مەملەكەت باسشىسى قاسىم-جومارت توقايەۆ «سىندارلى قوعامدىق ديالوگ-قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا تۋريزم سالاسىنا زور كوڭىل بولگەنى بەلگىلى. بۇل تۇرعىدا پرەزيدەنت: «ءتۋريزمدى، اسىرەسە ەكوتۋريزم مەن ەتنوتۋريزمدى دامىتۋعا ەكونوميكانىڭ ماڭىزدى سالاسى رەتىندە باسا ءمان بەرۋ قاجەت.

التىن وردانىڭ 750 جىلدىعىن ءتول تاريحىمىزعا، مادەنيەتىمىز بەن تابيعاتىمىزعا تۋريستەر نازارىن اۋدارۋ تۇرعىسىنان اتاپ وتكەن ءجون.

ءتۋريزمدى دامىتۋ ءۇشىن قاجەتتى ينفراقۇرىلىم جۇرگىزۋدى، سونىڭ ىشىندە جول سالىپ، بىلىكتى ماماندار دايىنداۋدى قامتاماسىز ەتۋ قاجەت» دەپ اتاپ كورسەتتى.

قازىرگى تاڭدا جامبىل وبلىسىندا ءتۋريزمدى دامىتۋ باعىتىندا تىڭ باستامالار كوتەرىلىپ، جارقىن جوبالار جۇزەگە اسۋدا. سونىڭ ءبىرى-جۋالى اۋدانىنداعى «قارالما» تاۋ-شاڭعى بازاسىنىڭ قۇرىلىسى.

شىنى كەرەك، ايماقتا وسىعان دەيىن قىسقى دەمالالىس ورىندارى جوقتىڭ قاسى ەدى. دەگەنمەن وبلىس باسشىلىعىنىڭ باستاماسىمەن جۋالى اۋدانىندا وسى ولقىلىقتىڭ ورنىن تولتىرۋ ءۇشىن «قارالما» تاۋ -شاڭعى بازاسى بوي كوتەرۋدە. وبلىستا ەش بالاماسى جوق كەشەن ءوڭىر تۇرعىندارىنىڭ قۋانىشىمەن قاتار تۋريستەردى دە تارتۋدىڭ ءتيىمدى جولى بولماق.

بۇگىندە تاۋ-شاڭعى بازاسى قۇرىلىس جۇمىستارىنىڭ باسىم كوپشىلىگى اياقتالعان. مۇندا قوناق ۇي-كوتەدجدەرى، تۋريستەرگە قىزمەت كورسەتۋ سەرۆيستىك كەشەنىنىڭ قۇرىلىسى سالىنۋدا. سونداي-اق جەتى شاقىرىمدىق جول سالىنىپ، ينفراقۇرىلىم تارتۋ جۇمىستارى قىزۋ جۇرگىزىلۋدە. كەرەك قۇرال-جابدىقتاردىڭ دەنى جەتكىزىلگەن. قۇرىلىس باسىنداعى جۇمىسشىلار اۋا-رايىنىڭ قولايسىزدىعىنا قاراماستان، كۇن-تۇن دەمەي بىلەك سىبانا ەڭبەكتەنۋدە.

ايتا كەتۋ كەرەك، مۇندا قوناقتار جىل ون ەكى اي بويى دەمالۋعا مۇمكىندىك الادى. جاز مەزگىلدەرىندە ساۋمالمەن، قىمىزبەن ەمدەيتىن، اتپەن سەرۋەن قۇراتىن ورىندار اشىلادى دەپ كۇتىلۋدە.

جالپى، نىسان مەملەكەتتىك-جەكەمەنشىك ارىپتەستىك نەگىزىندە سالىنۋدا. جوبانىڭ جالپى قۇنى 4 ميلليارد 867 ميلليون تەڭگە. تۋريستىك نىسان «باتىس ەۋروپا-باتىس جۇڭگو» كۇرەجولىنىڭ بويىنان 7 شاقىرىم قاشىقتىقتا، الاتاۋ تاۋىنىڭ باۋرايىندا تەڭىز دەڭگەيىنەن 1 600 مەتر بيىكتىكتە بوي كوتەرۋدە. سونىمەن قاتار الاتاۋ تاۋىنىڭ ۇشار باسىنان كەشەنگە دەيىن 2 500 مەتر سىرعاناۋ جولاعى تۇسەدى ەكەن. اسپالى جولدىڭ قۇرىلىسى دا جۇزەگە اسىرىلۋدا. اسپالى جول قۇرىلىسىنا قاجەتتى قوندىرعىلار اۆستريا ەلىنەن جەتكىزىلگەن.