ساپالى مەديسينالىق قىزمەت ناقتى ءبىر وڭىردەگى حالىق ءجيى شالدىعاتىن ءارى ءولىم ءقاۋپى جوعارى سوزىلمالى اۋرۋ تۇرلەرىمەن ناتيجەلى كۇرەستەن دە كورىنەدى. وسى ورايدا ەلىمىزدە 2013 جىلدان باستاپ اۋرۋلاردى باسقارۋ باعدارلاماسى جۇمىس جاسايدى. الەۋمەتتىك مانگە ءارى سوزىلمالى اۋرۋلاردان ءولىم-جىتىمدى ازايتۋ ماقساتىندا 2018 جىلدان باستاپ بارلىق العاشقى مەديسينالىق-سانيتارلىق كومەك كورسەتۋ ۇيىمدارىنا اۋرۋلاردى باقسارۋ باعدارلاماسى ەنگىزىلدى.پيلوتتىق رەجيمدە وبلىس ورتالىعىنداعى 3 ەمحاناعا ەنگىزىلگەن جۇيەنىڭ تيىمدىلىگى بايقالادى، دەپ جازادى Qamshy.kz اقپارات اگەنتتىگى. 

تۇتاس مەملەكەت تۇرعىندارىنىڭ دەنساۋلىعىن ساقتاۋعا جاۋاپتى سان سالالى مەديسينا قىزمەتى بولعانىمەن ءاربىر ادام ءوز دەنساۋلىعىنا ەڭ الدىمەن ءوزى جاۋاپتى ەكەنىن ۇمىتپاۋى كەرەك. سول سەبەپتەن دە ەلىمىزدە الەمدىك تاجىريبەگە ساي سوزىلمالى اۋرۋلاردى باسقارۋ باعدارلاماسى جۇزەگە اسىرىلۋدا.

–وبلىستا ءۇش نوزولوگيا بويىنشا ديسپانسەرلىك ەسەپتە تۇراتىن 91 052 ناۋقاستىڭ 26 829-ى اۋرۋلاردى باقسارۋ باعدارلاماسىمەن قامتىلدى ونىڭ ىشىندە ارتەريالدى گيپەرتونيامەن اۋىراتىنى 21 196 ناۋقاس، قانت ديابەتىمەن اۋىراتىن 5060 ادام قامتىلعان. سونىمەن جۇرەكتىڭ سوزىلمالى جەتىسپەۋشىلىگى بايقالاتىن 573 ناۋقاس تا بۇل باعدارلاماعا ەنگىزىلگەن. ازىرگە باعدارلامانىڭ قامتۋ كورسەتكىشى كورسەتكىش 29،5 پايىزدى قۇرايدى. جىل سوڭىنا دەيىن كورسەتكىشتى 30 پايىزعا جەتكىزەمىز. اۋرۋلاردى باسقارۋ باعدارلاماسىن ەنگىزۋ بويىنشا 2019 جىلى 2372 ماماندى وقىتۋ جوسپارلانعان. ال باسىنان بەرگى 9 اي قورىتىندىسىندا وبلىستان بۇل باعدارلاما بويىنشا 2758 ماماندى وقىتىپ، جوسپاردى اسىرا ورىنداي الدىق،–دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.

وبلىستا اۋرۋلاردى باسقارۋ باعدارلاماسى ەنگىزۋدىڭ العاشقى ناتيجەلەرى بويىنشا سوزىلمالى جۇرەك اقاۋلارىمەن ەمدەۋگە جاتقىزۋ جاعدايلارى 2،5 ەسە تومەندەدى. ال ناۋقاستاردىڭ 70 پايىزىنىڭ ارتەريالىق قىسىمى تۇراقتاندى. سول سەكىلدى قانت ديابەتى بار پاسيەنتتەردىڭ 34 پايىزىندا وڭ ديناميكا بايقالادى. ماسەلەن ءبىر عانا «جانۇيا» ەمحاناسىنىڭ وزىندە اتالعان باعدارلاما بويىنشا ەسەپكە الىنعان 537 ادامنىڭ دەنساۋلىق جاعدايى تۇراقتى باقىلاۋعا الىنعانن

–«اۋرۋلاردى باسقارۋ» باعدارلاماسىنا ءىى جانە ءىىى ساتىداعى ارتەريالىق گيپەرتەنزياسى بار، ءىى ءتيپتى قانت ديابەتى، سوزىلمالى جۇرەك جەتكىلىكسىزدىگى، ءقاۋىپ فاكتورلارى بار پاسيەنتتەر قاتىسا الادى. باعدارلاما كومەگىنە جۇگىنۋشىلەردىڭ دەنى قارت كىسىلەر. كۇنىنە ەمحاناعا 15 ناۋقاس كەلىپ ءتيىمدى تاماقتانۋ مەن دەنساۋلىققا قاتىستى كەڭەس الا الادى، –دەيدى «جانۇيا» ەمحاناسىنىڭ الەۋمەتتىك پسيحولوگيالىق كومەك كورسەتۋ ءبولىمىنىڭ مەڭگەرۋشىسى گۇلجان يمانبەكوۆا.