مەديسينالىق قىزمەت پەن جالپى دەنساۋلىق ساقتاۋ سالاسىنىڭ الەۋەتىن ارتتىرۋدا ەڭ اۋەلى مامانداردىڭ بىلىكتىلىگىنە يەك ارتىلاتىندىعى ايتپاسا دا تۇسىنىكتى جايت. ال سالاعا بىلىكتى مامانداردى تارتۋ ءۇشىن ولاردىڭ الەۋمەتتىك جاعدايىن جاساۋ، ەڭبەك جالاقىسىن جوعارى ەتىپ تولەۋ قاجەت.مۇنان بولەك دەنساۋلىق ساقشىلارىنىڭ كاسىبي بىلىكتىلىگىن جەتىلدىرىپ وتىرۋ دا زامان تالابى. بۇل ورايدا، جامبىلدىق مەديسينا سالاسى قىزمەتكەرلەرى دە لايىقتى جالاقى تولەنىپ، قۇزىرەتتىلىگىن ارتتىرۋ ماسەلەسى وڭتايلى شەشىلىپ كەلەدى، دەپ جازادى Qamshy.kz اقپارات اگەنتتىگى. 

ەلباسىنىڭ تاپسىرماسىنا ساي اعىمداعى جىلدىڭ شىلدە ايىنان مەديسينا قىزمەتكەرلەرىنىڭ جالاقىسى 30 پايىزعا ءوستى. ناتيجەسىندە دارىگەرلەردىڭ ورتاشا جالاقىسى 124 مىڭ 523تەڭگەدەن 162 مىڭ 950 تەڭگەگە دەيىن كوتەرىلدى. ال ورتا بۋىن قىزمەتكەرلەرىنىڭ جالاقىلارى 90 مىڭ 458 تەڭگەدەن 118 مىڭ 105 تەڭگەگە دەيىن ارتتى. بۇل شارالار ءوز كەزەگىندە مەديسينالىق قىزمەتكەرلەرگە ۇلكەن سەرپىلىس بەرىپ، ولاردىڭ ءوز قىزمەتىنە دەگەن جاۋاپكەرشىلىگىن ەسەلەي ءتۇستى.

– وڭىردە مەديسينالىق قىزمەتكەرلەرگە وڭتايلاندىرۋ شاراسى اياسىندا ۇنەمدەلگەن قارجى ەسەبىنەن كوتەرمەاقى تولەۋ دە جوسپارلانعان. اعىمداعى جىلى دەنساۋلىق ساقتاۋ ينفراقۇرىلىمىن دامىتۋدىڭ ءبىرىڭعاي پەرسپەكتيۆالىق جوسپارى بەكىتىلدى. اتالعان جوسپارعا سايكەس وبلىستاعى 9 ستاسيونارلىق مەديسينالىق ۇيىمنان 3 كلاستەر قۇرۋ جوسپارلانىپ وتىر. ناتيجەسىندە كوپسالالى وبلىستىق اۋرۋحانا، كوپسالالى قالالىق اۋرۋحانا جانە كوپ سالالى بالالار اۋرۋحاناسى قۇرىلادى. بۇل كلاستەرلەردى قۇرۋ ارقىلى ەڭ اۋەلى كادر تاپشىلىعى ماسەلەسى شەشىلىپ، جوعارى مامانداندىرىلعان مەديسينالىق كومەككە قول جەتىمدىلىك ارتادى. سونداي-اق تۇرعىندار تاراپىنان ءجيى سىنعا الىناتىن ناۋقاستاردى اۋرۋحانادان اۋرۋحاناعا تاسىمالداۋ ماسەلەسىنە دە شەكتەۋ قويىلماق. مەديسينالىق ۇيىمداردى وڭتايلاندىرۋدىڭ ارقاسىندا توسەك ورىننىڭ سانى، شتاتتىق بىرلىكتەر قىسقارىپ، بۇل ماقساتقا جۇمسالۋى كەرەك 269 ميلليون 600 مىڭ تەڭگە قارجى ۇنەمدەلەدى. سايكەسىنشە بۇل قاراجاتتى مەديسينالىق قىزمەتكەرلەردىڭ ەڭبەك جالاقىسىنا ۇستەماقى رەتىندە قوسىلىپ، ولاردى ىنتالاندىرۋعا جۇمسالماق، –دەيدى وبلىس اكىمدىگىنىڭ دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆ.

باسقارما باسشىسىنىڭ مالىمدەۋىنشە وڭىرگە اسا قاجەتتى ماماندارعا جۇرگىزىلگەن تالداۋ ناتيجەسىندە اكۋشەر-گينەكولوگ، انەستەزيولوگ-رەانيماتولوگ، نەوناتولوگ سىندى اسا قاجەتتى ماماندىقتارى ايقىندالعان.

–ءدال وسى ماماندارعا قاجەتتىلىكتى جويۋ ماقساتىندا وبلىس اكىمىنىڭ تاپسىرماسىنا ساي جەرگىلىكتى بيۋدجەتتەن 8 ميلليون 700 مىڭ تەڭگە ءبولىنىپ، 12 ماماندى رەزيدەنتۋراعا وقىتۋ ءۇشىن قازاق ۇزدىكسىز ءبىلىم بەرۋ ۋنيۆەرستەتىمەن كەلىسىم-شارت جاسالىندى،–دەيدى مارات سەيىتبەك ۇلى.