دەنساۋلىق ساقتاۋ سالاسىنداعى نەگىزگى كورسەتكىشكە ىقپال ەتەتىن باستى فاكتور انا مەن نارەستە ءولىم-جىتىمىن تومەندەتۋ بولىپ تابىلادى. ءارى بۇل جايىندا قازاقستان رەسپۋبليكاسى پرەزيدەنتى قاسىم-جومارت توقايەۆتىڭ حالىققا ارناعان جولداۋىندا ايتىلادى. پرەزيدەنت پارمەن بەرگەن بۇل شارالاردىڭ ءوز دەڭگەيىندە ۇيىمداستىرا ءبىلۋ دەنساۋلىق ساقتاۋ سالاسىن باسقارۋداعى وزەكتى ماسەلە سانالادى. جامبىل وبلىسىندا انا مەن نارەستە ءولىمنىڭ الدىن-الۋ، بولدىرماۋ شارالارى، ارنايى جول كارتاسىنا ساي جۇرگىزىلىپ كەلەدى، دەپ جازادى Qamshy.kz اقپارات اگەنتتىگى. 

اتالعان جول كارتاسىنداعى ءىس-شارالار بويىنشا جامبىل وبلىستىق پەريناتالدىق ورتالىعىندا وقۋ كلينيكالىق ورتالىعى اشىلدى. ورتالىقتا جىل باسىنان بەرى 211 مامان وقىتىلدى. سونداي-اق جامبىل جوعارى مەديسينالىق كوللەدجىنىڭ سيممۋلياسيالىق ورتالىعىندا 212 مەديسينا قىزمەتكەرى ءوز ءبىلىمى مەن بىلىگىن جەتىلدىرىلدى. ال وبلىستىق پەريناتالدىق ورتالىعىنىڭ بازاسىنا جالپى قۇنى 169،4 ميلليون تەڭگە بولاتىن 9 مەديسينالىق قۇرال - جابدىق ساتىپ الىندى. وسى قۇرال-جابدىقتىڭ كومەگىمەن تۋا بىتكەن اقاۋلاردى ەرتە انىقتاۋدا 57 پايىزدىق كورسەتكىشكە قول جەتكىزىلدى. بوساندىرۋ بولىمدەرىنىڭ ماتەريالدىق-تەحنيكالىق بازاسىن نىعايتۋعا 413،8 ميلليون تەڭگە قاراستىرىلىپ، 18 مەديسينالىق قۇرال-جابدىق ساتىپ الىندى.

–بۇگىندە باسقارما تاراپىنان بۇل جۇمىستاردا وڭ ناتيجەگە قول جەتكىزۋ ءۇشىن جۇكتى جانە بوسانعان ايەلدەردىڭ دەنساۋلىعىنا تۇراقتى مونيتورينگ جۇرگىزىلەدى. دەنساۋلىق ساقتاۋ ۇيىمدارىندا اپتا سايىن ديسپەچەرلىك ساعات وتكىزىلەدى. جۇكتى جانە فەرتيلدى جاستاعى ايەلدەر تىزىمىنە ناقتىلاۋ جۇمىستارى جۇرگىزىلۋدە. «كارديوحيرۋرگيا جانە ترانسپلانتولوگيا عىلىمي كلينيكالىق ورتالىعى» جاۋاپكەرشىلىگى شەكتەۋلى سەرىكتەستىگىمەن ۋلترا دىبىقتىق زەرتتەۋ قۇرىلعىسىنىڭ ماماندارىنا «جۇرەك تۋا بىتكەن اقاۋلاردى ەرتە انىقتاۋ» بويىنشا وقىتۋلار، شەبەرلىك سىنىپتار دا ۇدايى ۇيىمداستىرىلىپ تۇرادى، –دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.

باسقارما باسشىسىنىڭ ايتۋىنشا وڭىردە انا مەن بالا ءولىمىن ازايتۋدىڭ ۇزاق مەرزىمدى جوسپارىنا ساي بىرەر جىلدىڭ كولەمىندە وبلىستىق بالالار اۋرۋحاناسىندا كۋراتورلىق قىزمەت ۇيىمداستىرىلىپ، وقىتۋ-ادىستەمەلىك ورتالىعىن اشۋ قولعا الىنباق. سونىمەن قاتار جۇكتىلىك كەزىندە تۋا بىتكەن احاۋلاردى ەرتە انىقتاۋ ماقساتىندا وبلىستىق پەريناتالدىق ورتالىعىندا ۋلترا دىبىستىق زەرتتەۋ ورتالىعىن اشۋ جوسپارلانۋدا. ۋزي دارىگەرلەرىنىڭ «تۋا بىتكەن اقاۋدى ەرتە انىقتاۋ» بويىنشا بىلىكتىلىگىن جەتىلدىرۋ ماسەلەسى دە كۇن تارتىبىنەن تۇسكەن ەمەس.