق كەڭەستەردىڭ كۇندەرىن» وتكىزۋ تۋرالى باياندادى. وبلىستا قوعامدىق كەڭەتىڭ ءرولىن كۇشەيتىپ، ارىز-شاعىمداردى جيناقتاۋ كەرەكتىگىن ايتا كەتتى. جامبىل وبلىستىق قوعامدىق كەڭەستىڭ سايتى اشىلعانى بەلگىلى. Q-KENES.KZ سايتىندا اۋدانداردا قانداي دا ءبىر كۇردەلى ماسەلەلەردىڭ شەشىلىپ، سىن-ەسكەرتپەلەر قالاي ورىندالىپ جاتقاندىعى تۋرالى اقپاراتتاندىرىلىپ، جاسالىنعان جۇمىستاردىڭ اشىقتىعى كورسەتىلۋى كەرەكتىگىن ايتتى.
كۇن تارتىبىندەگى ەكىنشى ماسەلە بويىنشا جامبىل وبلىستىق قوعامدىق كەڭەسىنىڭ مۇشەسى، «جامبىل وبلىسى جاستار ۇيىمدارىنىڭ قاۋىمداستىعى» زتب پرەزيدەنتى يسلامبەك داستان ۇلى قوعامدىق كەڭەستەردىڭ 2019 جىلدىڭ ءبىرىنشى جارتى جىلدىعىندا حالىق الدىندا ەسەپ بەرۋ بويىنشا قوعامدىق مونيتورينگ جۇمىسىنىڭ ناتيجەسى تۋرالى ايتتى.
سونىمەن قاتار، جيىن بارىسىندا ءار-تۇرلى ماسەلەلەر تالقىلاندى. مەركى اۋداندىق قوعامدىق كەڭەسىنىڭ ءتوراعاسى س.قۇرالباي سۇرات اۋىلىنداعى الەۋمەتتىك شيەلەنىستى شەشۋدىڭ جولدارىن ۇسىندى.
تالاس اۋداندىق قوعامدىق كەڭەسىنىڭ ءتوراعاسى ءقاۋىپتى ىندەت – ەسىرتكى بويىنشا اۋداندا ناركولوگيالىق ساراپتاما جاسايتىن ورىننىڭ جوق ەكەنىن جەتكىزدى.
– ەسىرتكىنىڭ تۇرلەرى وتە كوپ، ونىڭ جەڭىل جانە اۋىر، ومىرگە ءقاۋىپتى تۇرلەرى كوبەيۋدە. جەڭىل ەسىرتكى دەنەگە تەز تاراپ كەتەدى. قىلمىس تۇندە بولعان جاعدايدا ءبىز تاراز قالاسىنا نەمەسە جاڭاتاس قالاسىنا جەتكىزگەنشە ۋىتتى زاتتىڭ قاندا قالدىعى دا قالمايدى. وسىعان وراي، اۋداننان ارنايى شتات ءبولىپ، مەديسينا سالاسىنان ماماندار بەرىلسە دەگەن ۇسىنىسىمىز بار. قاجەت بولسا ءتيىستى ورگاندارعا حات دايىنداۋعا دايىنبىز، – دەپ اۋداندىق قوعامدىق كەڭەس ءتوراعاسى اقىنبەك بەكتاي ماسەلە كوتەردى.
بارلىق اۋداننىڭ ۇسىنىستارى مەن كوتەرىلگەن ماسەلەلەردى وبلىستىق قوعامدىق كەڭەستىڭ ءتوراعاسى ماقۇلداپ، الداعى ۋاقىتتا بىرلەسىپ جۇمىس جاسايتىنىن جەتكىزدى.
پىكىر قالدىرۋ