ەلباسىمىز ءوزىنىڭ 2012 جىلعى 14 جەلتوقسانداعى «قازاقستان – 2050» ستراتەگياسى قالىپتاسقان مەملەكەتتىڭ جاڭا ساياسي باعىتى» اتتى قازاقستان حالقىنا جولداۋىندا: «مەملەكەت ءوز تاراپىنان مەملەكەتتىك ءتىلدىڭ پوزيسياسىن نىعايتۋ ءۇشىن كوپ جۇمىس اتقارىپ كەلەدى. قازاق ءتىلىن كەڭىنەن قولدانۋ جونىندەگى كەشەندى شارالاردى جۇزەگە اسىرۋدى جالعاستىرۋ كەرەك. ءبىز 2025 جىلدان باستاپ ءالىپبيىمىزدى لاتىن قارپىنە، لاتىن الىپبيىنە كوشىرۋگە كىرىسۋىمىز كەرەك. بۇل – ۇلت بولىپ شەشۋگە ءتيىس ءپرينسيپتى ماسەلە. ءبىر كەزدە تاريح بەدەرىندە ءبىز مۇنداي قادامدى جاساعانبىز. بالالارىمىزدىڭ بولاشاعى ءۇشىن وسىنداي شەشىم قابىلداۋعا ءتيىسپىز جانە بۇل الەممەن بىرلەسە تۇسۋىمىزگە، بالالارىمىزدىڭ اعىلشىن ءتىلى مەن ينتەرنەت ءتىلىن جەتىك يگەرۋىنە، ەڭ باستىسى – قازاق ءتىلىن جاڭعىرتۋعا جاعداي تۋعىزادى» – دەپ لاتىن الىپبيىنە كوشۋدىڭ قاجەتتىلىگىن اتاپ وتكەن بولاتىن. بۇگىندە بۇل تۇرعىدا جامبىل وبلىسىندا دا جۇيەلى جۇمىستار جالعاسۋدا.

قازاقستان رەسپۋبليكاسى پرەمەر-مينيسترىنىڭ 2018 جىلعى 13 ناۋرىزداعى №27 وكىمىمەن بەكىتىلگەن قازاق ءتىلى ءالىپبيىن لاتىن گرافيكاسىنا 2025 جىلعا دەيىن كەزەڭ-كەزەڭىمەن كوشىرۋ جونىندەگى ءىس-شارالار جوسپارى بار.

لاتىن ءالىپبيىن جانە جاڭا قازاق ءتىلى ەملەسىنىڭ نەگىزگى ەرەجەلەرىن ۇيرەتۋ بويىنشا ءتيىستى سالا ماماندارىن قايتا دايارلاۋدى ءبىر ورتالىقتان جۇرگىزۋ ماقساتىندا وبلىس اكىمدىگىنىڭ تىلدەردى دامىتۋ باسقارماسىنىڭ تىلدەردى وقىتۋ ورتالىعىندا كادرلىق، ماتەريالدىق تەحنيكالىق بازالارىن كۇشەيتۋ باعىتىندا جۇمىستار اتقارىلدى.

لاتىننەگىزدى جاڭا ءالىپبيدى ۇيرەتۋ، ادىستەمەلىك كومەك كورسەتۋ ماقساتىندا 2018 جىلدىڭ 5 قىركۇيەگىندە اشىلعان «رۋحاني جاڭعىرۋ: لاتىن ءالىپبيى» كابينەتىندە ۇلتتىق ءالىپبيدى ناسيحاتتاۋ بويىنشا سەمينار-ترەنينگتەر، وقۋ كۋرستارى، لينگۆيست عالىمداردىڭ ونلاين كەڭەستەرى وتكىزىلىپ وتىرادى.

اعىمداعى جىلدىڭ مامىر ايىنان جاڭا قازاق ءالىپبيىنىڭ ەملە ەرەجەلەرىن مەڭگەرۋ بويىنشا 36 ساعاتتىق وقۋ كۋرسىنىڭ باعدارلاماسى ازىرلەنىپ، 103 ادام وقۋ كۋرسىنان ءوتىپ، سەرتيفيكاتتار تابىستالدى. وقۋ كۋرستارىن ش.شاياحمەتوۆ اتىنداعى «ءتىل-قازىنا» ۇلتتىق عىلىمي-پراكتيكالىق ورتالىعىنىڭ 72 ساعاتتىق وقۋ كۋرسىنان وتكەن ترەنەر وقىتۋشىلار جۇرگىزەدى. قازىرگى تاڭدا 8 قىزمەتكەر سەرتيفيكاتتالعان ترەنەر.

بۇل باعىتتاعى جۇمىستار جۇيەلى جالعاسۋدا.